المعجم الكبير للطبراني

سیدنا سہل بن سعد رضی اللہ عنہ سے روایت ہے کہ رسول اللہ ﷺ نے فرمایا: ”جس نے اللہ کے لیے کسی غلام کو آزاد کیا تو اللہ تعالیٰ اس کے ہر عضو کے بدلے اس آزاد کرنے والے کا ایک عضو آگ سے آزاد فرمائے گا۔“

سیدنا سہل بن سعد رضی اللہ عنہ سے روایت ہے کہ نبی کریم ﷺ ذوالحلیفہ سے گزرے تو دیکھا کہ ایک بکری مری پڑی ہے اور اپنی ٹانگ اوپر اٹھائے ہوئے ہے۔ آپ ﷺ نے فرمایا: ”تم دیکھتے ہو کہ یہ بکری اپنے مالکوں کے نزدیک کتنی حقیر ہے؟“ صحابہ نے عرض کیا: جی ہاں۔ آپ ﷺ نے فرمایا: ”اس ذات کی قسم جس کے ہاتھ میں میری جان ہے! دنیا اللہ کے نزدیک اس بکری سے بھی زیادہ حقیر ہے جتنی یہ اپنے مالکوں کے نزدیک حقیر ہے، اور اگر دنیا اللہ کے نزدیک مچھر کے پر برابر بھی وزن رکھتی تو وہ کسی کافر کو اس میں سے پانی کا ایک گھونٹ بھی نہ پلاتا۔“