المطالب العالية بزوائد المسانيد الثمانية

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے ارشاد فرمایا: ”تم میں سے ہر شخص کو چاہیے کہ وہ ہر (تکلیف دہ) چیز پر کلمہ استرجاع یعنی «إِنَّا لِلَّهِ وَإِنَّا إِلَيْهِ رَاجِعُونَ» ”بیشک ہم اللہ ہی کے ہیں اور ہمیں اسی کی طرف لوٹ کر جانا ہے“ پڑھے، یہاں تک کہ اپنے جوتے کے تسمے کے ٹوٹ جانے پر بھی، کیونکہ یہ بھی مصائب و پریشانیوں میں سے ہے۔“
ایک اور سند میں یہ الفاظ مروی ہیں کہ آپ ﷺ نے فرمایا: ”جب تم میں سے کسی کے جوتے کا تسمہ ٹوٹ جائے تو وہ کلمہ استرجاع پڑھے کیونکہ یہ بھی مصیبتوں میں سے ہے، اور تم اللہ عزوجل ہی سے سوال کیا کرو یہاں تک کہ جوتے کے تسمے کا بھی، کیونکہ حقیقت یہ ہے کہ اگر وہ (اللہ تعالیٰ) اسے آسان و میسر نہ کرے تو وہ حاصل نہیں ہو سکتا۔“
امام خالد نے بھی یحییٰ بن عبید اللہ کے واسطے سے اسی کی مثل روایت کیا ہے۔

سیدہ عائشہ رضی اللہ عنہا سے روایت ہے کہ انہوں نے فرمایا: ”تم اللہ عزوجل سے ہر چھوٹی بڑی چیز کا سوال کیا کرو، یہاں تک کہ (اپنے) جوتے کے تسمے کا بھی (سوال کر لیا کرو)؛ کیونکہ حقیقت یہ ہے کہ اللہ تعالیٰ اگر اسے بھی آسان اور سہل نہ فرمائے تو وہ کبھی میسر اور ممکن نہیں ہو سکتا۔“
اس حدیث کو امام ابو یعلیٰ نے اپنی مسند میں روایت کیا ہے، جس کے تمام راوی ثقہ ہیں، اور یہ روایت اس امر پر دلالت کرتی ہے کہ انسان اپنی ہر حاجت میں کلی طور پر اللہ تعالیٰ کی مشیت اور اس کی توفیق کا محتاج ہے۔