مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا گزر ایک مردار بکری کے پاس سے ہوا ، جس کے مالکان نے اسے پھینک دیا تھا ، آپ نے ارشاد فرمایا : ” اس ذات کی قسم ! جس کے دست قدرت میں میری جان ہے ، دنیا اللہ تعالیٰ کے نزدیک اس سے زیادہ بے حیثیت ہے جتنی یہ یعنی بکری اپنے مالکان کے نزدیک بے حیثیت ہے ۔ “
یہ روایت امام أحمد ، امام ابویعلیٰ اور امام بزار نے نقل کی ہے اس کی سند میں ایک راوی محمد بن مصعب ہے جس کے ضعیف ہونے کے باوجود اس کی توثیق کی گئی ہے ، اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک خارش زدہ مردار بکری کے پاس سے ہوا ، جس کے مالکان نے اسے نکال دیا تھا ، نبی اکرم صلی اللہ علیہ وسلم نے دریافت کیا : کیا تم لوگ یہ سمجھتے ہو ؟ کہ یہ ( بکری ) اپنے مالکان کے نزدیک بے حیثیت ہے ؟ لوگوں نے عرض کی : جی ہاں ! نبی اکرم صلی اللہ علیہ وسلم نے ارشاد فرمایا : ” دنیا اللہ تعالی کے نزدیک اس سے زیادہ بے حیثیت ہے جتنی یہ ( بکری ) اپنے مالکان کے نزدیک بے حیثیت ہے ۔ “
یہ روایت امام أحمد نے نقل کی ہے ، اس کی سند میں ایک راوی ابومہزم ہے جسے جمہور نے ضعیف قرار دیا ہے اس روایت کے بقیہ رجال صحیح کے رجال ہیں ۔

سیدنا عبداللہ بن ربیعہ اسلمی رضی اللہ عنہ بیان کرتے ہیں : نبی اکرم صلی اللہ علیہ وسلم سفر کر رہے تھے ، اسی دوران آپ نے ایک اذان دینے والے کی آواز سنی جو یہ کہہ رہا تھا : میں اس بات کی گواہی دیتا ہوں کہ اللہ تعالی کے علاوہ کوئی معبود نہیں ہے ، نبی اکرم صلی اللہ علیہ وسلم نے فرمایا : میں بھی اس بات کی گواہی دیتا ہوں کہ اللہ تعالیٰ کے علاوہ کوئی معبود نہیں ہے ، مؤذن نے کہا: میں اس بات کی گواہی دیتا ہوں کہ سیدنا محمد صلی اللہ علیہ وسلم اللہ کے رسول ہیں ، نبی اکرم صلی اللہ علیہ وسلم نے فرمایا : میں بھی اس بات کی گواہی دیتا ہوں کہ سیدنا محمد صلی اللہ علیہ وسلم اللہ کے رسول ہیں ، پھر نبی اکرم صلی اللہ علیہ وسلم نے ارشاد فرمایا : تم اسے یا تو چرواہا پاؤ گے یا یہ کوئی ایسا فرد ہو گا جو گھر سے دور ہو ۔ جب نبی اکرم صلی اللہ علیہ وسلم نشیبی علاقے کی طرف اُترے تو آپ نے ایک مردار بکری پائی جس کو پھینک دیا گیا تھا ، نبی اکرم صلی اللہ علیہ وسلم نے ارشاد فرمایا : ” کیا تم یہ سمجھتے ہو ؟ کہ یہ اپنے مالکان کے نزدیک بے حیثیت ہے ؟ دنیا اللہ تعالی کے نزدیک اس سے زیادہ ہے حیثیت ہے جتنی یہ ( بکری ) اپنے مالکان کے نزدیک بے حیثیت ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک قوم کے کچرے کے پاس سے ہوا ، جہاں ایک مردار بکری موجود تھی ، نبی اکرم صلی اللہ علیہ وسلم نے ارشاد فرمایا : کیا اس کے مالکان کو اس کی ضرورت نہیں ہو گی ؟ لوگوں نے عرض کی : یا رسول اللہ ! اگر اس کے مالکان کو اس کی ضرورت ہوتی تو انہوں نے اسے پھینکنا نہیں تھا ، نبی اکرم صلی اللہ علیہ وسلم نے ارشاد فرمایا : ” دنیا اللہ تعالیٰ کے نزدیک اس سے زیادہ بے حیثیت ہے ، جتنی یہ بکری اپنے مالکان کے نزدیک بے حیثیت ہے اور میں اس ( یعنی دنیا ) کو ایسی حالت میں ہرگز نہ پاؤں ، کہ اُس نے تم میں سے کسی کو ہلاکت کا شکار کر دیا ہو ۔ “
یہ روایت امام بزار نے نقل کی ہے اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک مردار بکری کے پاس سے ہوا تو آپ صلی اللہ علیہ وسلم نے ارشاد فرمایا : ” دنیا اللہ تعالیٰ کے نزدیک اس سے زیادہ بے حیثیت ہے ، جتنی یہ ( یعنی بکری ) اپنے مالکان کے نزدیک بے حیثیت ہے ۔ “
یہ روایت امام بزار نے نقل کی ہے اور اس کے رجال کی توثیق کی گئی ہے ۔

سیدنا ابوموسیٰ رضی اللہ عنہ بیان کرتے ہیں : نبی اکرم صلی اللہ علیہ وسلم ایک مردار بکری کے پاس سے گزرے تو آپ صلی اللہ علیہ وسلم نے ارشاد فرمایا : کیا تم لوگ یہ سمجھتے ہو کہ یہ اپنے مالکان کے نزدیک بے حیثیت تھی ؟ اسی لئے انہوں نے اسے پھینک دیا ہے ؟ لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ” دنیا اللہ تعالی کے نزدیک اس سے زیادہ بے حیثیت ہے جتنی یہ ( یعنی بکری ) اپنے مالکان کے نزدیک بے حیثیت ہے جب انہوں نے اسے پھینک دیا تھا ۔ “
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی وہب بن یحیی بن زمام علاف ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم تشریف لے جا رہے تھے ، آپ کے ساتھ آپ کے کچھ اصحاب بھی تھے ، آپ مدینہ منورہ کے ایک راستے سے گزر رہے تھے ، آپ کا گزر کسی کے گھر کے باہر والے حصے کے پاس سے ہوا تو وہاں ان لوگوں نے اپنی ایک مردار بکری باہر پھینکی ہوئی تھی ، نبی اکرم صلی اللہ علیہ وسلم اس کے پاس ٹھہر گئے اور اس کی طرف دیکھنے لگے ، پھر آپ اپنے اصحاب کی طرف متوجہ ہوئے اور آپ نے دریافت کیا : کیا تم یہ سمجھتے ہو ، یہ اپنے مالکان کے نزدیک بے حیثیت ہے ، جبھی انہوں نے اس کو پھینک دیا ہے ؟ لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ” اللہ کی قسم ! دنیا اللہ کے نزدیک اس سے زیادہ بے حیثیت ہے جتنی یہ بکری اپنے مالکان کے نزدیک بے حیثیت ہے ، جب انہوں نے اسے پھینک دیا ۔ “
یہ روایت امام طبرانی نے اسی طرح معجم کبیر اور معجم اوسط میں نقل کی ہے اور اس کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اس ذات کی قسم ! جس کے دست قدرت میں میری جان ہے ، بے شک دنیا اللہ تعالی کے نزدیک اس سے زیادہ بے حیثیت ہے جتنی یہ بکری اپنے مالکان کے نزدیک بے حیثیت ہے ، اگر اللہ تعالی کے نزدیک دنیا کی حیثیت رائی کے دانے کے وزن کے برابر ہوتی تو اللہ تعالی نے دنیا اپنی مخلوق میں سے صرف اپنے اولیاء اور اپنے محبوب بندوں کو ہی دینی تھی ۔ “
یہ روایت امام طبرانی نے نقل کی ہے اس کی سند میں ایک راوی یحیی بن عبداللہ بابلتی ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر دنیا اللہ تعالیٰ کے نزدیک مچھر کے پر کے برابر ہوتی تو اس نے دنیا میں سے کافر کو کوئی بھی چیز نہیں دینی تھی ۔ “
یہ روایت امام بزار نے نقل کی ہے اس کی سند میں ایک راوی صالح مولیٰ توامہ ہے اور وہ ثقہ ہے لیکن وہ اختلاط کا شکار ہو گیا تھا ، اس روایت کے بقیہ رجال ثقہ ہیں ۔