المطالب العالية بزوائد المسانيد الثمانية

سیدنا ابوہریرہ رضی اللہ عنہ سے روایت ہے کہ ایک شخص نبی کریم ﷺ کی خدمتِ عالیہ میں حاضر ہوا اور عرض کی: ”اے اللہ کے رسول! میں نے اپنی بیٹی کی شادی کر دی ہے اور میری دلی تمنا ہے کہ آپ کسی چیز کے ذریعے میری مدد فرمائیں“، آپ ﷺ نے ارشاد فرمایا: ”اس وقت میرے پاس (دینے کو) کچھ نہیں ہے، لیکن تم ایسا کرنا کہ کل صبح میرے پاس چوڑے منہ والی ایک شیشی اور درخت کی ایک ٹہنی لے کر آنا، اور تمہارے اور میرے درمیان یہ طے ہے کہ تم (آ کر) دروازے کے ایک گوشے کو کھٹکھٹانا۔“ راوی بیان کرتے ہیں کہ پھر وہ شخص آپ ﷺ کی خدمت میں چوڑے منہ والی شیشی اور درخت کی ٹہنی لے کر حاضر ہوا، تو آپ ﷺ اپنے بازوؤں مبارک سے پسینہ مبارک پونچھ کر اس شیشی میں ڈالنے لگے یہاں تک کہ وہ شیشی بھر گئی، پھر آپ ﷺ نے ارشاد فرمایا: ”اسے لے جاؤ اور اپنی بیٹی کو حکم دو کہ وہ اس ٹہنی کو شیشی میں ڈبو کر اسے بطور خوشبو استعمال کرے“، راوی کہتے ہیں کہ وہ لڑکی جب بھی وہ خوشبو لگاتی تھی تو اہل مدینہ اس کی خوشبو محسوس کرتے تھے، چنانچہ ان کے گھرانوں کا نام ہی ”خوشبو والے گھر“ یعنی «بُيُوتَ الْمُطَيَّبِينَ» پڑ گیا۔
اس حدیث کو امام ابو یعلیٰ نے اپنی مسند (حدیث: 3833) میں روایت کیا ہے، اس کی سند میں حلبس بن غالب نامی راوی کی وجہ سے کلام ہے، البتہ رسول اللہ ﷺ کے پسینہ مبارک کا معطر ہونا اور اسے تبرک کے طور پر استعمال کرنا صحیحین کی دیگر مستند روایات سے ثابت ہے۔

سیدنا انس رضی اللہ عنہ سے روایت ہے کہ رسول اللہ ﷺ جب مدینہ منورہ کے راستوں میں سے کسی راستے سے گزرتے تو آپ ﷺ کے جسدِ اطہر سے کستوری جیسی نفیس خوشبو مہکنے لگتی تھی، جس کی وجہ سے لوگ (خوشبو محسوس کر کے) پکار اٹھتے تھے کہ: ”رسول اللہ ﷺ ابھی یہاں سے تشریف لے گئے ہیں۔“
اسے امام بزار نے اسی سند سے روایت کیا ہے۔