المعجم الكبير للطبراني

سیدہ ام حبیبہ رضی اللہ عنہا سے روایت ہے کہ رسول اللہ ﷺ نے فرمایا: ”مجھے دکھایا گیا کہ میرے بعد میری امت کو کیا پیش آئے گا، ان میں سے بعض کا بعض کا خون بہانا۔ چنانچہ میں نے اللہ سے دعا کی کہ وہ قیامت کے دن ان کے بارے میں مجھے شفاعت کا اختیار دے، تو اللہ نے ایسا ہی کیا۔“

سیدہ ام حبیبہ رضی اللہ عنہا سے روایت ہے کہ رسول اللہ ﷺ نے فرمایا: ”مجھے دکھایا گیا کہ میرے بعد میری امت کو کیا پیش آئے گا اور ان کا خون بہایا جانا۔ چنانچہ میں نے اللہ سے دعا کی کہ وہ ان کے بارے میں مجھے شفاعت کا اختیار دے، تو اللہ نے ایسا ہی کیا۔“

سیدنا انس بن مالک رضی اللہ عنہ بیان کرتے ہیں کہ ام حبیبہ رضی اللہ عنہا نے عرض کیا: یا رسول اللہ! ہم میں سے کسی عورت کے دو شوہر ہوں، پھر وہ فوت ہو جائے اور جنت میں داخل ہو جائے، وہ اور دونوں شوہر بھی، تو وہ کس کی بیوی ہوگی، پہلے کی یا دوسرے کی؟ آپ ﷺ نے فرمایا: ”وہ دونوں میں سے اس کو چنے گی جس کا اخلاق دنیا میں اس کے ساتھ بہتر تھا، وہی جنت میں اس کا شوہر ہوگا۔ اے ام حبیبہ! اچھا اخلاق دنیا اور آخرت کی بھلائی لے جاتا ہے۔“