المعجم الكبير للطبراني

سیدنا انس بن مالک رضی اللہ عنہ سے روایت ہے کہ رسول اللہ ﷺ مدینہ تشریف لائے تو سیدنا عبداللہ بن سلام رضی اللہ عنہ ایک کھجور کے درخت پر (کام میں مصروف) تھے۔ سیدنا عبداللہ بن سلام رضی اللہ عنہ رسول اللہ ﷺ کی خدمت میں حاضر ہوئے اور عرض کیا: ”میں آپ سے کچھ ایسی باتیں پوچھنا چاہتا ہوں جنہیں نبی کے سوا کوئی نہیں جانتا، اگر آپ نے مجھے ان کا جواب دے دیا تو میں آپ پر ایمان لے آؤں گا۔“ (آگے راوی نے پوری حدیث بیان کی)۔

سیدنا انس بن مالک رضی اللہ عنہ بیان کرتے ہیں کہ سیدنا عبداللہ بن سلام رضی اللہ عنہ نے عرض کیا: یا رسول اللہ! میں مسلمان ہو چکا ہوں اور کچھ باتیں آپ سے پوچھنا چاہتا ہوں۔ آپ ﷺ نے فرمایا: ”جو چاہو پوچھو۔“ میں نے عرض کیا: یا رسول اللہ! مجھے بتائیے کہ بچہ اپنی ماں سے مشابہت کیوں رکھتا ہے حالانکہ نطفہ تو مرد کا ہوتا ہے؟ آپ ﷺ نے فرمایا: ”مرد کا نطفہ سفید اور گاڑھا ہوتا ہے اور عورت کا نطفہ سرخ اور پتلا، پس دونوں میں سے جو نطفہ غالب آ جائے بچہ اسی کے مشابہ ہوتا ہے۔“ میں نے عرض کیا: یا رسول اللہ! جنتی لوگ جنت میں داخل ہو کر کیا کھائیں گے؟ آپ ﷺ نے فرمایا: ”مچھلی کے جگر کا اضافی حصہ۔“ میں نے عرض کیا: یا رسول اللہ! مجھے قیامت کی نشانیوں کے بارے میں بتائیے۔ آپ ﷺ نے فرمایا: ”ایک آگ جو مشرق سے نکلے گی اور لوگوں کو ان کے حشر کی طرف ہانک کر لے جائے گی۔“ (یہ سن کر) سیدنا عبداللہ بن سلام رضی اللہ عنہ نے کہا: میں گواہی دیتا ہوں کہ آپ اللہ کے نبی ہیں۔