المعجم الكبير للطبراني

سیدنا عوف بن مالک اشجعی رضی اللہ عنہ کہتے ہیں: ہم رسول اللہ ﷺ کے ساتھ ایک سفر میں تھے، ایک رات ہم نے پڑاؤ ڈالا تو میں نبی کریم ﷺ کو تلاش کرنے کے لیے اٹھا، مجھے آپ ﷺ نہ ملے، البتہ معاذ بن جبل اور ابوموسیٰ اشعری رضی اللہ عنہما مل گئے، انہوں نے پوچھا: تمہیں کیا ضرورت ہے؟ میں نے کہا: رسول اللہ ﷺ کہاں ہیں؟ انہوں نے کہا: ہمیں معلوم نہیں تھا، ہم اسی حال میں تھے کہ ہم نے وادی کی بلندی سے چکی کی آواز جیسی ایک آواز سنی، تھوڑی دیر بعد نبی کریم ﷺ تشریف لے آئے تو ہم نے عرض کیا: یا رسول اللہ، ہم نے آج رات آپ کو نہیں پایا۔ آپ ﷺ نے فرمایا: ”میرے رب کی طرف سے ایک آنے والا میرے پاس آیا اور مجھے اختیار دیا کہ میری امت اہل جنت کا آدھا حصہ ہو یا شفاعت مل جائے، تو میں نے شفاعت کو چنا۔“ ہم نے عرض کیا: یا رسول اللہ، اللہ سے دعا کریں کہ ہمیں شفاعت والوں میں سے بنائے۔ آپ ﷺ نے فرمایا: ”اے اللہ! ہمیں ان میں سے بنا۔“ پھر ہم لوگوں کے پاس گئے اور انہیں بتایا، تو انہوں نے کہا: یا رسول اللہ، اللہ سے دعا کریں کہ ہمیں آپ کی شفاعت والوں میں سے بنائے۔ آپ ﷺ نے فرمایا: ”اے اللہ! انہیں بھی ان میں سے بنا۔“ پھر رسول اللہ ﷺ نے فرمایا: ”میری شفاعت اس کے لیے ہے جو اس حال میں مرے کہ اللہ کے ساتھ کسی کو شریک نہ ٹھہراتا ہو۔“

سیدنا عوف بن مالک رضی اللہ عنہ سے بھی نبی کریم ﷺ سے اسی طرح کی حدیث مروی ہے۔

سیدنا عوف بن مالک رضی اللہ عنہ سے روایت ہے کہ رسول اللہ ﷺ نے فرمایا: ”میری شفاعت میری امت میں سے اس کے لیے ہے جو اس حال میں مرے کہ اللہ کے ساتھ کسی کو شریک نہ ٹھہراتا ہو۔“