المعجم الكبير للطبراني

(کسی نے ایک نصرانی کو اسلام کی دعوت دی تو) اس نصرانی نے نبی کریم ﷺ کا ذکر کر کے آپ کی توہین کی، یہ بات عمرو بن العاص رضی اللہ عنہ تک پہنچائی گئی، تو انہوں نے (سیدنا غرفہ رضی اللہ عنہ کو) بلا بھیجا، (کسی نے) کہا: ہم نے تو انہیں عہد دے رکھا ہے۔ اس پر سیدنا غرفہ بن حارث ازدی کندی رضی اللہ عنہ نے فرمایا: ”اللہ کی پناہ کہ ہم نے انہیں یہ عہد و پیمان اس بات پر دیا ہو کہ وہ ہمیں اللہ اور اس کے رسول کے بارے میں تکلیف دیں، ہم نے تو انہیں اس بات پر عہد دیا ہے کہ ہم ان کے اور ان کے گرجاؤں کے درمیان رکاوٹ نہیں بنیں گے، وہ ان میں جو چاہیں کہیں، اور ہم انہیں ایسی ذمہ داری نہیں دیں گے جس کی وہ طاقت نہ رکھتے ہوں، اور ہم ان کی طرف سے (دشمن کے مقابلے میں) لڑیں گے، اور انہیں ان کے اپنے فیصلوں میں آزاد چھوڑا جائے گا، سوائے اس کے کہ وہ خود (ہمارے پاس) آئیں تو ہم ان کے درمیان اس کے مطابق فیصلہ کریں گے جو اللہ نے نازل فرمایا ہے۔“ عمرو بن العاص رضی اللہ عنہ نے کہا: تم نے سچ کہا۔

سیدنا غرفہ بن حارث ازدی کندی رضی اللہ عنہ بیان کرتے ہیں کہ میں حجۃ الوداع میں رسول اللہ ﷺ کے ساتھ حاضر تھا، قربانی کے اونٹ لائے گئے تو آپ ﷺ نے فرمایا: ”ابوالحسن کو میرے پاس بلاؤ۔“ چنانچہ سیدنا علی رضی اللہ عنہ کو بلایا گیا، آپ ﷺ نے ان سے فرمایا: ”نیزے کا نچلا حصہ پکڑو۔“ اور رسول اللہ ﷺ نے اوپر کا حصہ پکڑا، پھر ہم نے اس سے اونٹوں کو نحر کیا۔ جب آپ ﷺ فارغ ہوئے تو خچر پر سوار ہوئے اور سیدنا علی رضی اللہ عنہ کو اپنے پیچھے سوار کر لیا۔