مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : میں نے عرض کی : یا رسول اللہ ! کیا قیامت کے دن کوئی حبیب ، اپنے حبیب کو یاد رکھے گا ؟ نبی اکرم صلی اللہ علیہ وسلم نے ارشاد فرمایا : اے عائشہ ! جہاں تک تین مقامات کا تعلق ہے تو ( وہاں ) نہیں ، میزان کے پاس جب تک وہ بوجھل یا ہلکا نہیں ہو جاتا تو وہاں نہیں ، جب نامہ اعمال دیے جائیں گے ، جو یا دائیں ہاتھ میں دیا جائے گا یا بائیں ہاتھ میں دیا جائے گا ، تو وہاں نہیں ، اور جب جہنم میں سے ایک گردن نکلے گی ، وہ گردن یہ کہے گی : مجھے تین افراد کے لئے مقرر کیا گیا ہے ، مجھے تین افراد کے لئے مقرر کیا گیا ہے ، مجھے اس کے لیے مقرر کیا گیا ہے ، جو اللہ تعالیٰ کے ساتھ کسی دوسرے معبود کی عبادت کرتا تھا ، مجھے اس کے لیے مقرر کیا گیا ہے جو یوم حساب پر ایمان نہیں رکھتا تھا ، اور مجھے ہر ظالم سرکش کے لئے مقرر کیا گیا ہے ، پھر وہ انہیں لپیٹ میں لے گی اور انہیں جہنم کی گہرائی میں ڈال دے گی ، جہنم پر ایک پل ہو گا جو بال سے زیادہ باریک اور تلوار سے زیادہ تیز ہو گا ، اس پر آنکڑے اور کنڈے ہوں گے جس کے بارے میں اللہ کو منظور ہو گا وہ اسے پکڑ لیں گے ، کچھ لوگ اس پل پر سے یوں گزریں گے جیسے پلک جھپکنا ہوتا ہے ، جیسے بجلی ہوتی ہے ، جیسے ہوا ہوتی ہے ، جیسے تربیت یافتہ گھوڑا ہوتا ہے ، جیسے سوار ہوتا ہے ( یعنی وہ لوگ مختلف قسم کی رفتار سے گزریں گے ) فرشتے یہ کہہ رہے ہوں گے : اے پروردگار ! سلامتی عطا کرنا ، اے پروردگار ! سلامتی عطا کرنا ، تو متوج سلامت رہے گا ، مخدوش سلامت رہے گا ، مکور چہرے کے بل جہنم میں جائے گا ۔ “ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا ایک حصہ نقل کیا ہے ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ، ویسے اس کی توثیق کی گئی ہے ، اس روایت کے بقیہ رجال صحیح کے رجال ہیں ۔

سیدنا ابوبکرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن لوگوں کو پل صراط پر لایا جائے گا اور اس پل کے دونوں پہلو ان لوگوں کو نیچے گرائیں گے جس طرح پتنگے آگ میں گرتے ہیں ، اللہ تعالیٰ جس کے بارے میں چاہے گا اپنی رحمت کے وسیلے سے اسے نجات عطا کر دے گا ۔ نبی اکرم صلی اللہ علیہ وسلم نے ارشاد فرمایا : پھر فرشتوں کو ، انبیاء کو ، شہداء کو شفاعت کرنے کی اجازت دی جائے گی وہ شفاعت کریں گے اور ( لوگوں کو جہنم سے ( نکالیں گے ، وہ شفاعت کریں گے اور ( لوگوں کو جہنم سے ) نکالیں گے ۔ “ ایک مرتبہ عفان نامی راوی نے یہ الفاظ زائد نقل کیے : ” وہ شفاعت کریں گے ( اور ایسے لوگوں کو جہنم سے ) نکالیں گے ، جن کے دل میں اتنا ایمان ہو ، جو ذرے کے وزن جتنا ہو ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں
یہ روایت امام طبرانی نے معجم صغیر اور معجم کبیر میں اس کی مانند نقل کی ہے
یہ روایت امام بزار نے بھی نقل کی ہے اور اس کے رجال صحیح کے رجال ہیں ۔ اس سے پہلے سیدنا ابوذر غفاری رضی اللہ عنہ کی نقل کردہ روایت گزر چکی ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب انہیں پل صراط پر لایا جائے گا تو میری امت کا شعار ( یعنی مخصوص نعرہ ، یا مخصوص کلمات ) ہو گا : اے وہ ذات ! کہ تیرے علاوہ اور کوئی معبود نہیں ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایسا راوی ہے جس کے ضعیف ہونے کے باوجود اس کی توثیق کی گئی ہے اور ایک راوی عبدوس بن محمد ہے اور میں اس سے واقف نہیں ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ قیامت کے دن لوگوں کو ان کے ناموں کے حوالے سے بلائے گا اور یہ اس کی طرف سے اپنے بندوں کے لئے پردے کے ساتھ ہو گا لیکن جہاں تک پل صراط کے پاس کا معاملہ ہے تو وہاں اللہ تعالیٰ ہر مومن مرد کو نور عطا کرے گا اور ہر مومن عورت کو نور عطا کرے گا اور ہر منافق کو نور عطا کرے گا ، لیکن جب وہ لوگ پل صراط پر آ جائیں گے تو اللہ تعالی منافق مردوں اور منافق عورتوں کا نور سلب کر لے گا ، تو منافقین یہ کہیں گے : ( جس کا ذکر قرآن میں ان الفاظ میں ہے : ) ” ہماری طرف دیکھو تاکہ ہم تمہارے نور میں سے کچھ حاصل کر لیں ۔ “ تو مومنین یہ کہیں گے : ( جس کا ذکر قرآن میں ان الفاظ میں ہے : ) ” اے ہمارے پروردگار ! تو ہمارے لئے ہمارے نور کو مکمل کر دے ۔ “ ( نبی اکرم صلی اللہ علیہ وسلم نے فرمایا : ) تو اس وقت کوئی کسی کا ذکر نہیں کرے گا ۔
یہ روایت امام طبرانی نے نقل کی ہے اس کی سند میں ایک راوی اسحاق بن بشر ابوحذیفہ ہے اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : ” پل صراط کو جہنم کے اوپر رکھا جائے گا جو تلوار کی دھار سے زیادہ باریک اور تیز ہو گا ، پرے کرنے والا اور پھسلانے والا ہو گا ، اس پر آگ کے بنے ہوئے آنکڑے ہوں گے جو اچک لیں گے ، تو پکڑنے والا اس میں گرے گا اور پچھاڑا گیا ہو گا ، ان میں سے کوئی برق کی مانند گزرے گا ، پھر جیسے ہوا ہوتی ہے ، پھر گھوڑے کے دوڑنے کی مانند ، پھر آدمی کے دوڑنے کی مانند ، پھر آدمی کے تیزی سے چلنے کی مانند ، پھر آدمی کے چلنے کی مانند ، پھر ان کے آخر میں ایسا انسان ہو گا جس پر جہنم واجب ہو چکی ہو گی ، وہ جہنم میں بری صورتحال کا سامنا کر چکا ہو گا ، یہاں تک کہ اللہ تعالیٰ اپنی رحمت کے فضل کے ذریعے اسے جنت میں داخل کر دے گا تو اُسے کہا: جائے گا : تم آرزو کرو اور مانگو ! وہ کہے گا : اے میرے پروردگار ! کیا تو میرا مذاق اڑا رہا ہے ؟ جبکہ تو رب العزت ہے ، تو اسے کہا: جائے گا : تم آرزو کرو اور مانگو ! ( وہ شخص مانگنا شروع کرے گا ) یہاں تک کہ جب اس کی تمام آرزوئیں ختم ہو جائیں گی تو اُس سے کہا: جائے گا : تم نے جو مانگا وہ تمہیں ملتا ہے اور اس کے ہمراہ اس کی مانند مزید ملتا ہے ۔ “

سیدنا ابوہریرہ رضی اللہ عنہ کی نقل کردہ روایت میں یہ الفاظ ہیں : ” اس کے ہمراہ اس کی مانند مزید دس گنا ملتا ہے ۔ “ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن مسعود رضی اللہ عنہ اور سیدنا ابوہریرہ رضی اللہ عنہ کی نقل کردہ احادیث ” صحیح “ میں مذکور ہیں ، جو اس کے علاوہ ہیں اور مرفوع ہیں ۔
یہ روایت امام طبرانی نے نقل کی ہے اس کے رجال صحیح کے رجال ہیں صرف عاصم کا معاملہ مختلف ہے اور اس کی توثیق کی گئی ہے ۔

سیدنا یعلیٰ بن منبہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن آگ ( یا جہنم ) مومن سے یہ کہے گی : اے مومن ! تم گزر جاؤ ! کیونکہ تمہارا نور میرے شعلوں کو بجھا دے گا ۔ “
یہ روایت امام طبرانی نے نقل کی ہے اس کی سند میں ایک راوی سلیم بن منصور بن عمار ہے اور وہ ضعیف ہے ۔

ابوسمینہ بیان کرتے ہیں : ہمارے درمیان ” ورود “ کے بارے میں اختلاف ہو گیا ، ہم میں سے کچھ کا یہ کہنا تھا کہ مومن جہنم میں داخل نہیں ہو گا اور کچھ کا یہ کہنا تھا ( کافر اور مومن ) سب اس میں داخل ہوں گے ، پھر اللہ تعالیٰ پرہیزگار لوگوں کو نجات عطا کر دے گا راوی کہتے ہیں : میری ملاقات سیدنا جابر رضی اللہ عنہ بن عبداللہ رضی اللہ عنہ سے ہوئی ، میں نے کہا: ہمارے درمیان ” ورود “ کے بارے میں اختلاف ہو گیا ہے ، انہوں نے فرمایا : سب لوگ اس پر وارد ہوں گے ، میں نے ان سے کہا: ہمارے درمیان اس بارے میں اختلاف ہے ، ہم میں سے کچھ کا یہ کہنا ہے : مومن اس میں داخل نہیں ہو گا اور کچھ کا یہ کہنا ہے : ( کافر اور مومن ) سب اس میں داخل ہوں گے ، تو سیدنا جابر بن عبداللہ رضی اللہ عنہما نے اپنی دو انگلیاں اپنے دونوں کانوں کی طرف بڑھائیں اور فرمایا : یہ دونوں بہرے ہو جائیں اگر میں نے نبی اکرم صلی اللہ علیہ وسلم کو یہ ارشاد فرماتے ہوئے نہ سنا ہو : ” ورود “ سے مراد داخل ہونا ہے ، ہر نیک اور گناہ گار شخص اس میں داخل ہو گا ، لیکن وہ اہل ایمان کے لیے ٹھنڈک اور سلامتی والی ہو گی ، جس طرح وہ سیدنا ابراہیم علیہ السلام کے لیے ( ٹھنڈک و سلامتی والی ) ہوئی تھی ، یہاں تک کہ ان ( اہل ایمان ) کی ٹھنڈک کی وجہ سے آگ ( راوی کو شک ہے ، یا شاید یہ الفاظ ہیں : ) جہنم کی گونج ہو گی ، پھر اللہ تعالیٰ پرہیزگار لوگوں کو نجات عطا کر دے گا اور ظالموں کو اس میں گھٹنوں کے بل چھوڑ دے گا ۔ “ ( علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ کی نقل کردہ حدیث ” صحیح “ میں مذکور ہے جو ” موقوف “ ہے اور اس روایت کے علاوہ ہے ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوبکر صدیق رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کے لیے جہنم کی تپش یوں ہو گی ، جیسے حمام کی تپش ہوتی ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی محمد بن عمر واقدی ہے اور وہ انتہائی ضعیف ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جہنم پر ایک ایسا دن آئے گا جب وہ کھیتی کی طرح ہو گی ، وہ حرکت کرے گی اور سرخ ہو گی اور اس کے دروازے بج رہے ہوں گے ۔ “
یہ روایت امام طبرانی نے نقل کی ہے اس کی سند میں ایک راوی جعفر بن زبیر ہے اور وہ ضعیف ہے ۔