مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ فرماتا ہے : جو شخص میرے کسی ولی کے ساتھ دشمنی رکھتا ہے وہ میرے ساتھ جنگ کو حلال قرار دے دیتا ہے ۔ “ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری حدیث ذکر کی ہے ۔
یہ روایت امام بزار نے نقل کی ہے روایت کے الفاظ ان کی نقل کردہ ہیں ، اسے امام أحمد نے اور امام طبرانی نے معجم اوسط میں نقل کیا ہے اس کی سند میں ایک راوی عبدالواحد بن قیس ہے جسے ایک سے زیادہ افراد نے ثقہ قرار دیا ہے اور دیگر لوگوں نے اسے ضعیف کہا: ہے امام أحمد کے بقیہ رجال صحیح کے رجال ہیں اور معجم اوسط میں امام طبرانی کے رجال بھی ایسے ہیں ، صرف ان کے استاد ہارون بن کامل کا معاملہ مختلف ہے ۔

نبی اکرم صلی اللہ علیہ وسلم کی زوجہ محترمہ سیدہ میمونہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” اللہ تعالیٰ فرماتا ہے : جو شخص میرے ولی کو اذیت پہنچاتا ہے وہ میرے ساتھ جنگ کو حلال قرار دے دیتا ہے اور میرا بندہ کسی ایسی چیز کے ذریعے میرا قرب حاصل نہیں کرتا ، جو میرے مقرر کردہ فرض کی ادائیگی جیسی ہوا اور بندہ نوافل کے ذریعے میرا قرب حاصل کرتا ہے یہاں تک کہ میں اس سے محبت کرنے لگتا ہوں اور جب میں اس سے محبت کرتا ہوں تو میں اس کے پاؤں بن جاتا ہوں ، جن سے وہ چلتا ہے ، اس کا ہاتھ بن جاتا ہوں ، جس کے ذریعے وہ پکڑتا ہے ، اس کی زبان بن جاتا ہوں ، جس کے ذریعے وہ گفتگو کرتا ہے ، اس کا دل بن جاتا ہوں جس کے ذریعے وہ سمجھتا ہے ، اگر وہ مجھ سے مانگے تو میں اسے عطا کرتا ہوں ، اگر وہ مجھ سے دعا مانگے تو میں وہ قبول کرتا ہوں ، مجھے کسی بھی کام کو کرنے کے بارے میں اتنا تردد نہیں ہوتا ، جتنا مجھے اپنے بندے کی موت کے حوالے سے تردد ہوتا ہے ، وہ موت کو ناپسند کرتا ہے اور جو چیز اسے بری لگے ، میں بھی اسے ناپسند کرتا ہوں ۔ “
یہ روایت امام ابویعلیٰ نے نقل کی ہے اس کی سند میں ایک راوی یوسف بن خالد سمتی ہے اور وہ کذاب ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کے حوالے سے ، سیدنا جبرائیل علیہ السلام کے حوالے سے اللہ تعالیٰ کا یہ فرمان نقل کرتے ہیں : ” جو شخص میرے ولی کی توہین کرتا ہے وہ مجھے جنگ کی دعوت دیتا ہے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی عمر بن سعید ابوحفص دمشقی ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ فرماتا ہے : جو شخص میرے ولی سے دشمنی رکھتا ہے وہ میرے ساتھ جنگ کرتا ہے ۔ “ ( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے پوری حدیث ذکر کی ہے ۔
یہ روایت امام طبرانی نے نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔