مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص بھوکا ہو یا محتاج ہو اور وہ لوگوں سے اُس چیز کو چھپائے ، اور اس کا معاملہ اللہ کے سپرد کر دے ، تو اللہ تعالیٰ کے ذمہ یہ بات لازم ہے کہ اُسے حلال طریقے سے ایک سال کی خوراک عطا کرے ۔ “
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی اسماعیل بن رجاء حصنی ہے جسے امام دارقطنی رحمہ اللہ نے ضعیف قرار دیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس گھر کے افراد تین دن تک بھوک پر صبر کرتے ہیں ، تو اللہ تعالیٰ انہیں رزق نصیب کر دیتا ہے ۔ “
یہ روایت امام ابویعلیٰ نے نقل کی ہے اور اس کے رجال کی توثیق کی گئی ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کو اپنے مال یا جان کے بارے میں کوئی مصیبت لاحق ہو ، اور وہ اُس کو چھپا لے اور لوگوں کے سامنے اس کی شکایت نہ کرے ، تو اللہ تعالیٰ کے ذمہ یہ بات لازم ہے کہ اس شخص کی مغفرت کر دے ۔ “
یہ روایت امام طبرانی نے معجم اوسط میں نقل کی ہے اور اس کے رجال کی توثیق کی گئی ہے ۔

سیدنا ابوہریرہ رضی اللہ عنہ بیان کرتے ہیں : ایک شخص اپنے گھر آیا جب اس نے گھر والوں کی بھوک کو دیکھا تو باہر چلا گیا ، جب اس کی بیوی نے یہ صورتحال دیکھی تو اس نے چکی رکھی تنور جلایا اور پھر یہ کہا: اے اللہ ! تو ہمیں رزق نصیب فرما ! جب اس عورت نے نظر کی تو پیالہ بھرا ہوا تھا ، وہ عورت تنور کی طرف گئی ، تو اس نے اس کو بھی بھرا ہوا پایا ، عورت کا شوہر واپس آیا ، اس نے دریافت کیا : کیا میرے بعد تمہیں کوئی چیز ملی ہے ؟ اس کی بیوی نے کہا: جی ہاں ! ہمارے پروردگار کی طرف سے ملی ہے ، وہ شخص چکی کے پاس گیا اور اس نے اُسے اٹھا لیا ( یعنی اس کو گھومنے سے روک دیا ) پھر اس نے اس بات کا تذکر نبی اکرم صلی اللہ علیہ وسلم کے سامنے کیا ، تو آپ صلی اللہ علیہ وسلم نے ارشاد فرمایا : ” اگر یہ شخص اُس کو نہ اُٹھاتا ( یعنی نہ روکتا ) تو وہ قیامت کے دن تک گھومتی رہتی ۔ “
یہ روایت امام أحمد اور امام بزار نے نقل کی ہے ، انہوں نے یہ الفاظ نقل کیے ہیں : ” اس کی بیوی نے کہا: اے اللہ ! تو ہمیں وہ عطا فرما دے جسے ہم پیس لیں اور جس کو گوندھ لیں اور جس کی روٹی پکا لیں ، تو وہ برتن روٹیوں سے بھر گیا اور چکی آٹا پیسنے لگی اور تنو بھی بھنے ہوئے گوشت سے بھر گیا ، اس عورت کا شوہر آیا اور اس نے دریافت کیا : تمہارے پاس کوئی چیز ہے ؟ اس عورت نے جواب دیا : اللہ تعالیٰ نے رزق عطا کیا ہے ، اس شخص نے چکی کو اٹھایا اور اس کے اردگرد جھاڑو دی ، نبی اکرم صلی اللہ علیہ وسلم نے ارشاد فرمایا : ” اگر یہ اُس کو رہنے دیتا ، تو وہ قیامت کے دن تک پیستی رہتی ۔ “
یہ روایت امام طبرانی نے معجم اوسط میں اس کی مانند نقل کی ہے اور ان کے رجال صحیح کے رجال ہیں ، صرف امام بزار اور امام طبرانی کے استادوں کا معاملہ مختلف ہے اور وہ دونوں ثقہ ہیں ۔

سیدنا ابوہریرہ رضی اللہ عنہ بیان کرتے ہیں : ایک مرتبہ ایک شخص اور اس کی بیوی خالی گھر میں تھے ان کے پاس ( کھانے کے لئے ) کوئی بھی چیز نہیں تھی وہ شخص سفر سے آیا تھا وہ اپنی بیوی کے پاس آیا تو وہ بھوکا تھا اسے شدید بھوک لگی ہوئی تھی اس نے اپنی بیوی سے دریافت کیا : کیا تمہارے پاس کوئی چیز ہے ؟ اس عورت نے جواب دیا : جی ہاں ! آپ یہ خوشخبری قبول کریں کہ اللہ تعالیٰ نے آپ کو رزق دیا ہے ، اس شخص نے کہا: تمہارا ستیاناس ہو ، اگر تمہارے پاس کوئی چیز ہے تو مجھے لا کر دو ! اس عورت نے کہا: اچھا تھوڑی دیر ہمیں اللہ کی رحمت سے امید ہے ، جب زیادہ دیر گزر گئی ، تو اس شخص نے کہا: تمہارا ستیاناس ہو ، تم اُٹھو اور اگر روٹی ہے تو میرے لیے لے کر آؤ ، کیونکہ مجھے شدید بھوک لاحق ہو چکی ہے ، اس عورت نے کہا: اچھا میں نے ابھی تنور جلایا ہے ، آپ جلدی نہ کریں ، جب کچھ دیر تک اس شخص نے اس عورت کو کچھ نہیں کہا: ، اور پھر وہ وقت ہوا کہ وہ عورت کو کچھ کہتا ، تو اس عورت نے سوچا اگر میں اُٹھ کر اپنے تنور کا جائزہ لوں ، تو یہ مناسب ہو گا ، وہ اٹھی تو اس نے اپنے تنور کو پایا کہ اس میں بکری کے پہلو کا گوشت بھرا ہوا تھا ، اور عورت کی چکی آٹا پیس رہی تھی ، وہ چکی کے پاس گئی ، اس نے اس چکی کو روکا اور تنور میں سے بکری کے پہلو کا گوشت نکالا ۔ سیدنا ابوہریرہ رضی اللہ عنہ فرماتے ہیں : اس ذات کی قسم ! جس کے دست قدرت میں سیدنا ابوالقاسم صلی اللہ علیہ وسلم کی جان ہے ، نبی اکرم صلی اللہ علیہ وسلم نے یہ ارشاد فرمایا : اگر وہ عورت اس چکی کو نہ روکتی ، تو وہ چکی قیامت کے دن تک آٹا پیستی رہتی ۔ “