مجمع الزوائد ومنبع الفوائد

سیدنا علی رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس بیٹھے ہوئے تھے اس دوران اہل عالیہ سے تعلق رکھنے والا ایک شخص آیا ، اس نے عرض کی : یا رسول اللہ ! آپ مجھے اس دین کی سب سے زیادہ سخت ( یعنی مشکل ) چیز اور سب سے زیادہ نرم ( یعنی آسان ) چیز کے بارے میں بتائیے ! نبی اکرم صلی اللہ علیہ وسلم نے ارشاد فرمایا : ” اس کی سب سے نرم چیز اس بات کی گواہی دینا ہے کہ اللہ تعالیٰ کے علاوہ اور کوئی معبود نہیں ہے اور سیدنا محمد صلی اللہ علیہ وسلم اس کے بندے اور اس کے رسول ہیں ، اور اسے عالیہ سے تعلق رکھنے والے فرد ! اس کی سب سے زیادہ سخت چیز امانت ہے ، اس شخص کا دین نہیں جس کی امانت نہ ہو ، نہ اس کی نماز ہے ، نہ اس کی زکوۃ ہے ، اے عالیہ سے تعلق رکھنے والے فرد ! جو شخص حرام طور پر مال حاصل کرے ، اور اس کے ذریعے قمیص پہنے ، تو اس کی نماز قبول نہیں ہو گی ، جب تک وہ اس قمیص کو اُتار نہیں دیتا ، اے عالیہ سے تعلق رکھنے والے فرد ! اللہ تعالیٰ کی شان اس سے بلند و برتر ہے کہ وہ کسی ایسے فرد کا عمل یا اس کی نماز قبول کرے ، جس کے جسم پر حرام کی قمیص ہو ۔ “
یہ روایت امام بزار نے نقل کی ہے اس کی سند میں ایک راوی ابوجنوب ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی حج کرنے کے لیے نکلتا ہے اور اس کی رقم پاکیزہ ( یعنی حلال ) ہو ، تو جب وہ اپنا پاؤں رکاب میں رکھتا ہے اور پکار کر یہ کہتا ہے : میں حاضر ہوں ، اے اللہ ! میں حاضر ہوں ، تو آسمان سے ایک منادی پکار کر یہ کہتا ہے : تمہاری حاضری قبول ہوئی ، تمہیں شہادت نصیب ہوئی ، کیونکہ تمہارا زاد سفر حلال ہے ، تمہاری سواری حلال ہے ، تمہارا حج نیکی والا ہے اس میں کوئی گناہ نہیں ہے ۔ اور جب کوئی شخص ناجائز آمدن کے ذریعے نکلتا ہے اور اپنا پاؤں لگام میں رکھتا ہے اور بلند آواز میں پکار کر کہتا ہے : میں حاضر ہوں ، تو آسمان سے منادی یہ کہتا ہے : نہ تمہاری حاضری قبول ہے نہ تمہیں سعادتمندی نصیب ہوئی ، تمہارا زاد سفر حرام ہے ، تمہارا خرچ حرام ہے اور تمہارا حج نیکی والا نہیں ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی سلیمان بن داؤد یمامی ہے اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالی دنیا اسے بھی دیتا ہے جسے وہ پسند کرتا ہے اور ( اُسے بھی دیتا ہے ) جسے وہ پسند نہیں کرتا ، لیکن وہ دین صرف اُسے دیتا ہے جسے وہ پسند کرتا ہے خدا کی قسم ! جس کے دست قدرت میں میری جان ہے ، بندہ اس وقت تک مسلمان نہیں ہوتا جب تک اس کا دل مسلمان نہ ہو اور بندہ اس وقت تک مومن نہیں ہوتا ، جب تک اس کا پڑوسی اس کی زیادتی سے محفوظ نہ ہو ، لوگوں نے دریافت کیا : اس کی زیادتی سے مراد کیا ہے ؟ نبی اکرم صلی اللہ علیہ وسلم نے ارشاد فرمایا : اس کا زیادتی کرنا اور ظلم کرنا ، اگر بندہ حرام طور پر مال کما کر اسے صدقہ کرے تو وہ اس کی طرف سے قبول نہیں ہو گا اور اگر وہ اس میں سے خرچ کرے تو اس کے لیے اس میں برکت نہیں رکھی جائے گی ، اور اگر وہ اس مال کو اپنے پیچھے چھوڑ جائے تو وہ جہنم تک جانے کے لیے اس کا زاد سفر ہو گا ، بے شک اللہ تعالی برائی کو برائی کے ذریعے نہیں مٹاتا ہے بلکہ وہ برائی کو اچھائی کے ذریعے مٹاتا ہے ، خبیث چیز دوسری خبیث چیز کو نہیں مٹاتی ہے ، اگر کوئی شخص مال ناجائز طور پر کماتا ہے اور اسے ناحق طور پر خرچ کرتا ہے تو یہ ایک پیچیدہ بیماری ہے اور جو شخص مال جائز طریقے سے کماتا ہے اور اسے صحیح طور پر خرچ کرتا ہے تو اس کی مثال بارش کی مانند ہے جو نازل ہوتی ہے ۔ “ راوی بیان کرتے ہیں : اس کے بعد انہوں نے ایک کلمہ ذکر کیا تھا ، جو مجھے یاد نہیں رہا ۔

سیدنا عبداللہ بن عمر رضی اللہ عنہما بیان کرتے ہیں : جو شخص دس درہم کے عوض میں کوئی کپڑا خریدے اور ان میں سے ایک درہم حرام مال میں سے ہو تو وہ کپڑا جب تک اس کے جسم پر رہے گا اللہ تعالیٰ اس کی نماز قبول نہیں کرے گا ۔ “ راوی بیان کرتے ہیں : اس کے بعد انہوں نے اپنی دو انگلیاں دونوں کانوں میں داخل کیں اور فرمایا : یہ دونوں بہرے ہو جائیں اگر میں نے نبی اکرم صلی اللہ علیہ وسلم کو یہ بات ارشاد فرماتے ہوئے نہ سنا ہو ۔
یہ روایت امام أحمد نے ہاشم کے حوالے سے سیدنا عبداللہ بن عمر رضی اللہ عنہما سے نقل کی ہے اور ہاشم نامی راوی سے میں واقف نہیں ہوں اس روایت کے بقیہ رجال کی توثیق کی گئی ہے ، اگرچہ بقیہ نامی راوی مدلس ہے ۔

سیدنا ابوطفیل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص حرام طور پر مال کما کر اس کے ذریعے غلام آزاد کرے یا اس کے ذریعے صلہ رحمی کرے تو یہ گناہ ہو گا ۔ “
یہ روایت امام طبرانی نے نقل کی ہے اس کی سند میں ایک راوی محمد بن ابان جعفی ہے اور وہ ضعیف ہے ۔