مجمع الزوائد ومنبع الفوائد

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے جو بھی چیز پیدا کی ہے ، تو اس نے کوئی ایسی چیز بھی پیدا کی ہے ، جو اس ( پہلی والی ) پر غالب آ جائے ، اس نے اپنی رحمت کو پیدا کیا ہے ، جو اس کے غضب پر غالب آ جائے ۔ “
یہ روایت امام بزار نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے دریافت کیا : اے جبرائیل ! کیا تمہارا پروردگار صلوۃ پڑھتا ہے ، اس کا ذکر جلیل القدر ہے ، اور اس کی بزرگی بلند و برتر ہے ، جبرائیل نے جواب دیا : جی ہاں ! میں نے دریافت کیا : اس کی صلوٰۃ کیا ہے ؟ جبرائیل نے جواب دیا : ” ہر عیب سے پاک ہے ، پاکیزگی والا ہے ، میری رحمت میرے غضب پر سبقت لے گئی ہے ۔ “
یہ روایت امام طبرانی نے معجم صغیر میں اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر تم لوگ اللہ تعالیٰ کی رحمت کی مقدار کے بارے میں جان لو ، تو تم اس پر تکیہ کر لو ۔ “ ( یہاں ایک لفظ کے بارے میں راوی کو شک ہے ) ۔
یہ روایت امام بزار نے نقل کی ہے اور اس کی سند حسن ہے ۔

سیدنا جندب رضی اللہ عنہ بیان کرتے ہیں : ایک دیہاتی آیا ، اس نے اپنی سواری کو بٹھایا ، پھر اسے باندھ دیا ، جب نبی اکرم صلی اللہ علیہ وسلم نے نماز ادا کر لی ، تو وہ شخص اپنی سواری کے پاس آیا اس کی بندش کو کھولا اس پر سوار ہوا ، اور پھر اس نے بلند آواز میں کہا: اے اللہ ! تو مجھ پر اور سیدنا محمد ( صلی اللہ علیہ وسلم ) پر رحم فرما اور ہم پر رحم کرنے میں ، کسی کو شریک نہ کرنا ، تو نبی اکرم صلی اللہ علیہ وسلم نے فرمایا : تم لوگ کیا سمجھتے ہو ؟ یہ زیادہ گمراہ ہے یا اس کا اونٹ ؟ کیا تم نے سنا نہیں ؟ جو اس نے کہا: ہے ، لوگوں نے جواب دیا : جی ہاں ! ( یعنی ہم نے اس کی بات سنی ہے ) نبی اکرم صلی اللہ علیہ وسلم نے فرمایا : ” تم نے اللہ تعالیٰ کی وسیع رحمت کو تنگ کر دیا ہے ، اللہ تعالیٰ نے رحمت کے 100 حصے بنائے ہیں اور ان میں سے ایک حصہ نازل کیا ہے ، جس کی وجہ سے مخلوق ، یعنی جنات ، انسان ، جانور وغیرہ ایک دوسرے پر رحم کرتے ہیں ، اور رحمت کے ننانوے حصے اللہ تعالیٰ کے پاس ہیں ، تو تم لوگ کیا سمجھتے ہو ؟ یہ زیادہ گمراہ ہے یا اس کا اونٹ ؟ “ ۔
( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد اور امام طبرانی نے نقل کی ہے ، امام أحمد کے رجال ” صحیح “ کے رجال ہیں ، صرف ابوعبداللہ جشمی کا معاملہ مختلف ہے ، ویسے کسی نے اسے ضعیف قرار نہیں دیا ہے ۔

حسن بصری بیان کرتے ہیں : مجھ تک یہ روایت پہنچی ہے : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ کی ایک سو رحمتیں ہیں ، جن میں سے ایک رحمت ، اُس نے اہل زمین کے درمیان تقسیم کی ہے ، اور وہ ان سب کے لئے کفایت کر گئی ہے ، اور رحمت کے 99 حصے اس نے اپنے پاس سنبھال کے رکھے ہیں ، جو اس نے اپنے دوستوں پر رحمت کے لئے رکھے ہیں رحمت کا جو ایک حصہ اس نے اہل زمین کے درمیان تقسیم کیا ہے ، اللہ تعالیٰ اسے لے کر اپنے پاس موجود 99 حصوں کے ساتھ ملائے گا اور ایک سو حصے مکمل کر لے گا ، اور یہ قیامت کے دن اُس کے دوستوں کے لئے ہوں گے ۔ “

سیدنا ابوہریرہ رضی اللہ عنہ نے نبی اکرم صلی اللہ علیہ وسلم کے حوالے سے اس کی مانند روایت نقل کی ہے ۔ یہ تمام روایات امام أحمد نے نقل کی ہیں ۔

خلاس کے حوالے سے اس کی مانند روایت منقول ہے ۔

محمد بن سیرین کے حوالے سے اس کی مانند روایت منقول ہے ۔ ” مرسل “ روایات کے رجال اور سیدنا ابوہریرہ رضی اللہ عنہ کی ” مسند “ روایت کے رجال ، یہ سب ” صحیح “ کے رجال ہیں ۔

سیدنا معاویہ بن حیده رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ نے رحمت کے 100 حصے بنائے ہیں ، ان میں سے ایک حصہ ، اس کی مخلوق کے درمیان ہے ، جس کی وجہ سے وہ ایک دوسرے پر رحم کرتے ہیں ، اور 99 حصے اُس نے اپنے دوستوں کے لئے سنبھال کے رکھے ہیں ۔ “
یہ روایت امام طبرانی نے نقل کی ہے ، اس کی سند میں ایک راوی مخیس بن تمیم ہے اور وہ مجہول ہے ، اس روایت کے بقیہ رجال ” ثقہ “ ہیں ۔

سیدنا عبادہ بن صامت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہمارے پروردگار نے رحمت کے 100 اجزاء کیے ہیں ، اُن میں سے ایک جزء زمین میں نازل کیا ہے ، اور اسی ایک جزء کی وجہ سے لوگ اور پرندے اور جانور ایک دوسرے پر رحم کرتے ہیں ، رحمت کے بقیہ 99 حصے پروردگار کے پاس ہیں ، جو قیامت کے دن اس کے بندوں کے لئے ہوں گے ۔ “
یہ روایت امام طبرانی نے نقل کی ہے ، اسحاق بن یحیی نامی راوی نے ، سیدنا عبادہ رضی اللہ عنہ کا زمانہ نہیں پایا ہے ، اسحاق کے علاوہ اس روایت کے بقیہ رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ نے رحمت کے 100 حصے کیے ہیں ، ان میں سے ایک حصہ مخلوق کے درمیان تقسیم کیا ہے ، اور ننانوے حصے قیامت کے دن کے لیے ہیں ۔
یہ روایت امام طبرانی نے اور امام بزار نے نقل کی ہے اور اس کی سند حسن ہے ۔

فرزدق بن غالب بیان کرتے ہیں : شام میں ، میری ملاقات سیدنا ابوہریرہ رضی اللہ عنہ سے ہوئی ، انہوں نے مجھ سے دریافت کیا : تم فرزدق ہو ، میں نے جواب دیا : جی ہاں ! انہوں نے دریافت کیا : تم شاعر ہو ؟ میں نے جواب دیا : جی ہاں ! انہوں نے فرمایا : اگر تم زندہ رہ گئے ، تو تمہارا سامنا ایسے لوگوں سے ہو گا ، جو یہ کہیں گے : تمہارے لئے توبہ کی گنجائش نہیں ہے ، لیکن تم اس بات سے بچ کے رہنا کہ اللہ کی رحمت سے ، تمہاری امید منقطع ہو جائے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صالح مری ہے اور وہ حدیث میں ضعیف ہے ۔