مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جہنم میں اہل جہنم اتنے بڑے ہوں گے کہ ان میں سے کسی ایک کے کان کی لو سے لے کر ، اُس کے گردن تک کے درمیان سات سو سال کی مسافت کا فاصلہ ہو گا اور اس کی جلد کا حجم ستر ذراع ہو گا اور اس کی جلد اُحد پہاڑ کی مانند ہو گی ۔ “
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ، ان کی اسانید میں ایک راوی ابویحیی قتات ہے اور وہ ضعیف ہے اور اس کے بارے میں اختلاف پایا جاتا ہے ، اس روایت کے بقیہ رجال اس سے زیادہ ثقہ ہیں ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جہنم میں کافر کی سرین ، تین دن کی مسافت جتنی ہو گی اور اس کی ہر ایک داڑھ اُحد پہاڑ کی مانند ہو گی اور اس کا زانو ” ورقان “ نامی پہاڑ کی مانند ہو گا اور اس کے گوشت اور اس کی ہڈیوں کے علاوہ صرف اس کی جلد چالیس ذراع کی ہو گی ۔ “
یہ روایت امام أحمد اور امام ابویعلیٰ نے نقل کی ہے ، اس کی سند میں ایک راوی ابن لہیعہ ہے جس کے ضعیف ہونے کے باوجود اس کی توثیق کی گئی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن کافر کی داڑھ احد پہاڑ کی مانند ہو گی اور اس کی جلد کی چوڑائی ستر ذراع ہو گی اور اس کا زانو ورقان پہاڑ کی مانند ہو گا اور جہنم میں اس کا مقعد ( یعنی اس کی سرین یا اس کے بیٹھنے کی جگہ ) اتنی ہو گی ، جتنا یہاں سے لے کر ” ربذہ “ کے درمیان کا فاصلہ ہے ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی نے نقل کی ہے تاہم انہوں نے یہ الفاظ نقل کئے ہیں : ” اس کی جلد کی موٹائی چالیس ذراع ہو گی ۔ “ جبکہ یہاں یہ الفاظ ہیں : ” ستر ذراع ہو گی ۔ “
یہ روایت امام أحمد نے نقل کی ہے اور اس روایت کے رجال صحیح کے رجال ہیں صرف ربعی بن ابراہیم کا معاملہ مختلف ہے اور وہ ثقہ ہے ۔

یزید بن حیان تمیمی بیان کرتے ہیں : میں ، حصین بن سبرہ اور عمر بن اسلم ، سیدنا زید بن ارقم رضی اللہ عنہ کے پاس گئے ، اس محفل کے دوران سیدنا زید بن ارقم رضی اللہ عنہ نے ہمیں یہ حدیث بیان کی : ” اہل جہنم میں سے کوئی شخص جہنم کے لیے اتنا بڑا ہو گا کہ اُس کی داڑھوں میں سے کوئی ایک داڑھ اُحد پہاڑ کی مانند ہو گی ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت امام أحمد نے ایک طویل حدیث کے ضمن میں نقل کی ہے اور اس کے رجال صحیح کے رجال ہیں ۔

مجاہد بیان کرتے ہیں : سیدنا عبداللہ بن عباس رضی اللہ عنہما نے فرمایا : کیا تم جانتے ہو ؟ جہنم کی وسعت کتنی ہے ؟ میں نے جواب دیا : جی نہیں ! انہوں نے فرمایا : جی ہاں ! اللہ کی قسم ! تم یہ نہیں جانتے کہ اہل جہنم کے کانوں کی لو سے لے کر اس کی گردن کے درمیان کا فاصلہ ستر برس کا ہو گا اور اس میں پیپ اور خون کی وادیاں بہہ رہی ہوں گی ، میں نے کہا: کیا نہریں ؟ انہوں نے فرمایا : جی نہیں ! بلکہ وادیاں ۔ ۔ ۔ ۔ ۔ ۔ اس کے بعد انہوں نے پوری حدیث ذکر کی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف عنبسہ بن سعید کا معاملہ مختلف ہے اور وہ ثقہ ہے ۔

سیدنا ثوبان رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کیا گیا ، تو آپ صلی اللہ علیہ وسلم نے ارشاد فرمایا : ” کافر کی داڑھ اُحد پہاڑ کی مانند ہو گی اور اس کی جلد کی موٹائی چالیس ذراع ہو گی ، جو جبار ( یعنی اللہ تعالیٰ ) کے ذراع کے حساب سے ہو گی ۔ “
یہ روایت امام بزار نے نقل کی ہے اس کی سند میں ایک راوی عباد بن منصور ہے اور وہ ضعیف ہے ، ویسے اس کی توثیق کی گئی ہے اس روایت کے بقیہ رجال ثقہ ہیں ۔