مصنف ابن ابي شيبه

حضرت ابن عمر رضی اللہ عنہما کے نزدیک بوسہ چھونے کی طرح ہے اور وہ بوسہ لینے کی وجہ سے وضو کا حکم دیتے تھے۔

حضرت عبداللہ کے نزدیک بوسہ چھونے کی طرح ہے اور وہ بوسہ لینے کی وجہ سے وضو کا حکم دیتے تھے۔

ابراہیم فرماتے ہیں کہ جب کوئی شخص شہوت سے بوسہ لے تو اس کا وضو ٹوٹ جائے گا۔

حضرت شعبی سے یونہی منقول ہے۔

ایک اور سند سے حضرت شعبی سے یونہی منقول ہے۔

حضرت عبد العزیز بن عبد اللہ فرماتے ہیں کہ میں نے حضرت زہری سے بوسہ کے حکم کے بارے میں پوچھا تو انہوں نے فرمایا ” علماء فرماتے تھے کہ اس سے وضو واجب ہے “

حضرت حکم اور حضرت حماد فرماتے ہیں کہ اگر بوسہ لیا یا چھوا تو وضو واجب ہے۔

حضرت شعبی فرماتے ہیں کہ بوسہ وضو کو توڑ دیتا ہے۔

حضرت حماد فرماتے ہیں کہ اگر آدمی اپنی بیوی کا بوسہ لے اور بیوی نہ چاہتی ہو تو مرد کا وضو ٹوٹے گا عورت کا نہیں ٹوٹے گا۔ اگر عورت مرد کا بوسہ لے تو عورت پر وضو لازم ہوگا مرد پر نہیں۔ اگر آدمی کو شہوت محسوس ہو تو اس کا وضو بھی ٹوٹ جائے گا اور اگر آدمی عورت کا بوسہ لے اور وہ چاہتی تو نہ ہو لیکن اسے شہوت محسوس ہو تو اس کا وضو ٹوٹ جائے گا۔

ابراہیم نے اپنی زوجہ سے فرمایا ” اے ھنیدہ ! میں اللہ کی تعریف کرتا ہوں۔ اگر مجھے اپنا وضو باقی نہ رکھنا ہوتا تو میں تیرا بوسہ لے لیتا “