مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کوئی پتھر جو سات حاملہ اونٹنیوں ، جس میں اُن کی چربی اور ان کی اولاد کا وزن بھی شامل ہے ، اگر اتنا وزنی ( پتھر ) ہو اور اسے جہنم میں ڈالا جائے اور وہ ستر سال تک گرتا رہے ، تو بھی وہ اُس کی تہہ تک نہیں پہنچ پائے گا ۔ “
یہ روایت امام ابویعلیٰ نے نقل کی ہے اس کی سند میں ایک راوی یزید بن ابان رقاشی ہے اور وہ ضعیف ہے ویسے اس کی توثیق کی گئی ہے اس روایت کے بقیہ رجال صحیح کے رجال ہیں ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کسی پتھر کو جہنم میں پھینکا جائے تو وہ اس کی تہہ تک پہنچنے سے پہلے ستر سال تک گرتا رہے گا ۔ “
یہ روایت امام ابویعلیٰ نے نقل کی ہے اور امام بزار نے اس کی مانند نقل کی ہے ان دونوں کی سند میں ایک راوی عطاء بن سائب ہے جو اختلاط کا شکار ہو گیا تھا ، ان دونوں کے بقیہ رجال ثقہ ہیں ۔

سیدنا بریده رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اگر کوئی پتھر جہنم میں گر رہا ہو تو وہ ستر سال تک بھی اُس کی تہہ تک نہیں پہنچ پائے گا ۔ “
یہ روایت امام بزار اور امام طبرانی نے نقل کی ہے ان دونوں کی سند میں ایک راوی محمد بن ابان جعفی ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک آواز سنی جو ہولناک تھی ، سیدنا جبرائیل علیہ السلام آپ کے پاس آئے ، تو نبی اکرم صلی اللہ علیہ وسلم نے دریافت کیا : اے جبرائیل ! یہ کیسی آواز تھی ؟ انہوں نے جواب دیا : یہ پتھر کی آواز تھی ، جو ستر سال پہلے جہنم کے کنارے سے گرنا شروع ہوا تھا اور اس وقت وہ اُس کی تہہ تک پہنچا تھا ، تو اللہ تعالیٰ نے اس بات کو پسند کیا کہ اُس کی آواز آپ کو سنا دے ۔ راوی بیان کرتے ہیں : اس کے بعد کبھی بھی نبی اکرم صلی اللہ علیہ وسلم کھل کر ہنستے ہوئے نہیں دیکھا گیا ، یہاں تک کہ آپ کو اللہ تعالیٰ نے وفات دیدی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن قیس انصاری ہے اور وہ ضعیف ہے ۔

لقمان بن عامر بیان کرتے ہیں : میں سیدنا ابوامامہ رضی اللہ عنہ کے پاس آیا ، میں نے کہا: آپ مجھے کوئی ایسی حدیث بیان کیجئے جو آپ نے نبی اکرم صلی اللہ علیہ وسلم کی زبانی سنی ہو ، تو انہوں نے بتایا : میں نے نبی اکرم صلی اللہ علیہ وسلم کو یہ فرماتے ہوئے سنا ہے : ” کوئی ایسا پتھر جس کا وزن دس حاملہ اونٹنیوں جتنا ہو ، اگر اُسے جہنم کے کنارے سے پھینکا جائے تو وہ ستر سال تک بھی اس کی تہہ تک نہیں پہنچ پائے گا ، یہاں تک کہ وہ ” غی “ اور ” اثام “ تک پہنچ جائے ۔ “ عرض کی گئی : ” غی “ اور ” اثام “ سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : ” یہ جہنم میں موجود دو کنویں ہیں ، ان دونوں میں اہل جہنم کی پیپ بہتی ہے اور یہ دونوں وہی ہیں ، جن کا ذکر اللہ تعالیٰ نے اپنی کتاب میں ان الفاظ میں کیا ہے : ( ارشاد باری تعالیٰ ہے : ) ” انہوں نے نماز کو ضائع کیا ، اور نفسانی خواہشات کی پیروی کی ، تو وہ عنقریب ” غی “ سے جا ملیں گے ۔ “ ( اور ارشاد باری تعالیٰ ہے : ) ” جو شخص ایسا کرے گا وہ ” اثام “ تک پہنچ جائے گا ۔ “
یہ روایت امام طبرانی نے نقل کی ہے اس کی سند میں ضعیف راوی ہیں جنہیں ابن حبان نے ثقہ قرار دیا ہے اور یہ کہا: ہے : یہ غلطی کر جاتے ہیں ۔

بعض اہل علم نے یہ بات بیان کی ہے : سیدنا معاذ بن جبل رضی اللہ عنہ نے یہ بات بتائی ہے : نبی اکرم صلی اللہ علیہ وسلم نے ارشاد فرمایا ہے : ” اُس ذات کی قسم ! جس کے دست قدرت میں میری جان ہے ، جہنم کے کنارے سے لے کر اُس کی تہہ تک اتنا فاصلہ ہے کہ سات حاملہ اونٹنیاں ، اُن کی چربی ، اُن کے گوشت اور ان کی اولاد سمیت ، اُن کا جتنا وزن بنتا ہے ، اتنے وزن کا پتھر ، اگر جہنم میں گرنا شروع ہو ، تو وہ جہنم کے کنارے سے لے کر اس کی تہہ تک ستر سال میں پہنچے گا ۔ “
یہ روایت امام طبرانی نے نقل کی ہے اس کی سند میں ایک راوی ایسا ہے جس کا نام بیان نہیں کیا گیا ہے ، اس روایت کے بقیہ رجال صحیح کے رجال ہیں ۔