المطالب العالية بزوائد المسانيد الثمانية

سیدنا عبداللہ بن بحینہ رضی اللہ عنہ سے روایت ہے کہ رسول اللہ ﷺ اپنے صحابہ کے درمیان تشریف فرما تھے کہ اچانک آپ ﷺ نے تین مرتبہ یہ دعا فرمائی: «صَلَّى اللهُ عَلَى تِلْكَ الْمَقْبَرَةِ» ”اللہ تعالیٰ اس قبرستان پر اپنی رحمتیں نازل فرمائے۔“ اس وقت صحابہ کرام میں سے کسی نے آپ ﷺ سے یہ دریافت نہ کیا کہ وہ کون سا قبرستان ہے؟ اور نہ ہی آپ ﷺ نے خود ان کے سامنے اس کا نام واضح فرمایا۔ پھر آپ ﷺ کے صحابہ میں سے ایک صحابی نبی کریم ﷺ کی ایک زوجہ مطہرہ کے پاس حاضر ہوئے، جن کے متعلق راوی کا گمان ہے کہ وہ سیدہ عائشہ رضی اللہ عنہا تھیں، (اور انہیں اس واقعے کی خبر دی)؛ چنانچہ جب رسول اللہ ﷺ ان کے پاس تشریف لائے تو انہوں نے آپ ﷺ سے اس قبرستان کے بارے میں سوال کیا، جس پر آپ ﷺ نے ارشاد فرمایا: ”وہ عسقلان کا ایک قبرستان ہے۔“
اس حدیث کی تخریج امام ابو یعلیٰ نے اپنی مسند میں کی ہے۔

سیدنا عمر بن خطاب رضی اللہ عنہ سے روایت ہے کہ میں نے رسول اللہ ﷺ کو ایک دن ایک قبرستان والوں کا تذکرہ کرتے ہوئے سنا، آپ ﷺ نے ان کے حق میں دعا فرمائی اور کثرت سے ان کے لیے دعائے مغفرت کی، پھر جب آپ ﷺ سے ان کے متعلق دریافت کیا گیا تو آپ ﷺ نے ارشاد فرمایا: ”یہ عسقلان کے قبرستان کے مکین ہیں، انہیں جنت کی طرف اس طرح (بڑے اعزاز و اکرام کے ساتھ) لے جایا جائے گا جس طرح دلہن کو اس کے شوہر کی طرف رخصت کیا جاتا ہے“۔
یہ روایت موضوع (من گھڑت) ہے، اس کی سند میں بشیر بن میمون نامی راوی کذاب اور متروک الحدیث ہے (تخریج: المعجم الکبیر للطبرانی: 12/10، موضوعات ابن الجوزی: 2/52)۔