مجمع الزوائد ومنبع الفوائد

سیدنا سعید بن عامر بن حدیم رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اگر اہل جنت کی خواتین میں سے کوئی عورت ، اہل زمین کی طرف جھانک لے تو تمام روئے زمین کو مشک کی خوشبو سے بھر دے گی ، اور وہ سورج اور چاند کی روشنی کو ماند کر دے گی ۔ “
یہ روایت امام طبرانی نے اس سے زیادہ طویل روایت کے طور پر نقل کی ہے ، جو اس سے پہلے نفلی صدقہ کرنے سے متعلق باب میں گزر چکی ہے ،
یہ روایت امام بزار نے بہت زیادہ اختصار کے ساتھ نقل کی ہے ان دونوں کی سند میں ، ایک راوی حسن بن عنبسہ وراق ہے اور میں اس سے واقف نہیں ہوں ، اس روایت کے بقیہ رجال ثقہ ہیں اور ان میں سے بعض میں ضعف پایا جاتا ہے ۔

سیدہ ام سلمہ رضی اللہ عنہا جو نبی اکرم صلی اللہ علیہ وسلم کی زوجہ محترمہ ہیں ، وہ بیان کرتی ہیں : میں نے عرض کی : یا رسول اللہ ! آپ مجھے اللہ تعالیٰ کے اس فرمان کے بارے میں بتائیے : ” حورعین “ نبی اکرم صلی اللہ علیہ وسلم نے فرمایا : وہ گوری چٹی حوریں ہوں گی ، بڑی بڑی آنکھوں والی ہونگی اور حور کی پلکیں باز کے پر جتنی ہونگی ، میں نے عرض کی یا رسول اللہ ! آپ اللہ تعالیٰ کے اس فرمان کے بارے میں مجھے بتائیے : ” یاقوت اور مرجان ہیں ۔ “ نبی اکرم صلی اللہ علیہ وسلم نے فرمایا : ان کی نفاست ، اس موتی کی مانند ہو گی جو صدف میں ہوتا ہے ، جسے ہاتھ نہ لگا ہو ، میں نے عرض کی : یا رسول اللہ ! آپ مجھے اللہ تعالیٰ کے اس فرمان کے بارے میں بتائیے : ” ان میں خوب سیرت اور خوبصورت چہروں والی خواتین ہوں گی “ نبی اکرم صلی اللہ علیہ وسلم نے فرمایا : ان کے اخلاق بہتر ہوں گے اور چہرے خوبصورت ہوں گے ۔ میں نے عرض کی : یا رسول اللہ ! آپ مجھے اللہ تعالیٰ کے اس فرمان کے بارے میں بتائیے : ” گویا کہ وہ چھپے ہوئے انڈے ہیں ۔ “ نبی اکرم صلی اللہ علیہ وسلم نے فرمایا : وہ اتنی باریک ہوں گی ، جس طرح وہ جلد باریک ہوتی ہے ، جو انڈے کے اندر ہوتی ہے اور چھلکے کے ساتھ ہوتی ہے ۔ میں نے عرض کی : یا رسول اللہ ! آپ مجھے اللہ تعالیٰ کے اس فرمان کے بارے میں بتائیے : ” وہ محبت کرنے والی اور ایک ہی عمر کی ہونگی “ نبی اکرم صلی اللہ علیہ وسلم نے فرمایا : یہ وہ خواتین ہیں ، جن کا دنیا میں انتقال بڑھاپے کے عالم میں ہوا ہو گا ، جبکہ وہ ایسی ہوں گی کہ ان کی آنکھوں میں میل ہو گا اور بال کھچڑی ہوں گے اور پھر ان کے بڑھاپے کے بعد ، اللہ تعالیٰ انہیں یوں بنا دے گا کہ انہیں کنواری اور دلکش دلربا بنا دے گا ، ان سب کی عمریں ایک جتنی ہونگی ۔ میں نے عرض کی : یا رسول اللہ ! کیا دنیا کی خواتین زیادہ فضیلت رکھتی ہیں ؟ یا حورعین زیادہ فضیلت رکھتی ہیں ؟ نبی اکرم صلی اللہ علیہ وسلم نے فرمایا : دنیا کی خواتین ، حورعین سے زیادہ فضیلت رکھتی ہیں ، جس طرح کی فضیلت ( لباس کے ) بیرونی حصے کو اندرونی حصے پر حاصل ہوتی ہے ، میں نے عرض کی : یا رسول اللہ اس کی وجہ کیا ہے ؟ نبی اکرم صلی اللہ علیہ وسلم نے فرمایا : ان خواتین کی نماز ، ان کا روزہ اور ان کا اللہ تعالیٰ کی عبادت کرنا ، اللہ تعالیٰ ان کے چہروں کو نور عطا کرے گا ، ان کے جسموں پر ریشمی کپڑے عطا کرے گا جو مختلف رنگوں کے ہوں گے ، زیور سبز رنگ کے ہوں گے ، انگیٹھیاں موتیوں کی ہوں گی ، کنگھیاں سونے کی ہوں گی ، وہ کہیں گی : خبردار ! ہم ہمیشہ رہیں گی ، ہمیں کبھی موت نہیں آئے گی ۔ ہم نعمتوں والی ہیں ، ہم کبھی غمگین نہیں ہوں گی ( یا پریشانی کا شکار نہیں ہوں گی ) ہم مقیم رہنے والی ہیں ، ہم کبھی بوڑھی نہیں ہوں گی ، ہم راضی رہنے والی ہیں ، ہم کبھی ناراض نہیں ہوں گی ، اس شخص کے لئے مبارکباد ہے ، جس کے لئے ہم ہوں گی ، اور وہ ہمارے لئے ہو گا ۔ میں نے عرض کی : یا رسول اللہ ! دنیا میں کوئی عورت ، دو یا تین ، یا چار شادیاں کرتی ہے ، پھر وہ انتقال کر کے جنت میں چلی جاتی ہے ، اور وہ افراد بھی جنت میں چلے جاتے ہیں ، جن کے ساتھ اُس عورت نے ( دنیا میں ) شادی کی تھی ، تو نبی اکرم صلی اللہ علیہ وسلم نے فرمایا : اے ام سلمہ ! اس عورت کو اختیار دیا جائے گا ، تو وہ اس شخص کو اختیار کرے گی ، جس نے اس کے ساتھ ( دنیا میں ) سب سے اچھا سلوک کیا ہو گا ، وہ یہ کہے گی : اے میرے پروردگار ! دنیا کی زندگی میں ، یہ شخص میرے ساتھ سب سے اچھے طریقے سے پیش آیا تھا ( نبی اکرم صلی اللہ علیہ وسلم نے ارشاد فرمایا : ) ” اے ام سلمہ ! اچھے اخلاق ، دنیا اور آخرت کی ساری بھلائی لے گئے ہیں ۔ “
یہ روایت امام طبرانی نے معجم اوسط میں نقل کی ہے اور معجم کبیر میں اس کی مانند نقل کی ہے اس سے پہلے معجم کبیر کا طریق سورہ رحمان سے متعلق باب میں گزر چکا ہے ، ان دونوں کی سند میں ایک راوی سلیمان بن ابوکریمہ ہے اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ بات بتائی کہ سیدنا جبرائیل علیہ السلام نے مجھے یہ بات بتائی ہے : وہ بیان کرتے ہیں : آدمی حور کے پاس جائے گا ، تو وہ اس سے گلے مل کر اور مصافحہ کر کے اس کا استقبال کرے گی ، اس کی پوروں کا عالم کیا ہو گا ؟ کہ اگر وہ اس پور کا کچھ حصہ ظاہر کر دے ، تو اس کی روشنی ، سورج اور چاند کی روشنی پر غالب آ جائے ، اور اگر اس کے بال کا کچھ حصہ ظاہر ہو جائے تو وہ مشرق و مغرب کے درمیان ساری جگہ کو خوشبو کے ذریعے بھر دے ، وہ شخص اس حور کے ساتھ اپنے پلنگ پر بیٹھا ہوا ہو گا ، کہ اسی دوران اسے اوپر کی طرف نور محسوس ہو گا ، تو وہ یہ گمان کرے گا : شاید اللہ تعالیٰ نے اپنی مخلوق کی طرف جھانکا ہے ، تو وہ اصل میں ایک اور حور ہو گی ، جو اسے پکار کر یہ کہے گی : اے اللہ کے دوست ! کیا آپ ہمیں خدمت کا موقع نہیں دیں گے ؟ وہ دریافت کرے گا : تم کون ہو ؟ اے خاتون ! وہ جواب دے گی : میں ان حوروں میں سے ہوں ، جن کے بارے میں اللہ تعالیٰ نے فرمایا ہے : ” اور ہمارے پاس مزید بھی ہے ۔ “ تو وہ شخص پہلی والی حور کے پاس سے اُٹھ کر دوسری کے پاس جائے گا ، اور دوسری کے پاس وہ خوبصورتی ہو گی ، جو پہلی والی کے پاس نہیں ہو گی ، پھر وہ دوسری والی کے ساتھ ٹیک لگا کر بیٹھا ہوا ہو گا کہ ایک اور حور اسے پکار کر کہے گی : اے اللہ کے دوست ! کیا آپ ہمیں خدمت کا موقع نہیں دیں گے ؟ تو وہ جواب دے گا : اے خاتون ! تم کون ہو ؟ وہ جواب دے گی : میں ان حوروں میں سے ہوں جن کے بارے میں اللہ تعالیٰ نے یہ فرمایا ہے : ” کوئی شخص یہ نہیں جانتا کہ اس کے لئے ، آنکھوں کی ٹھنڈک کے لئے کیا پوشیدہ رکھا گیا ہے ، جو اس چیز کی جزاء ہے ، جو وہ عمل کیا کرتے تھے ۔ “ تو وہ ایک جنتی بیوی سے دوسری بیوی کی طرف جاتا رہے گا ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی سعید بن زربی ہے اور وہ ضعیف ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر اہل جنت کی خواتین میں سے کوئی ایک زمین کی طرف جھانک لے ، تو وہ ان دونوں کے درمیان موجود جگہ کو خوشبو سے بھر دے گی ، اور ان دونوں کے درمیان موجود جگہ کو روشنی سے بھر دے گی اور اس کے سر پر موجود اُس کا تاج دنیا اور اس میں موجود ( ساری چیزوں ) سے بہتر ہے ۔ “
یہ روایت امام طبرانی نے معجم اوسط میں نقل کی ہے اور اس کی سند عمدہ ہے ۔

سیدنا عبداللہ بن مسعود رضی اللہ عنہ فرماتے ہیں : حورعین سے تعلق رکھنے والی عورت کی پنڈلی کا گودا ، گوشت اور ہڈی کے پار سے بھی نظر آ جائے گا ، جو ستر حلوں کے نیچے ہو گی ، جس طرح سفید شیشے میں موجود سرخ مشروب میں سے نظر آ جاتا ہے ۔
یہ روایت امام طبرانی نے نقل کی ہے اور اس کی سند میں دو افراد کا ذکر ساقط ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی بندہ جنت میں داخل ہو گا ، جب وہ بیٹھے گا تو اس کے سرہانے کی طرف اور اس کے پائینتی کی طرف دو ، دو حورعین موجود ہو گی ، جو اتنی عمدہ آواز میں گائیں گی ، جو سب سے زیادہ خوبصورت آواز ، انسانوں یا جنات نے سنی ہو ، لیکن وہ شیطان کے مزامیر نہیں ہوں گے ، بلکہ اللہ تعالیٰ کی حمد اور اس کی تقدیس ہو گی ۔ “
یہ روایت امام طبرانی نے نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جنت کی بیویاں اپنے شوہروں کے لیے ایسی آواز میں گائیں گی ، جو سب سے زیادہ خوبصورت آواز کسی نے کبھی بھی سنی ہو ، وہ جو گائیں گی اُن میں یہ کلمات بھی ہیں : ” ہم خوبصورت چہروں والی ہیں اور معزز لوگوں کی بیویاں ہیں ، جو آنکھوں کی ٹھنڈک کے ہمراہ دیکھتی ہیں ۔ “ جو وہ گائیں گی ، اُن میں یہ کلمات بھی ہوں گے : ” ہم ہمیشہ رہنے والی ہیں ، جنہیں موت نہیں آئے گی ، ہم امان میں رہنے والی ہیں ، جو خوف زدہ نہیں ہو گی ، ہم مقیم رہنے والی ہیں ، جو رخصت نہیں ہوں گی ۔ “
یہ روایت امام طبرانی نے معجم صغیر اور معجم اوسط میں نقل کی ہے اور اس کے رجال صحیح کے رجال ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنت میں حور گائے گی اور یہ کہے گی : ” ہم خوبصورت حوریں ہیں ، جو معزز شوہروں کو تحفے کے طور پر دی گئی ہیں ۔ “
یہ روایت امام طبرانی نے معجم اوسط میں نقل کی ہے اور اس کے رجال کی توثیق کی گئی ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک آدمی جنت میں ٹیک لگا کے بیٹھے گا اور وہاں سے اُٹھنے سے پہلے ستر سال تک بیٹھا رہے گا ، پھر اس کی بیوی اس کے پاس آئے گی اور اس کے کندھے پر ہاتھ رکھے گی ، وہ شخص اس عورت کے رخسار میں اپنے چہرے کو دیکھ لے گا ، جو آئینے سے زیادہ صاف ہو گا ، اس عورت کے جسم پر موجود سب سے ہلکا موتی بھی ایسا ہو گا کہ وہ مشرق اور مغرب کے درمیان موجود ساری جگہ کو روشن کر دے ، وہ عورت اُس شخص کو سلام کرے گی ، وہ سلام کا جواب دے گا اور اس سے دریافت کرے گا : تم کون ہو ؟ وہ جواب دے گی : میں ” مزید “ میں سے ہوں ، عورت کے جسم پر ستر کپڑے ہوں گے ، جن میں سے سب سے ہلکا طوبی میں سے نعمان کی مانند ہو گا ، وہ شخص نگاہ اٹھا کر اس کی طرف دیکھے گا تو ان کپڑوں کے پار سے اس کی پنڈلی کا گودا بھی اسے نظر آ جائے گا اور اس عورت کے سر پر تاج ہو گا ، جس کا سب سے ہلکا موتی بھی ، مشرق اور مغرب کے درمیان موجود ساری جگہ کو روشن کر سکے گا ۔ “
یہ روایت امام أحمد اور امام ابویعلیٰ نے نقل کی ہے اور ان دونوں کی سند حسن ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے حورعین کو زعفران سے پیدا کیا ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے اور ان دونوں کی سند میں ضعیف راوی ہیں ۔