المطالب العالية بزوائد المسانيد الثمانية

سیدنا انس رضی اللہ عنہ سے روایت ہے کہ رسول اللہ ﷺ نے ارشاد فرمایا: ”«التَّأَنِّي مِنَ اللهِ تَعَالَى» ”غور و فکر اور وقار کے ساتھ کام کرنا اللہ تعالیٰ کی طرف سے (پسندیدہ صفت) ہے“، «وَالْعَجَلَةُ مِنَ الشَّيْطَانِ» ”اور جلد بازی شیطان کی جانب سے ہے“، «مَا شَيْءٌ أَكْثَرَ مَعَاذِيرَ مِنَ اللهِ عَزَّ وَجَلَّ» ”اور اللہ عزوجل سے بڑھ کر بندوں کے عذر قبول کرنے والا کوئی نہیں“، «وَمَا مِنْ شَيْءٍ أَحَبُّ إِلَى اللهِ تَعَالَى مِنَ الْحَمْدِ» ”اور اللہ تعالیٰ کے نزدیک اپنی حمد و ستائش سے بڑھ کر کوئی چیز زیادہ محبوب نہیں ہے“۔“
امام ابوبکر بن ابی شیبہ، احمد بن منیع، حارث اور ابویعلیٰ نے اسے یونس بن محمد، حسن بن موسیٰ اور ابوالنضر کے واسطے سے لیث بن سعد، یزید بن ابی حبیب اور سنان بن سعد کے طریق سے روایت کیا ہے۔

قبیلہ بَلی کے ایک صحابی رضی اللہ عنہ سے روایت ہے، وہ بیان کرتے ہیں کہ میں اپنے والد کے ہمراہ نبی کریم ﷺ کی خدمتِ اقدس میں حاضر ہوا، تو آپ ﷺ نے مجھ سے ہٹ کر میرے والد سے تخلیہ میں بات چیت فرمائی؛ میں نے عرض کیا: اے ابا جان! رسول اللہ ﷺ نے آپ سے کیا ارشاد فرمایا ہے؟ انہوں نے جواب دیا کہ آپ ﷺ نے مجھ سے ارشاد فرمایا: ”جب تم کسی کام کا ارادہ کرو تو سنجیدگی، بردباری اور اطمینان کو لازم پکڑو، یہاں تک کہ اللہ تعالیٰ تمہارے لیے تمہارے اس معاملے سے نکلنے کی کوئی راہ اور سبیل پیدا فرما دے۔“
امام ابو یعلیٰ نے اس کی روایت احمد بن ابراہیم الدورقی، ابومعاویہ کے واسطے سے کی ہے اور اس کے آخر میں یہ الفاظ نقل کیے ہیں: ”یہاں تک کہ اللہ تعالیٰ تمہارے معاملے میں کشادگی اور فلاح کی صورت پیدا فرما دے۔“
امام حارث نے اس کی روایت عبداللہ بن محمد سے، انہوں نے مبارک بن فضالہ سے اور انہوں نے سعد بن سعید سے اسی کے مانند بیان کی ہے۔