المطالب العالية بزوائد المسانيد الثمانية

قسامہ بن زہیر رحمہ اللہ سے روایت ہے کہ انہوں نے فرمایا: ”اپنے دلوں کو (راحت و سکون پہنچا کر) تازگی اور فرحت بخشا کرو تاکہ وہ ذکر و نصیحت کو کماحقہ سمجھ سکیں اور اسے یاد رکھ سکیں۔“
[تخریج: اسے ابن المبارک نے الزہد (1105) میں روایت کیا ہے اور اس کی سند صحیح ہے۔]

سیدنا حسن بصری رحمہ اللہ سے روایت ہے کہ انہوں نے فرمایا: ”اپنے ان دلوں کو (وعظ و نصیحت اور ذکرِ الٰہی کے ذریعے) جِلا بخشتے اور انہیں تروتازہ رکھا کرو کیونکہ یہ بہت جلد زنگ آلود ہو جاتے اور ان پر غفلت کی گرد جم جاتی ہے۔“
[أخرجه ابن المبارك في الزهد: 147، وهناد بن السري في الزهد: 588]

سیدنا عبداللہ بن عباس رضی اللہ عنہما سے روایت ہے کہ نبی کریم ﷺ کی مجلسِ اقدس میں قرآنِ مجید کی تلاوت کی گئی اور کچھ اشعار بھی (ترنم کے ساتھ) سنائے گئے، تو (تعجب سے) عرض کیا گیا: اے اللہ کے رسول ﷺ! کیا ایک ہی مجلس میں قرآن اور شعر دونوں یکجا ہو سکتے ہیں؟ آپ ﷺ نے ارشاد فرمایا: ”ہاں“۔
امام ابو یعلیٰ نے اسے اپنی مسند میں روایت کیا ہے، اس کی سند میں محمد بن سائب الکلبی راوی متروک ہے، تاہم نبی کریم ﷺ کا مجلس میں اشعار سننا دیگر صحیح احادیث سے ثابت ہے۔