المعجم الكبير للطبراني

سیدنا عمر رضی اللہ عنہ سیدنا بلال رضی اللہ عنہ سے روایت کرتے ہیں، بلال رضی اللہ عنہ کہتے ہیں: رسول اللہ ﷺ کے لیے میرے پاس کھجور رکھی تھی، وہ خراب ہو گئی، تو میں نے اسے بازار میں لے جا کر ایک صاع کے بدلے دو صاع میں بیچ دیا، پھر جب میں وہ (نئی کھجور) آپ ﷺ کے پاس لایا تو آپ ﷺ نے فرمایا: ”یہ کیا ہے اے بلال؟“ میں نے آپ کو بتایا، تو آپ ﷺ نے فرمایا: ”ٹھہرو، یہ بیع واپس کرو، پھر کھجور کو سونے، چاندی یا گندم کے بدلے بیچو، پھر اس سے کھجور خریدو“ پھر رسول اللہ ﷺ نے فرمایا: ”کھجور کھجور کے بدلے برابر برابر، گندم گندم کے بدلے برابر برابر، سونا سونے کے بدلے وزن میں برابر، اور چاندی چاندی کے بدلے وزن میں برابر (بیچی جائے)، اور جب دونوں قسمیں مختلف ہوں تو ایک کو دس کے بدلے بیچنے میں کوئی حرج نہیں۔“

سعید بن مسیب سیدنا بلال رضی اللہ عنہ سے روایت کرتے ہیں، بلال رضی اللہ عنہ کہتے ہیں: میرے پاس گھٹیا کھجور تھی، تو میں نے اس کے بدلے بازار سے اس سے بہتر کھجور اس کی آدھی مقدار میں خرید لی، پھر میں وہ نبی کریم ﷺ کے پاس لے آیا، تو آپ ﷺ نے فرمایا: ”میں نے آج اس سے بہتر کھجور نہیں دیکھی، یہ تمہیں کہاں سے ملی اے بلال؟“ میں نے آپ کو بتایا کہ میں نے کیا کیا تھا، تو آپ ﷺ نے فرمایا: ”جاؤ، یہ اس کے مالک کو واپس کر دو اور اپنی (پہلی) کھجور لے لو، پھر اسے گندم یا جَو کے بدلے بیچو، پھر اس سے یہ کھجور خریدو، پھر میرے پاس لے آؤ“ میں نے ایسا ہی کیا، پھر رسول اللہ ﷺ نے فرمایا: ”کھجور کھجور کے بدلے برابر برابر، گندم گندم کے بدلے برابر برابر، جَو جَو کے بدلے برابر برابر، نمک نمک کے بدلے برابر برابر، سونا سونے کے بدلے برابر برابر وزن میں، اور چاندی چاندی کے بدلے برابر برابر وزن میں، اور جو کچھ زیادہ ہو وہ سود ہے۔“