المعجم الكبير للطبراني

سیدنا معاذ بن جبل رضی اللہ عنہ سے روایت ہے، وہ بیان کرتے ہیں: رسول اللہ ﷺ نے غزوہ تبوک میں ظہر و عصر اور مغرب و عشاء کی نمازوں کو جمع کیا۔

سیدنا ابوالطفیل رضی اللہ عنہ بیان کرتے ہیں کہ سیدنا معاذ رضی اللہ عنہ نے انہیں بتایا کہ وہ رسول اللہ ﷺ کے ساتھ تبوک کی طرف نکلے، تو رسول اللہ ﷺ ظہر و عصر اور مغرب و عشاء کو ملا کر اکٹھا پڑھا کرتے تھے۔ راوی کہتے ہیں: پھر آپ ﷺ نے ایک دن نماز مؤخر کی، پھر نکلے اور ظہر و عصر اکٹھی پڑھیں، پھر (اندر) داخل ہوئے، پھر نکلے اور مغرب و عشاء اکٹھی پڑھیں، پھر فرمایا: ”تم لوگ ان شاء اللہ کل تبوک کے چشمے پر پہنچو گے، اور تم وہاں دن چڑھے پہنچو گے، تو جو بھی وہاں پہنچے وہ اس کے پانی کو ہاتھ نہ لگائے یہاں تک کہ میں آ جاؤں۔“ راوی کہتے ہیں: ہم وہاں پہنچے تو دو آدمی ہم سے پہلے وہاں پہنچ چکے تھے، اور چشمہ جوتے کے تسمے کی مانند تھا، اس میں سے تھوڑا سا پانی رِس رہا تھا، تو رسول اللہ ﷺ نے ان دونوں سے پوچھا: ”کیا تم نے اس کے پانی کو ہاتھ لگایا؟“ انہوں نے کہا: ہاں، تو آپ ﷺ نے انہیں ڈانٹا اور جو اللہ نے چاہا کہا، پھر لوگوں نے اپنے ہاتھوں سے چشمے میں سے تھوڑا تھوڑا پانی نکالا یہاں تک کہ کچھ پانی جمع ہو گیا، پھر رسول اللہ ﷺ نے اس میں اپنا چہرہ اور دونوں ہاتھ دھوئے، پھر وہ پانی دوبارہ چشمے میں ڈال دیا، تو چشمہ بہت زیادہ پانی کے ساتھ بہنے لگا اور لوگوں نے سیراب ہو کر پانی پیا، پھر رسول اللہ ﷺ نے فرمایا: ”اے معاذ! عنقریب، اگر تمہیں لمبی زندگی ملی، تو تم دیکھو گے کہ یہ جگہ جنوں سے بھر گئی ہے۔“
دبری راوی نے اسی طرح کہا اور اس میں وہم کیا، دراصل یہ (لفظ) ”قد ملئ جنانا“ یعنی باغات سے بھر گئی ہے۔

سیدنا ابوالطفیل رضی اللہ عنہ کہتے ہیں: میں نے سیدنا معاذ بن جبل رضی اللہ عنہ کو کہتے سنا: ”ہم رسول اللہ ﷺ کے ساتھ غزوہ تبوک میں نکلے، اور آپ ﷺ سفر تب تک شروع نہ کرتے جب تک ٹھنڈک نہ ہو جاتی، پھر ظہر و عصر کو اکٹھا کر لیتے، پھر جب شام ہوتی تو اترتے اور مغرب و عشاء کو اکٹھا کر لیتے۔“

سیدنا معاذ بن جبل رضی اللہ عنہ نے بیان کیا کہ رسول اللہ ﷺ نے غزوہ تبوک میں ظہر و عصر اور مغرب و عشاء کی نمازوں کو جمع کیا، یہاں تک کہ ہم واپس آ گئے۔

سیدنا معاذ بن جبل رضی اللہ عنہ کہتے ہیں: ہم نبی کریم ﷺ کے ساتھ غزوہ تبوک میں نکلے، اور آپ ﷺ ظہر و عصر کو اکٹھا پڑھتے، اور مغرب و عشاء کو اکٹھا پڑھتے تھے۔

سیدنا معاذ بن جبل رضی اللہ عنہ کہتے ہیں: نبی کریم ﷺ نے سخت گرمی میں تبوک کی طرف غزوہ کیا، تو آپ ﷺ نے ظہر و عصر اور مغرب و عشاء کو جمع کیا۔

سیدنا معاذ بن جبل رضی اللہ عنہ کہتے ہیں: رسول اللہ ﷺ نے غزوہ تبوک میں ظہر و عصر اور مغرب و عشاء کو جمع کیا۔

سیدنا معاذ بن جبل رضی اللہ عنہ کہتے ہیں: نبی کریم ﷺ نے غزوہ تبوک میں ظہر و عصر اور مغرب و عشاء کو جمع کیا۔

سیدنا معاذ رضی اللہ عنہ کہتے ہیں: میں ایک سفر میں رسول اللہ ﷺ کے ساتھ تھا تو آپ ﷺ نے مجھے اپنے پیچھے سوار کر لیا، پس میں نے رسول اللہ ﷺ کی جلد سے زیادہ نرم کوئی چیز نہیں چھوئی، اور نہ رسول اللہ ﷺ کی خوشبو سے زیادہ عمدہ کوئی خوشبو پائی، تو آپ ﷺ نے فرمایا: ”اے معاذ! کیا تم نے آج رات کوئی آواز سنی؟“ میں نے عرض کیا: نہیں، آپ ﷺ نے فرمایا: ”میرے رب کی طرف سے میرے پاس ایک آنے والا آیا اور اس نے مجھے یہ خوشخبری دی کہ میری امت میں سے جو شخص اللہ کے ساتھ کسی چیز کو شریک ٹھہرائے بغیر مرے گا، وہ جنت میں داخل ہو گا۔“ میں نے عرض کیا: یا رسول اللہ! کیا میں لوگوں کے پاس نکل کر انہیں یہ خوشخبری نہ سنا دوں؟ آپ ﷺ نے فرمایا: ”انہیں رہنے دو تاکہ وہ (نیکی کی) راہ میں ایک دوسرے سے آگے بڑھنے کی کوشش کریں۔“