مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن اللہ تعالیٰ سیدنا آدم علیہ السلام کی شفاعت کو قبول کرے گا جو اُن کی ساری اولاد میں سے ایک سو ہزار ، ہزار اور دس ہزار ، ہزار لوگوں کے بارے میں ہو گی ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی یزید رقاشی ہے اور وہ ضعیف ہے ۔

خرشہ بن حر بیان کرتے ہیں : میں مدینہ منورہ آیا ، میری ملاقات سیدنا عبداللہ بن سلام رجی اللہ عنہ سے ہوئی ، انہوں نے فرمایا : کیا میں تمہیں ایسی حدیث بیان نہ کروں ؟ جس کا ذکر اللہ کی کتاب میں ہے ، پھر انہوں نے وہ حدیث بیان کی جس میں ان لوگوں کا ذکر ہے جو جہنم سے نکلیں گے اور سیدنا آدم علیہ السلام کہیں گے : اے میرے پروردگار ! میرے بچے جل رہے ہیں ، تو انہیں وہاں سے نکال دیا جائے گا ( یعنی سیدنا آدم علیہ السلام کی اولاد کو جہنم سے نکال دیا جائے گا ) ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔