المعجم الكبير للطبراني

ناشرہ بن سمی رحمہ اللہ سے روایت ہے کہ انہوں نے سیدنا عمر بن خطاب رضی اللہ عنہ کو یومِ جابیہ کے موقع پر یہ کہتے سنا: میں نے خالد بن ولید کو معزول کر دیا ہے اور ابوعبیدہ بن جراح کو امیر مقرر کیا ہے۔ اس پر ابوعمرو بن حفص بن مغیرہ کھڑے ہوئے اور کہا: اللہ کی قسم! آپ نے ایسے عامل کو معزول کیا ہے جسے رسول اللہ ﷺ نے مقرر کیا تھا، اور ایسی تلوار میان میں ڈال دی ہے جسے رسول اللہ ﷺ نے سونتا تھا، اور ایسا جھنڈا اتار دیا ہے جسے رسول اللہ ﷺ نے باندھا تھا۔

ناشرہ بن سمی رحمہ اللہ کہتے ہیں: میں نے سیدنا عمر بن خطاب رضی اللہ عنہ کو جمعہ کے دن یہ فرماتے سنا: میں تم سے خالد بن ولید کے بارے میں معذرت چاہتا ہوں، میں نے انہیں اس بات پر امیر بنایا تھا کہ وہ مہاجرین کے صدقے کے اس مال کو روک رکھیں، تو انہوں نے وہ (مال) طاقتور، زبان آور اور معزز لوگوں کو دے دیا، اور میں نے انہیں معزول کر کے ابوعبیدہ بن جراح کو مقرر کیا ہے۔ اس پر ابوعمرو بن حفص نے کہا: اللہ کی قسم! آپ نے انصاف نہیں کیا، آپ نے ایسے عامل کو معزول کیا ہے جسے رسول اللہ ﷺ نے مقرر کیا تھا، اور ایسی تلوار میان میں ڈال دی ہے جسے رسول اللہ ﷺ نے سونتا تھا، اور ایسا جھنڈا اتار دیا ہے جسے رسول اللہ ﷺ نے نصب کیا تھا، اور آپ نے اپنے چچا زاد سے حسد کیا ہے۔ عمر رضی اللہ عنہ نے فرمایا: تم رشتے میں قریب اور عمر میں کم سن ہو۔