مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ صلی اللہ علیہ وسلم نے ارشاد فرمایا : مجھے ( حوض ) کوثر عطا کر دیا گیا ہے ، میں نے عرض کی : یا رسول اللہ ! کوثر کیا ہے ؟ نبی اکرم صلی اللہ علیہ وسلم نے ارشاد فرمایا : ” جنت میں ایک نہر ہے جس کی چوڑائی اور لمبائی اتنی ہے جتنا مشرق اور مغرب کے درمیان فاصلہ ہے ، اس میں سے جو شخص پی لے گا وہ بعد میں کبھی پیاسا نہیں ہو گا اور اس میں سے جو شخص وضو کر لے گا وہ بعد میں کبھی میلا نہیں ہو گا ، لیکن اسے کوئی ایسا شخص نہیں پیے گا ، جس نے میری دی ہوئی پناہ کے خلاف ورزی کی ہو ، یا میرے اہل بیت کو قتل کیا ہو ۔ “ ( علامہ ہیثمی فرماتے ہیں : ) میں یہ کہتا ہوں : سیدنا انس صلی اللہ علیہ وسلم کے حوالے سے ” صحیح “ میں ایک حدیث مذکور ہے جو حوض کوثر کے بارے میں ہے ، لیکن اس روایت کے علاوہ ہے ۔
یہ روایت امام طبرانی نے نقل کی ہے اس کی سند میں ایک راوی حماد بن یحیی بن مختار ہے اور وہ مجہول ہے اور ایک راوی عطیہ ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرا حوض وہاں سے لے کر وہاں تک ہے ، جس کے پاس ستاروں کی تعداد میں برتن ہوں گے ( اس حوض کا مشروب ) مشک سے زیادہ پاکیزہ خوشبو والا ، شہد سے زیادہ میٹھا ، برف سے زیادہ ٹھنڈا اور دودھ سے زیادہ سفید ہو گا ، جو شخص اس میں سے ایک مرتبہ پی لے گا وہ بعد میں کبھی پیاسا نہیں ہو گا اور جو شخص اس میں سے نہیں پی پائے گا وہ بعد میں کبھی سیراب نہیں ہو گا ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔ یہ روایت امام بزار نے اور امام طبرانی نے معجم اوسط میں نقل کی ہے اس کی سند میں ایک راوی مسعودی ہے اور وہ ثقہ ہے لیکن وہ اختلاط کا شکار ہو گیا تھا ، ان دونوں کے بقیہ رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اے انصار کے گروہ ! تم سے ملنے کا وعدہ ( یا ملنے کی جگہ ) میرے حوض پر ہے ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری ایک نہر ہے ( یعنی حوض ہے جو اتنا بڑا ہے ) جتنا ” صنعاء “ اور ” ایلہ “ کے درمیان فاصلہ ہے ، اس میں ستاروں کی تعداد جتنے برتن ہیں ( اس کا مشروب ) برف سے زیادہ ٹھنڈا ہو گا ، شہد سے زیادہ میٹھا ہو گا ، دودھ سے زیادہ سفید ہو گا ، جو شخص اس میں سے ایک مرتبہ پی لے گا اسے اس کے بعد کبھی پیاس نہیں لگے گی اور جو شخص اس میں سے نہیں پی سکے گا وہ کبھی سیراب نہیں ہو گا ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی محمد بن عبیداللہ عرزمی ہے اور وہ متروک ہے ۔

عبداللہ بن بریدہ بیان کرتے ہیں : عبید بن زیاد کو حوض کوثر کے بارے میں شک ہوا ، اس نے سیدنا زید بن ارقم رضی اللہ عنہ کی طرف پیغام بھیجا اور ان سے حوض کے بارے میں دریافت کیا تو انہوں نے اسے اس کے بارے میں حدیث بیان کی ، جو اس کو اچھی لگی ، اس نے دریافت کیا : کیا آپ نے خود نبی اکرم صلی اللہ علیہ وسلم کی زبانی یہ بات سنی ہے ؟ انہوں نے فرمایا : جی نہیں ! بلکہ میرے بھائی نے مجھے یہ حدیث بیان کی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے سیدنا زید بن ارقم رضی اللہ عنہ کی نقل کردہ ایک حدیث جو حوض کوثر کے تذکرے کے بارے میں ہے ، وہ کتاب العلم میں ، باب نبی اکرم صلی اللہ علیہ وسلم کی طرف جھوٹی بات منسوب کرنے سے متعلق باب میں گزر چکی ہے ۔

یحنس بیان کرتے ہیں : سیدنا حمزه بن عبدالمطلب رضی اللہ عنہ جب مدینہ منورہ تشریف لائے تو انہوں نے سیدہ خولہ بنت قیس بن فہد انصاریہ رضی اللہ عنہا کے ساتھ شادی کر لی ، جو بنو نجار سے تعلق رکھتی تھیں ، نبی اکرم صلی اللہ علیہ وسلم سیدنا حمزہ رضی اللہ عنہ کے گھر ان سے ملنے کے لیے تشریف لے جایا کرتے تھے ، تو اس خاتون نے نبی اکرم صلی اللہ علیہ وسلم کے حوالے سے احادیث روایت کی ہیں ، وہ خاتون بیان کرتی ہیں : ایک مرتبہ نبی اکرم صلی اللہ علیہ وسلم ہمارے ہاں تشریف لائے تو میں نے عرض کی : یا رسول اللہ ! آپ کے بارے میں مجھے یہ بات پتہ چلی ہے کہ آپ نے یہ بات بیان کی ہے : قیامت کے دن آپ کا ایک حوض ہو گا جو فلاں جگہ سے لے کر فلاں جگہ جتنا بڑا ہو گا ، نبی اکرم صلی اللہ علیہ وسلم نے ارشاد فرمایا : جی ہاں ! اور میرے نزدیک اس میں سے سیراب ہونے کے حوالے سے لوگوں میں سب سے زیادہ محبوب تمہاری قوم ہے ۔ وہ خاتون بیان کرتی ہیں : میں نے نبی اکرم صلی اللہ علیہ وسلم کی خدمت میں ایک ہنڈیا پیش کی ، جس میں خبزہ یا خزیرہ نامی سالن تھا ۔ یہ شک راوی کو ہے ۔ نبی اکرم صلی اللہ علیہ وسلم نے اپنے دست مبارک ہنڈیا پر رکھا تاکہ کھائیں ، تو آپ کی انگلیاں جل گئیں ، آپ نے فرمایا : اوہ ، پھر نبی اکرم صلی اللہ علیہ وسلم نے ارشاد فرمایا : انسان کو جب کوئی چیز ٹھنڈی لگتی ہے تو وہ پھر بھی وہ کہتا ہے ” اوہ “ جب اسے گرم چیز لگتی ہے تو پھر بھی وہ ” اوہ “ کہتا ہے ۔
یہ روایت امام أحمد نے نقل کی ہے اسے امام طبرانی نے اختصار کے ساتھ نقل کیا ہے انہوں نے یہ الفاظ نقل کئے ہیں : آپ نے فرمایا : ” میرے نزدیک لوگوں میں سب سے زیادہ محبوب ۔ راوی کو شک ہے ، یا شاید یہ الفاظ ہیں : اس پر وارد ہونے کے حوالے سے لوگوں میں میرے نزدیک محبوب ترین ۔ ۔ ۔ ۔ ۔ “ ۔ اور اس روایت میں انہوں نے یہ الفاظ نقل کئے ہیں : اس خاتون نے نبی اکرم صلی اللہ علیہ وسلم کی خدمت میں ” عصیدہ “ پیش کیا ۔ امام أحمد کے رجال صحیح کے رجال ہیں ۔

سیده خولہ بنت حکیم رضی اللہ عنہا بیان کرتی ہیں : میں نے دریافت کیا : یا رسول اللہ ! کیا آپ کا حوض ہو گا ؟ نہیں اکرم صلی اللہ علیہ وسلم نے ارشاد فرمایا : جی ہاں ! اور وہاں آنے کے حوالے سے میرے نزدیک سب سے زیادہ محبوب تمہاری قوم ہے ۔
یہ روایت امام أحمد اور امام طبرانی نے نقل کی ہے انہوں نے یہ بات بیان کی ہے : ابوخالد أحمد نے اسے اسی طرح سیدہ خولہ بنت حکیم رضی اللہ عنہا کے حوالے سے نقل کیا ہے ، جبکہ دیگر لوگوں کا یہ کہنا ہے : یہ سیدہ خولہ بنت قیس رضی اللہ عنہا کے حوالے سے منقول ہے ، ان دونوں روایات کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : ملیکہ کے دو صاحبزادے ، نبی اکرم صلی اللہ علیہ وسلم کی خدمت میں حاضر ہوئے ، ان دونوں نے عرض کی : ہماری والدہ شوہر کا احترام کرتی تھی ، بچوں پر مہربان تھی ، مہمان نوازی کیا کرتی تھی ، تاہم انہوں نے زمانہ جاہلیت میں زندہ درگور کیا تھا ( یا شاید یہ مراد ہے کہ اس کا انتقال زمانہ جاہلیت میں ہو گیا تھا ) نبی اکرم صلی اللہ علیہ وسلم نے فرمایا : تم دونوں کی ماں جہنم میں جائے گی ، وہ دونوں واپس چلے گئے ، ان کے چہرے سے پریشانی کا اظہار ہو رہا تھا ، نبی اکرم صلی اللہ علیہ وسلم نے ان دونوں کے بارے میں حکم دیا تو انہیں واپس بلایا گیا ، وہ دونوں واپس آئے تو ان کے چہرے سے خوشی کے آثار محسوس ہو رہے تھے ، انہیں امید تھی کہ شاید اس بارے میں کوئی نیا حکم آ گیا ہے ، نبی اکرم صلی اللہ علیہ وسلم نے ارشاد فرمایا : میری ماں بھی ، تم دونوں کی ماں کے ساتھ ہو گی ۔ منافقین سے تعلق رکھنے والے ایک شخص نے کہا: یہ تو اپنی ماں کے کسی کام نہیں آ سکے اور ہم ان کی پیروی کرتے ہیں ، اس پر انصار سے تعلق رکھنے والے ایک شخص نے کہا: ، راوی کہتے ہیں : میں نے اس شخص سے زیادہ نبی اکرم صلی اللہ علیہ وسلم سے سوال کرنے والا اور کوئی شخص نہیں دیکھا ، اُس نے دریافت کیا : یا رسول اللہ ! کیا آپ کے پروردگار نے آپ کے ساتھ ان کے بارے میں ۔ راوی کو شک ہے ، یا شاید یہ الفاظ ہیں : ۔ ان دونوں ( یعنی آپ کے والدین ) کے بارے میں کوئی وعدہ کیا ہے ؟ راوی کہتے ہیں : ان کا یہ گمان ہے کہ شاید اس نے اس بارے میں کچھ سن رکھا تھا ۔ نبی اکرم صلی اللہ علیہ وسلم نے ارشاد فرمایا : میں نے اپنے پروردگار سے اس بارے میں سوال نہیں کیا ، اور میرے پروردگار نے مجھے اس بارے میں کوئی امید نہیں دلائی ، البتہ قیامت کے دن میں مقام محمود پر فائز ہوؤں گا ۔ اس انصاری نے دریافت کیا : یا رسول اللہ ! ” مقام محمود “ کیا ہے ؟ نبی اکرم صلی اللہ علیہ وسلم نے ارشاد فرمایا : جب تم لوگ برہنہ جسم ، برہنہ پاؤں اور ختنے کے بغیر حالت میں لائے جاؤ گے ، تو سب سے پہلے سیدنا ابراہیم علیہ السلام کو لباس پہنایا جائے گا ، اللہ تعالیٰ فرمائے گا : میرے خلیل کو لباس پہناؤ ، تو دو سفید چادریں لائی جائیں گی اور سیدنا ابراہیم علیہ السلام انہیں پہن لیں گے ، پھر وہ عرش کے سامنے بیٹھ جائیں گے ، پھر میرا لباس لایا جائے گا اور میں اسے پہن لوں گا اور عرش کے دائیں طرف ایسی جگہ پر کھڑا ہوؤں گا جہاں میرے علاوہ اور کوئی کھڑا نہیں ہو سکتا اور اس حوالے سے پہلے والے اور بعد والے لوگ مجھ پر رشک کریں گے ۔ نبی اکرم صلی اللہ علیہ وسلم نے یہ بھی ارشاد فرمایا : کوثر سے حوض تک ایک نہر کھولی جائے گی ، ایک منافق نے کہا: نہر کا پانی تو صرف کالی سیاہ مٹی یا چھوٹی کنکریوں پر ہی بہہ سکتا ہے ، نبی اکرم صلی اللہ علیہ وسلم نے فرمایا : اس کی مٹی مشک کی ہو گی اور اس کی کنکریاں موتیوں کی ہوں گی ، منافق نے کہا: میں نے آج کی طرح کی بات کبھی نہیں سنی ، جب بھی کوئی پانی مٹی پر یا کنکریوں پر بہتا ہوا جاتا ہے تو اس کے نتیجے میں نباتات بھی اُگتے ہیں ، انصاری نے عرض کی : یا رسول اللہ ! کیا اس نہر کے نباتات بھی ہوں گے ؟ نبی اکرم صلی اللہ علیہ وسلم نے ارشاد فرمایا : جی ہاں ! سونے کی چھڑیاں ( یعنی پودے ) ہوں گے ، منافق نے کہا: میں نے آج کی طرح کی بات کبھی نہیں سنی ، جب بھی نباتات ہوتے ہیں ، تو ان کے پتے بھی ہوتے ہیں اور ان کے پھل بھی ہوتے ہیں ، انصاری نے دریافت کیا : یا رسول اللہ ! کیا اس کے پھل بھی ہوں گے ؟ نبی اکرم صلی اللہ علیہ وسلم نے ارشاد فرمایا : جی ہاں ! مختلف قسم کے جواہرات کی شکل میں ہوں گے ، اُس حوض کا پانی دودھ سے زیادہ سفید ، شہد سے زیادہ میٹھا ہو گا ، جو شخص اس میں سے ایک مرتبہ پی لے گا وہ اس کے بعد پیاسا نہیں ہو گا اور جو شخص اس سے محروم رہے گا وہ اس کے بعد کبھی سیراب نہیں ہو گا ۔ “
یہ روایت امام أحمد ، امام بزار اور امام طبرانی نے نقل کی ہے ، ان سب کی اسانید میں ایک راوی عثمان بن عمیر ہے اور وہ ضعیف ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے میرے ساتھ یہ وعدہ کیا ہے کہ وہ میری امت کے ستر ہزار افراد کو کسی حساب کے بغیر جنت میں داخل کرے گا ۔ “ اس پر سیدنا یزید بن اخنس رضی اللہ عنہ نے عرض کی : اللہ کی قسم ! آپ کی امت میں اتنے لوگ تو یوں ہوں گے ، جس طرح مکھیوں کے درمیان سرخی مائل رنگت کی مکھی ہوتی ہے ، نبی اکرم صلی اللہ علیہ وسلم نے ارشاد فرمایا : میرے پروردگار نے میرے ساتھ ستر ہزار لوگوں کا وعدہ کیا ہے جن میں سے ہر ایک ہزار کے ساتھ مزید ستر ہزار لوگ ہوں گے ، اور اس نے اس کے ہمراہ تین لپ ( یعنی دونوں ہتھیلیوں کو ملا دینا ) مزید کا وعدہ کیا ہے ، اس شخص نے دریافت کیا : اے اللہ کے نبی ! آپ کے حوض کی وسعت کتنی ہے ؟ نبی اکرم صلی اللہ علیہ وسلم نے ارشاد فرمایا : جتنا عدن سے عمان تک کا درمیانی فاصلہ ہے ، بلکہ اس سے بھی زیادہ وسیع ہے ، اس سے بھی زیادہ وسیع ہے ، نبی اکرم صلی اللہ علیہ وسلم نے اپنے دست مبارک کے ذریعے اشارہ کر کے یہ بات ارشاد فرمائی ، آپ نے فرمایا : اس میں سونے اور چاندی کے بنے ہوئے دو پرنالے ہیں ۔ اس شخص نے دریافت کیا : اے اللہ کے نبی ! آپ کا حوض کیا ہے ؟ نبی اکرم صلی اللہ علیہ وسلم نے ارشاد فرمایا : ( اُس کا مشروب ) دودھ سے زیادہ سفید ہے اور وہ چکھنے میں شہد سے زیادہ میٹھا ہے اور مشک سے زیادہ خوشبو والا ہے ، جو شخص اُس میں سے پی لے گا وہ اس کے بعد کبھی پیاسا نہیں ہو گا اور اس کا چہرہ کبھی سیاہ نہیں ہو گا ۔ “ ( علامہ ہیثمی فرماتے ہیں : ) میں یہ کہتا ہوں : امام ترمذی اور امام ابن ماجہ نے اس روایت کا کچھ حصہ نقل کیا ہے ۔
یہ روایت امام أحمد اور امام طبرانی نے نقل کی ہے امام أحمد کے رجال اور طبرانی کی بعض اسانید کے رجال صحیح رجال ہیں ، البتہ امام طبرانی نے یہ الفاظ نقل کئے ہیں : ” اس نے دریافت کیا : اس کا مشروب کیسا ہو گا ؟ نبی اکرم صلی اللہ علیہ وسلم نے ارشاد فرمایا : اس کا مشروب دودھ سے زیادہ سفید اور ذائقے میں شہد سے زیادہ میٹھا ہو گا ۔ “

سیدنا اسامہ بن زید رضی اللہ عنہما بیان کرتے ہیں : ایک دن نبی اکرم صلی اللہ علیہ وسلم سیدنا حمزہ بن عبدالمطلب رضی اللہ عنہ کے ہاں تشریف لائے ، آپ نے انہیں ( گھر میں ) نہیں پایا ، آپ نے ان کی اہلیہ سے ان کے بارے میں دریافت کیا ، اس خاتون کا تعلق بنو نجار سے تھا ، اس خاتون نے بتایا : میرے والد آپ پر قربان ہوں ، وہ آپ کی طرف جانے کے لئے ہی نکلے تھے ، ہو سکتا ہے بنو نجار کی کسی گلی میں ان کا آپ سے سامنا نہ ہو پایا ہو ، یا رسول اللہ ! آپ اندر کیوں نہیں تشریف لاتے ؟ نبی اکرم صلی اللہ علیہ وسلم اندر تشریف لے گئے ، اس خاتون نے آپ کی خدمت میں ” حیس “ پیش کیا ، نبی اکرم صلی اللہ علیہ وسلم نے اس میں سے کھایا ، اس خاتون نے عرض کی : یا رسول اللہ ! آپ کو بہت ، بہت مبارک ہو ، آپ تشریف لے آئے ہیں ، ورنہ میرا آپ کی خدمت میں حاضر ہونے کا اور آپ کو مبارکباد پیش کرنے کا ارادہ تھا ، سیدنا ابوعمارہ رضی اللہ عنہ ( یعنی سیدنا حمزہ بن عبدالمطلب رضی اللہ عنہ ) نے مجھے بتایا ہے کہ آپ کو جنت میں ایک نہر دی گئی ہے ، جس کا نام کوثر ہے ، نبی اکرم صلی اللہ علیہ وسلم نے فرمایا : جی ہاں ! اس کی زمین ( یا اس کے کنارے کی زمین ) یاقوت ، مرجان ، زبرجد اور موتیوں کی ہے ، اس خاتون نے عرض کی : میری یہ خواہش ہے کہ آپ اپنے حوض کی صفت میرے سامنے یوں بیان کریں کہ میں وہ آپ سے سن لوں ، نبی اکرم صلی اللہ علیہ وسلم نے ارشاد فرمایا : ” وہ ایلہ اور صنعاء کے درمیانی فاصلے جتنا بڑا ہے ، اس کے برتن ستاروں کی تعداد جتنے ہیں اور وہاں آنے والوں میں ، میرے نزدیک سب سے زیادہ محبوب تمہاری قوم ہے ، اے بنت حمد ! ( راوی کہتے ہیں : نبی اکرم صلی اللہ علیہ وسلم کی مراد یہ تھی کہ اے انصار سے تعلق رکھنے والی خاتون ! ) ۔ “ ( علامہ ہیثمی فرماتے ہیں : ) میں یہ کہتا ہوں : شاید روایت کے درست الفاظ یہ ہیں : ” اے بنت قہد ! “ ۔
یہ روایت امام طبرانی نے نقل کی ہے اس کی سند میں ایک راوی حرام بن عثمان ہے اور وہ متروک ہے ۔

سیدنا حذیفہ بن اسید غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اے لوگو ! میں تمہارا پیشرو ہوؤں گا اور تم حوض پر میرے پاس آؤ گے ، میرا حوض اتنا بڑا ہے جتنا صنعاء اور بصریٰ کے درمیان فاصلہ ہے ، اس کے پاس ستاروں کی تعداد میں چاندی اور سونے کے بنے ہوئے پیالے ہیں ، جب تم میرے پاس آؤ گے تو میں تم سے دو چیزوں کے بارے میں دریافت کروں گا ، تو تم لوگ اس بات کا دھیان رکھنا کہ میرے بعد تم ان دونوں کے بارے میں کیا کرتے ہو ؟ بڑا سبب اللہ کی کتاب ہے جس کا ایک کنارہ اللہ تعالیٰ کے ہاتھ میں ہے اور ایک کنارہ تمہارے ہاتھ میں ہے ، تو تم اس کو مضبوطی سے تھام کے رکھنا ، تم گمراہ نہ ہونا اور تم تبدیلی نہ کرنا ( اور دوسری چیز ) میری عترت ، میرے اہل بیت ہیں ، کیونکہ علم رکھنے والی اور خبر رکھنے والی ذات نے مجھے یہ بات بتائی ہے ، یہ دونوں ختم نہیں ہوں گے ، یہاں تک کہ یہ دونوں حوض پر میرے پاس آ جائیں گے ۔ “
یہ روایت امام طبرانی نے دو اسناد کے ساتھ نقل کیا ہے ان دونوں میں ایک راوی زید بن حسن انماطی ہے جسے ابن حبان نے ثقہ قرار دیا ہے اور ابوحاتم نے اسے ضعیف کہا: ہے ان دونوں میں سے ایک کے بقیہ رجال صحیح کے رجال ہیں اور دوسری کے بھی اسی طرح ہیں ، صرف نصر بن عبدالرحمن کا معاملہ مختلف ہے ، اگر اللہ نے چاہا تو وہ بھی ثقہ ہو گا ۔

سیدنا سمرہ بن جندب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” انبیاء کرام ایک دوسرے کے سامنے فخر کا اظہار کریں گے کہ ان کی امت میں سے کس کے ساتھی زیادہ ہیں ؟ تو مجھے یہ امید ہے کہ اس دن میرے ساتھی سب سے زیادہ ہوں گے ، اور وہ سب ( حوض پر میرے پاس ) آئیں گے ، اُس دن ان انبیاء کرام میں سے ہر ایک بھرے ہوئے حوض کے پاس کھڑا ہو گا ، اس کے پاس عصا ہو گا ، وہ اپنی امت کے جس فرد کو پہچانے گا اسے بلائے گا اور ہر امت کی مخصوص نشانی ہو گی ، جس کے ذریعے ان کا نبی انہیں پہچان لے گا“ ۔
یہ روایت امام طبرانی نے نقل کی ہے اس کی سند میں ایک راوی مروان بن جعفر سمری ہے جسے ابن ابوحاتم نے ثقہ قرار دیا ہے ازدی کہتے ہیں : لوگ اس کے بارے میں کلام کرتے ہیں اس روایت کے بقیہ رجال ثقہ ہیں ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں حوض پر تمہارا پیشرو ہوؤں گا ، جو شخص میرے پاس آ جائے گا اور پی لے گا وہ کبھی پیاسا نہیں ہو گا ، خبردار ! میرے سامنے کچھ ایسے لوگ آئیں گے ، جنہیں میں پہچانوں گا لیکن پھر میرے اور ان کے درمیان رکاوٹ آ جائے گی ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے تاہم اس میں ” لیردن “ ( میرے پاس آئیں گے ) سے لے کر آخر تک کے الفاظ نہیں ہیں ۔ یہ روایت امام طبرانی نے نقل کی ہے اور اس کے رجال صحیح کے رجال ہیں ۔

ان ( یعنی سیدنا سہل بن سعد رضی اللہ عنہ ) کے حوالے سے
یہ روایت منقول ہے : نبی اکرم صلی اللہ علیہ وسلم نے ارشاد فرمایا : ” ہر نبی پیشرو ہو گا اور میں حوض پر تمہارا پیشرو ہوؤں گا ، جو شخص حوض پر میرے پاس آ جائے گا اور پی لے گا اسے پیاس نہیں لگے گی اور جسے پیاس نہیں لگے گی وہ جنت میں داخل ہو گا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف موسیٰ بن یعقوب زمعی کا معاملہ مختلف ہے ، ایک سے زیادہ افراد نے اسے ثقہ قرار دیا ہے اور اس میں ضعف پایا جاتا ہے ۔

سیدنا ابوسعید خدری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” لوگوں کا کیا معاملہ ہے ؟ جو یہ کہتے ہیں : اللہ کے رسول صلی اللہ علیہ وسلم کی رشتہ داری اُن کی قوم کو نفع نہیں دے گی ، جی ہاں ! اللہ کی قسم ! میرے ساتھ رشتہ داری کا تعلق ، دنیا اور آخرت میں جڑا رہے گا اور اے لوگو ! بیشک میں حوض پر تمہارا پیشرو ہوؤں گا ، جب تم لوگ آؤ گے تو کوئی شخص یہ کہے گا : یا رسول اللہ ! میں فلاں بن فلاں ہوں ، کوئی دوسرا یہ کہے گا : میں فلاں بن فلاں ہوں ، تو میں یہ کہوں گا : جہاں تک نسب کا تعلق ہے تو اس کو میں نے جان لیا ہے لیکن تم لوگوں نے میرے بعد نئی چیز پیدا کی اور اُلٹے قدموں پھر گئے ۔ “
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ، صرف عبداللہ بن محمد بن عقیل کا معاملہ مختلف ہے اور اس کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں حوض پر تمہارا پیشرو ہوؤں گا ، جو شخص اس پر وارد ہو گا ، وہ کامیاب ہو جائے گا ، کچھ لوگوں کو لایا جائے گا ، پھر انہیں پکڑ کر بائیں طرف لے جایا جائے گا ، تو میں کہوں گا : اے میرے پروردگار ! تو یہ کہا: جائے گا : یہ لوگ تمہارے بعد ایڑیوں کے بل مرتد ہو گئے تھے ۔ “
یہ روایت امام أحمد نے نقل کی ہے امام طبرانی نے معجم کبیر اور معجم اوسط میں اس کی مانند نقل کی ہے ، تاہم انہوں نے اس کے آغاز میں یہ الفاظ نقل کئے ہیں : نبی اکرم صلی اللہ علیہ وسلم نے ارشاد فرمایا : ” میں تمہیں ڈب سے ( یعنی پہلو سے ) پکڑتا ہوں ، تم لوگ جہنم سے بچو ! تم لوگ حدود ( کی خلاف ورزی کرنے ) سے بچو ! جب میں مر جاؤں گا ، تو تمہیں چھوڑ جاؤں گا اور میں حوض پر تمہارا پیشرو ہوؤں گا ۔ ۔ ۔ ۔ ۔ “ ۔ اس کے بعد انہوں نے پوری حدیث ذکر کی ہے ۔ یہ روایت امام بزار نے نقل کی ہے اس کی سند میں ایک راوی لیث بن ابوسلیم ہے اور وہ مدلس ہے اس روایت کے بقیہ رجال ثقہ ہیں

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں حوض پر موجود ہوؤں گا اور اس بات کا جائزہ لوں گا کہ کون میرے پاس آتا ہے ؟ نبی اکرم صلی اللہ علیہ وسلم نے ارشاد فرمایا : مجھ سے فاصلے پر کچھ لوگوں کو پکڑ لیا جائے گا ( اور میرے پاس نہیں آنے دیا جائے گا ) تو میں کہوں گا : اے میرے پروردگار ! میری امت میری امت ! نبی اکرم صلی اللہ علیہ وسلم فرماتے ہیں : تو یہ کہا: جائے گا : تم نہیں جانتے کہ تمہارے بعد انہوں نے کیا عمل کیا تھا ؟ تمہارے بعد یہ مسلسل ایڑیوں کے بل پلٹتے رہے تھے ۔ “ سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” حوض ( کی لمبائی ) ایک ماہ کی مسافت جتنی ہے اور اس کے دونوں گوشے بھی اسی طرح ہیں ۔ “ راوی کہتے ہیں : یعنی اس کی چوڑائی بھی اس کی لمبائی جتنی ہے ۔ ” اور اس کے کوزے آسمان کے ستاروں کی مانند ہیں اور وہ ( یعنی اس کا مشروب ) مشک سے زیادہ خوشبو والا ، دودھ سے زیادہ سفید ہے ، جو شخص اس میں سے پی لے گا وہ اس کے بعد کبھی پیاسا نہیں ہو گا ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ، یہ روایت امام بزار نے اختصار کے ساتھ نقل کی ہے اور اس کی سند میں ضعف پایا جاتا ہے ۔

ان ( یعنی سیدنا جابر بن عبداللہ رضی اللہ عنہ ) کے حوالے سے یہ بات منقول ہے : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میں تمہارے آگے تمہارا پیشرو ہوؤں گا ، جب تم مجھے نہیں دیکھو گے تو میں حوض پر ہوؤں گا ، جس کی مقدار ” ایلہ “ سے لے کر ” مکہ “ تک کے درمیانی فاصلے جتنی ہے ، عنقریب کچھ مرد اور عورتیں مشکیزے اور برتن لے کر آئیں گے ، لیکن وہ اس ( حوض ) میں سے کچھ بھی نہیں پی سکیں گے ۔ “
یہ روایت امام أحمد نے مرفوع اور موقوف ( دونوں طرح سے ) نقل کی ہے ، مرفوع روایت کی سند میں ایک راوی ابن لہیعہ ہے اور موقوف روایت کے رجال صحیح کے رجال ہیں ۔
یہ روایت امام طبرانی نے معجم اوسط میں مرفوع روایت کے طور پر نقل کی ہے اور اس کی سند میں بھی ایک راوی ابن لہیعہ ہے انہوں نے اسے اختصار کے ساتھ بھی نقل کیا ہے ، جس میں یہ الفاظ ہیں : ” وہ اس میں سے کچھ بھی نہیں پی سکیں گے ۔ “ یہ ” صحیح “ کے رجال سے منقول ہے ، امام بزار نے بھی اسے اسی طرح نقل کیا ہے ۔

سیدنا سمرہ بن جندب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کچھ لوگ میرے سامنے آئیں گے جو میرے ساتھ تھے ، جب ان کے سر میرے سامنے آئیں گے تو انہیں مجھ سے پہلے ہی روک لیا جائے گا ، میں کہوں گا : اے میرے پروردگار ! میرے ساتھی ، میرے ساتھی ، تو کہا: جائے گا : تم نہیں جانتے ، تمہارے بعد انہوں نے کیا نیا کام کیا تھا ؟ “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی حکم بن عبدالملک ہے اور وہ ضعیف ہے ۔

سیدنا ابوبکرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” حوض پر میرے سامنے کچھ ایسے لوگ آئیں گے جو میرے ساتھ رہے اور انہوں نے مجھے دیکھا ، یہاں تک کہ جب وہ میرے سامنے آئیں گے اور میں انہیں دیکھوں گا تو انہیں مجھ سے پہلے ہی روک لیا جائے گا ، میں یہ ضرور کہوں گا : اے میرے پروردگار ! میرے ساتھی ، میرے ساتھی ، تو یہ کہا: جائے گا : تم نہیں جانتے ، تمہارے بعد انہوں نے کیا نیا کام کیا تھا ۔ “
یہ روایت امام أحمد نے دو اسناد کے ساتھ نقل کی ہے ان دونوں میں سے ایک کے رجال صحیح کے رجال ہیں ، صرف علی بن زید کا معاملہ مختلف ہے اس میں موجود ضعف کے باوجود اس کی توثیق کی گئی ہے ،
یہ روایت امام طبرانی نے مختلف اسانید کے ساتھ نقل کی ہے اور ان میں سے ایک کے رجال امام أحمد کے رجال کی مانند ہیں ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں یہ صورتحال نہ پاؤں کہ تم میں سے کسی ایک کو حوض پر میرے پاس نہ آنے دیا جائے اور میں یہ کہوں کہ یہ تو میرے ساتھیوں سے تعلق رکھنے والے لوگ ہیں ، تو یہ کہا: جائے : آپ نہیں جانتے ، آپ کے بعد انہوں نے کیا نیا کام کیا تھا ۔ “ سیدنا ابودرداء رضی اللہ عنہ نے عرض کی : یا رسول اللہ ! آپ اللہ تعالیٰ سے یہ دعا کیجئے کہ وہ مجھے اُن میں نہ بنائے ، تو نبی اکرم صلی اللہ علیہ وسلم نے ارشاد فرمایا : تم اُن میں سے نہیں ہو ۔ “
یہ روایت امام طبرانی نے دو اسناد کے ساتھ نقل کی ہے ان دونوں میں سے ایک کے رجال صحیح کے رجال ہیں ، صرف ابوعبداللہ اشعری کا معاملہ مختلف ہے اور وہ ثقہ ہے ۔

سیدنا ابومسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میرے ساتھیوں میں سے کچھ لوگ میرے سامنے آئیں گے ، یہاں تک کہ جب میں انہیں دیکھوں گا تو انہیں مجھ سے پہلے ہی روک لیا جائے گا ، میں کہوں گا : یہ میرے ساتھی ہیں ، تو یہ کہا: جائے گا : آپ نہیں جانتے آپ کے بعد انہوں نے کیا نیا کام کیا تھا ؟ “ ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا جابر بن عبداللہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں حوض پر تمہارا پیشرو ہوؤں گا اور میں دوسری امتوں کے مقابلے میں تمہاری کثرت پر فخر کروں گا ، تو تم میرے بعد کافر نہ ہو جانا کہ ایک دوسرے کی گردنیں مارتے پھرو ۔ “ ایک شخص نے عرض کی : یا رسول اللہ ! اس ( حوض ) کا حجم کتنا ہو گا ؟ نبی اکرم صلی اللہ علیہ وسلم نے ارشاد فرمایا : جتنا ” ایلہ “ سے لے کر ” مکہ “ تک کا درمیانی فاصلہ ہے ( یہاں لفظ کے بارے میں راوی کو شک ہے ) اس کے برتن ستاروں کی تعداد سے زیادہ ہوں گے ، مؤمن ان میں سے کوئی برتن پکڑے گا اور پھر وہ اسے رکھے گا نہیں کہ اس سے پہلے کوئی دوسرا اسے پکڑ لے گا ۔ “
یہ روایت امام بزار نے نقل کی ہے اس کی سند میں ایک راوی عبیدہ بن اسود ہے ، جسے ایک سے زیادہ افراد نے ضعیف قرار دیا ہے ابن حبان نے کتاب الثقات میں یہ بات بیان کی ہے : اس کی حدیث کا اعتبار کیا جائے گا ، جب یہ کسی ثقہ راوی سے سماع کی وضاحت کر دے ، اور اس کے بعد والا راوی بھی ثقہ ہو ، اس روایت کے بقیہ رجال کی توثیق کی گئی ہے اگرچہ ان میں سے بعض میں ضعف پایا جاتا ہے ۔

فرزدق بیان کرتے ہیں : سیدنا ابوہریرہ رضی اللہ عنہ نے مجھ سے فرمایا : اے فرزدق ! میں دیکھ رہا ہوں کہ تمہارے پاؤں چھوٹے ہیں ، اگر تمہارے لیے یہ ممکن ہو کہ حوض کے پاس ان دونوں کے لیے کوئی جگہ بنا سکتے ہو ، تو تم ایسا کر لینا ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میرا حوض ، عمان اور ایلہ کے درمیان فاصلے جتنا ہے ، اس کا پانی دودھ سے زیادہ سفید ، شہد سے زیادہ میٹھا ہے ، اس کے برتن آسمان کے ستاروں کی تعداد جتنے ہیں ، جو شخص اس میں سے پی لے گا وہ کبھی پیاسا نہیں ہو گا ۔ “

ایک روایت میں یہ الفاظ ہیں : ” میرے حوض پر میری امت وارد ہو گی ، جو اتنا بڑا ہے جتنا صنعاء اور یثرب کے درمیان فاصلہ ہے ۔ “ ( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ سے منقول ایک حدیث ” صحیح “ میں مذکور ہے ، جو اس روایت کے علاوہ ہے ۔
یہ روایت امام طبرانی نے معجم اوسط میں نقل کی ہے اور فرزدق نامی راوی کو ابن حبان نے ضعیف قرار دیا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرا ایک حوض ہے اور میں اس پر تمہارا پیشرو ہوؤں گا ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ مذکور ہے : ” میں تمہارا پیشرو ہوؤں گا“ ۔
یہ روایت امام طبرانی نے معجم صغیر میں حسن سند کے ساتھ نقل کی ہے ۔

سیدنا عرباض بن ساریہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” یہ امت حوض پر یوں ہجوم کرے گی ، جس طرح پانی پینے ، جس طرح پانی پینے کے لیے آنے والے اونٹوں کا ہجوم ہوتا ہے ۔ “
یہ روایت امام طبرانی نے دو اسناد کے ساتھ نقل کی ہے اور ان دونوں میں سے ایک حسن ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” میرا حوض اتنا بڑا ہے جتنا عدن اور عمان کے درمیان فاصلہ ہے ( اس کا مشروب ) برف سے زیادہ سفید ، شہد سے زیادہ میٹھا اور مشک سے زیادہ خوشبودار ہے ، اس سے برتن آسمان کے ستاروں کی مانند ہیں جو شخص اس میں سے ایک مرتبہ پی لے گا وہ اس کے بعد کبھی پیاسا نہیں ہو گا ، اس حوض پر سب سے پہلے غریب مہاجرین آئیں گے ، حاضرین میں سے کسی نے دریافت کیا : یا رسول اللہ ! وہ کون ہوں گے ؟ نبی اکرم صلی اللہ علیہ وسلم نے ارشاد فرمایا : جن کے بال بکھرے ہوئے ہوں گے ، جن کے چہرے متغیر ہوں گے ، ان کے کپڑے میلے ہوں گے ان کے لیے دروازے نہیں کھولے جاتے ہوں گے ، وہ خوشحال عورتوں کے ساتھ نکاح نہیں کر سکتے ہوں گے ، جو ان کی ذمہ داری تھی وہ انہوں نے پوری کی ہو گی اور جو ان کا حق تھا وہ انہوں نے وصول نہیں کیا ہو گا ۔ “ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عمر رضی اللہ عنہما سے منقول حدیث ” صحیح “ میں مذکور ہے ، جو اس سیاق کے بغیر ہے اور یہ درست ہے اور لوگوں کی روایت کے مطابق ہے جبکہ ” صحیح “ میں جو روایت ہے اس میں یہ مذکور ہے : ” جتنا جربی اور اذرح کے درمیان فاصلہ ہے ۔ “ حالانکہ یہ دونوں ایسی بستیاں ہیں ، جو ایک دوسرے کے پہلو میں ہیں ۔ ہمارے ایک استاد شیخ علامہ صلاح الدین العلائی نے فرمایا ہے : شاید اس میں سے ایک لفظ رہ گیا ہے ( اور اصل جملہ یوں ہونا چاہیے : ) جس طرح تم لوگوں کے اور جربی اور اذرح کے درمیان فاصلہ ہے ۔ یہ بات میں نے ان سے سنی ہے ۔
یہ روایت امام أحمد اور امام طبرانی نے عمرو بن عمر احموسیٰ کی مخارق بن ابومخارق کے حوالے سے نقل کردہ روایت کے طور پر نقل کی ہے اور اس کے باپ کا نام عبداللہ بن جابر ہے ابن حبان نے ان دونوں کا تذکرہ کتاب الثقات میں کیا ہے امام أحمد کے استاد ابومغیرہ صحیح کے رجال میں سے ہیں ۔

سیدنا ابوامامہ باہلی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میرا حوض اتنا ہے جتنا عدن اور عمان کے درمیان فاصلہ ہے ، اس میں آسمان کے ستاروں کی تعداد میں برتن ہیں ، جو شخص اس میں سے پی لے گا وہ اس کے بعد کبھی پیاسا نہیں ہو گا ، میری امت کے جو لوگ اس حوض پر میرے پاس آئیں گے ان میں کچھ لوگ بکھرے ہوئے بالوں والے میلے کپڑوں والے ہوں گے جو خوشحال عورتوں کے ساتھ شادی نہیں کر سکتے اور نہ ہی بند دروازوں پر آ سکتے ہیں ، راوی کہتے ہیں : اس سے مراد یہ ہے کہ حکمران کے دروازے پر نہیں آ سکتے ۔ ( نبی اکرم صلی اللہ علیہ وسلم نے فرمایا : ) انہوں نے وہ چیز ادا کر دی ہو گی جو ان کے ذمہ ہو گی اور انہیں وہ چیز نہیں دی گئی ہو گی جو ان کا حق ہو گا ۔ “
یہ روایت امام طبرانی نے نقل کی ہے اور اس کے بعض رجال میں موجود ضعف کے باوجود اس کے رجال کی توثیق کی گئی ہے ۔

سیدنا ثوبان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اپنے حوض سے کچھ لوگوں کو پرے کروں گا ، اپنے اہل بیت کی خاطر ، میں اپنے عصا کے ذریعے ان لوگوں کو ماروں گا یہاں تک کہ وہ پیچھے ہٹ جائیں گے ۔ “ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری حدیث ذکر کی ہے جو ” صحیح “ میں بھی مذکور ہے تاہم اس میں یہ الفاظ نہیں ہیں : ” اپنے اہل بیت کی خاطر ۔ ۔ ۔ ۔ ۔ “ ۔
یہ روایت امام بزار نے دو اسناد کے ساتھ نقل کی ہے ان دونوں میں سے ایک کے رجال صحیح کے رجال ہیں ۔

سیدنا بریدہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ صلی اللہ علیہ وسلم نے حوض کا تذکرہ کرتے ہوئے یہ ارشاد فرمایا : ” تم اس میں آسمان کے ستاروں کی تعداد میں برتن دیکھو گے ۔ “
یہ روایت امام بزار نے نقل کی ہے ، وہ کہتے ہیں : یہ حدیث غریب ہے ۔ ( علامہ ہیثمی فرماتے ہیں : ) میں یہ کہتا ہوں : اس کی سند میں ایک راوی عائذ بن بشیر ہے اور وہ ضعیف ہے ۔