المعجم الكبير للطبراني

سیدنا عبداللہ بن عمر رضی اللہ عنہما کہتے ہیں: ایک بار رسول اللہ ﷺ بیٹھے تھے اور سیدہ عائشہ رضی اللہ عنہا آپ ﷺ کے پیچھے تھیں کہ سیدنا ابوبکر رضی اللہ عنہ نے اجازت مانگی تو وہ اندر آ گئے، پھر سیدنا عمر رضی اللہ عنہ نے اجازت مانگی تو وہ اندر آ گئے، پھر سعد بن مالک رضی اللہ عنہ اجازت لے کر اندر آئے، پھر سیدنا عثمان بن عفان رضی اللہ عنہ نے اجازت مانگی، اور رسول اللہ ﷺ اس وقت گفتگو فرما رہے تھے جبکہ آپ ﷺ کا گھٹنا کھلا ہوا تھا، تو جب عثمان رضی اللہ عنہ نے اجازت مانگی تو آپ ﷺ نے اپنا کپڑا اپنے گھٹنے پر پھیلا لیا اور اپنی زوجہ سے فرمایا: پیچھے ہو جاؤ۔ پھر وہ سب کچھ دیر گفتگو کرتے رہے، پھر چلے گئے۔ سیدہ عائشہ رضی اللہ عنہا نے عرض کیا: یا نبی اللہ! میرے والد اور ان کے ساتھی اندر آئے تو آپ ﷺ نے اپنا کپڑا اپنے گھٹنے سے درست نہ کیا، اور نہ مجھے اپنے سے دور کیا؟ اس پر نبی کریم ﷺ نے فرمایا: ”اے عائشہ! کیا میں اس شخص سے حیا نہ کروں جس سے فرشتے حیا کرتے ہیں؟ اس ذات کی قسم جس کے ہاتھ میں رسول اللہ ﷺ کی جان ہے، فرشتے عثمان سے ایسے ہی حیا کرتے ہیں جیسے وہ اللہ اور اس کے رسول سے حیا کرتے ہیں، اور اگر وہ اس وقت آتے جب تم میرے قریب ہوتیں تو نہ گفتگو کرتے اور نہ اپنا سر اٹھاتے یہاں تک کہ تم چلی جاتیں۔“

سیدنا عبداللہ بن عمر رضی اللہ عنہما سے روایت ہے کہ نبی کریم ﷺ ایک باغ میں تھے کہ ابوبکر رضی اللہ عنہ نے اندر آنے کی اجازت مانگی، تو آپ ﷺ نے فرمایا: ”اسے اجازت دے دو اور اسے جنت کی خوشخبری دے دو۔“ پھر عمر رضی اللہ عنہ نے اجازت مانگی تو آپ ﷺ نے فرمایا: ”اسے اجازت دے دو اور اسے جنت اور شہادت کی خوشخبری دے دو۔“ پھر عثمان رضی اللہ عنہ نے اجازت مانگی تو آپ ﷺ نے فرمایا: ”اسے اجازت دے دو اور اسے جنت اور شہادت کی خوشخبری دے دو۔“