مجمع الزوائد ومنبع الفوائد

سیدنا عبداللہ بن عمرو رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم تشریف لائے آپ صلی اللہ علیہ وسلم نے ارشاد فرمایا : ” اللہ تعالیٰ کے لیے کسی بھی گناہ کی مغفرت کر دینا بڑی بات نہیں ہے ، تم سے پہلے زمانے میں ایک شخص تھا جس نے 98 افراد کو قتل کیا تھا ، وہ ایک راہب کے پاس گیا اور بولا: میں نے 98 افراد کو قتل کیا ہے ، کیا تم میرے لئے توبہ کی گنجائش پاتے ہو ؟ اس راہب نے اس سے کہا: تم نے بڑی زیادتی کی ( یعنی تمہارے لئے توبہ کی گنجائش نہیں ہے ) وہ شخص اُٹھ کر راہب کے پاس گیا اور اسے بھی قتل کر دیا ، پھر وہ ایک اور راہب کے پاس گیا اور بولا: میں نے 99 افراد کو قتل کیا ہے ، کیا تم تم میرے لئے توبہ کی گنجائش پاتے ہو ؟ اس راہب نے کہا: جی نہیں ! تم نے بڑی زیادتی کی ہے ، وہ شخص اُٹھ کر اس کی طرف بڑھا اور اسے بھی قتل کر دیا ، پھر وہ ایک اور راہب کے پاس گیا اور بولا: میں نے 100 افراد کو قتل کیا ہے ، کیا تم میرے لئے توبہ کی گنجائش پاتے ہو ؟ اس راہب نے کہا: تم نے بڑی زیادتی کی ہے ، مجھے نہیں معلوم ( کہ اس کا حکم کیا ہو گا ؟ ) البتہ یہ ہے کہ یہاں دو بستیاں ہیں ، ایک بستی کا نام ” بصرہ “ ہے اور دوسری بستی کا نام ” کفرہ “ ہے ، جہاں تک ” بصرہ“ نامی بستی کا تعلق ہے ، تو وہاں کے رہنے والے لوگ اہل جنت کا سا عمل کرتے ہیں اور اس بستی میں ان کے علاوہ اور کوئی نہیں رہ سکتا جہاں تک ” کفرہ “ نامی بستی کا تعلق ہے ، تو وہاں کے لوگ اہل جہنم کے سے عمل کرتے ہیں ، اور وہاں ان کے علاوہ کوئی اور نہیں رہ سکتا ، تو تم ” بصرہ “ کے رہنے والوں کی طرف چلے جاؤ ، اگر تم وہاں ٹھہر گئے ، اور وہاں کے لوگوں کی مانند عمل کرنے لگے ، تو تمہیں اپنی توبہ کے بارے میں کوئی شک نہیں ہو گا ، وہ شخص اس بستی کی طرف جانے کے لئے روانہ ہوا ، جب وہ دونوں بستیوں کے درمیان پہنچا ، تو اُسے موت نے آ لیا ، فرشتوں نے اپنے پروردگار سے اس شخص کے بارے میں دریافت کیا : تو پروردگار نے فرمایا : تم اس بات کا جائزہ لو کہ وہ دونوں بستیوں میں سے کون سی بستی کے زیادہ قریب ہے ؟ اور پھر اسے اس بستی والوں میں نوٹ کر لینا ، تو فرشتوں نے اس شخص کو پایا کہ وہ چند پوروں کے فاصلے جتنا ” بصرہ “ نامی بستی کے زیادہ قریب تھا ، تو اس کا شمار اُس بستی والوں میں کیا گیا ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں ، صرف عبدالرحمن بن زیاد بن انعم کا معاملہ مختلف ہے ایک جماعت نے اسے ضعیف قرار دیا ہے اور ایک سے زیادہ افراد نے اسے ثقہ کہا: ہے ۔

ابوعبد رب بیان کرتے ہیں : انہوں نے سیدنا معاویہ بن ابوسفیان رضی اللہ عنہ کو منبر پر یہ بات بیان کرتے ہوئے سنا : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک شخص نے اپنے اوپر ظلم کیا ( یعنی گناہ کا ارتکاب کیا ) اس کی ملاقات دوسرے شخص سے ہوئی ، تو پہلے شخص نے بتایا کہ اس نے 99 قتل کیے ہیں ، اور وہ سب ظلم کے طور پر کیے ہیں ، تو کیا میرے لئے توبہ کی گنجائش ہے ؟ دوسرے شخص نے جواب دیا : جی نہیں ! پہلے شخص نے اسے بھی قتل کر دیا ، پھر وہ پہلا شخص ایک اور فرد کے پاس آیا ، اس نے بتایا کہ میں نے 100 قتل کیے ہیں اور وہ سب ظلم کے طور پر کیے ہیں ، کیا تم میرے لئے توبہ کی گنجائش پاتے ہو ؟ اس فرد نے کہا: اگر میں تمہیں یہ کہوں کہ اللہ تعالیٰ توبہ کرنے والے کی توبہ قبول نہیں کرتا ہے ، تو میں تمہیں یہ غلط کہوں گا ، یہاں کچھ لوگ ہیں ، جو عبادت کرتے ہیں ، تو ان کے پاس جاؤ اور ان کے ہمراہ اللہ تعالیٰ کی عبادت کرو ، وہ شخص ان لوگوں کی طرف جانے کے لئے روانہ ہوا ، راستے میں وہ مر گیا ، رحمت کے فرشتے اور عذاب کے فرشتے اکٹھے ہوئے ( کہ اس کو اپنے قبضے میں لیں ) تو اللہ تعالیٰ نے ان کی طرف ایک فرشتہ بھیجا ، اس فرشتے نے یہ کہا: تم دونوں جگہوں کے درمیان والے حصے کو ناپ لو ، یہ دونوں میں سے ، جس کے زیادہ قریب ہو گا ، ان میں سے ایک شمار ہو گا ، تو انہوں نے یہ بات پائی کہ وہ شخص توبہ کرنے والوں کے عبادت خانے کے چند پوروں جتنا زیادہ قریب تھا ، تو اللہ تعالیٰ نے اس کی مغفرت کر دی ۔ “
یہ روایت امام طبرانی نے دو اسناد کے ساتھ نقل کی ہے ، ان دونوں میں سے ایک کے رجال ” صحیح “ کے رجال ہیں ، صرف ابوعبد رب کا معاملہ مختلف ہے اور وہ ثقہ ہے ،
یہ روایت امام ابویعلیٰ نے بھی اس کی مانند نقل کی ہے ۔

ابوقیس ، جو بنو جمح کے غلام ہیں ، وہ بیان کرتے ہیں : میں نے سیدنا ابوزمعہ بلوی رضی اللہ عنہ کو سنا ہے ، یہ بیعت رضوان میں شرکت کا شرف رکھتے ہیں اور انہوں نے درخت کے نیچے نبی اکرم صلی اللہ علیہ وسلم کی بیعت کی تھی ، وہ ایک دن ” فسطاط “ کی مسجد میں تشریف لائے اور صحن میں کھڑے ہو گئے ، انہیں سیدنا عبداللہ بن عمرو رضی اللہ عنہ کے بارے میں یہ بات پتہ چلی تھی کہ وہ بعض مسائل میں سختی کرتے ہیں ، تو انہوں نے فرمایا : تم لوگوں کو سختی کا شکار نہ کرو ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک شخص نے بنی اسرائیل سے تعلق رکھنے والے 97 افراد کو قتل کر دیا ، پھر وہ ایک راہب کے پاس گیا اور بولا: میں نے 97 افراد کو قتل کیا ہے ، کیا تم میرے لئے توبہ کی گنجائش پاتے ہو ؟ اس راہب نے کہا: جی نہیں ! اس شخص نے اس راہب کو بھی قتل کر دیا ، پھر وہ ایک اور راہب کے پاس گیا اور بولا: میں نے 98 افراد کو قتل کیا ہے ، کیا تم میرے لئے توبہ کی گنجائش پاتے ہو ؟ اس راہب نے بھی یہ جواب دیا : جی نہیں ! اس شخص نے اسے بھی قتل کر دیا ، پھر وہ تیسرے راہب کے پاس گیا اور بولا: میں نے 99 افراد کو قل کیا ہے ، جن میں سے دو راہب بھی تھے ، کیا تم میرے لئے توبہ کی گنجائش پاتے ہو ؟ اس راہب نے کہا: تم نے برا کام کیا ہے ، لیکن اگر میں یہ کہوں کہ اللہ تعالیٰ مغفرت کرنے والا ، رحم کرنے والا نہیں ہے ، تو میری یہ بات غلط ہو گی ، تم اللہ تعالیٰ کی بارگاہ میں توبہ کرو ! اس شخص نے کہا: تمہاری اس بات کے بعد اب میں تم سے جدا نہیں ہوؤں گا ، اس کے بعد وہ اس راہب کے ساتھ رہنے لگا ، اس شرط پر کہ وہ اس کی نافرمانی نہیں کرے گا ، وہ اس کی خدمت کرتا رہا ، یہاں تک کہ ایک دن ایک شخص مر گیا ، اس کی مذمت بیان کی گئی تھی ، جب اس شخص کو دفن کر دیا گیا ، تو وہ ( تائب ہونے والا قاتل شخص ) اس کی قبر پر بیٹھ کبر بہت رویا ، پھر ایک اور شخص کا انتقال ہوا ، اس کی تعریفیں کی گئی تھیں ، جب اس شخص کو دفن کیا گیا ، تو ( تائب ہونے والا قاتل شخص ) اس کی قبر پر بیٹھا اور بہت زیادہ ہنسا ، اس کے ساتھیوں کو اس پر اعتراض ہوا ، وہ لوگ اپنے سربراہ کے پاس اکٹھے ہوئے اور بولے : یہ ( تائب ہونے والا قاتل شخص ) آپ کے پاس کیسے رہ سکتا ہے ؟ جبکہ اس نے کئی لوگوں کو قتل کیا ہوا ہے ، اور اب اس نے جو کچھ کیا ہے ، وہ آپ نے دیکھ لیا ہے ، تو اس راہب کے اور اس کے ساتھیوں کے دل میں اس شخص کے حوالے سے الجھن پیدا ہوئی ، ایک مرتبہ وہ شخص ان کے سربراہ کے پاس آیا ، اس کے ساتھ اس کا ساتھی بھی تھا ، اس نے اس کے ساتھ بات چیت کی ، اس شخص نے راہب سے دریافت کیا : آپ مجھے کیا حکم دیتے ہیں ؟ راہب نے کہا: تم جاؤ اور تنور دہکاؤ ! اس شخص نے ایسا ہی کیا ، پھر اس نے آ کر راہب کو اس بارے میں بتایا کہ وہ ایسا کر چکا ہے ، اس راہب نے کہا: تم جاؤ اور خود کو اس تنور میں ڈال دو ! راہب اس شخص کے حوالے سے غافل ہوا ، وہ شخص گیا اور اس نے خود کو تنور میں ڈال دیا ، پھر جب راہب کو یاد آیا ، تو اس نے کہا: میرا خیال ہے ، اس شخص نے میرے کہنے پر ، اپنے آپ کو تنور میں ڈال دیا ہو گا ، پھر وہ راہب گیا ، تو اس نے اس شخص کو پایا کہ وہ تنور میں زندہ موجود ہے ، اور اسے پسینہ آ رہا ہے ، راہب نے اس کا ہاتھ پکڑ کر اُسے تنور سے باہر نکالا اور بولا: اب یہ مناسب نہیں ہے کہ تم میری خدمت کرو ، بلکہ اب میں تمہاری خدمت کروں گا ، لیکن تم مجھے یہ بتاؤ ! کہ تم پہلے فوت ہونے والے شخص پر روئے کیوں تھے ؟ اور دوسرے والے پر ہنسے کیوں تھے ؟ اس شخص نے بتایا : جہاں تک پہلے فرد کا تعلق ہے ، تو جب اسے دفن کیا گیا تو میں نے دیکھا کہ جو بری صورتحال اس پر ڈالی جا رہی ہے ، تو مجھے اپنے گناہوں کا خیال آ گیا اور میں رونے لگا ، جہاں تک دوسرے فرد کا تعلق ہے ، تو میں نے دیکھا کہ اس پر بھلائی ڈالی جا رہی ہے ، تو میں ہنسنے لگا ، وہ شخص بعد میں بنی اسرائیل کے اکابرین ( یعنی بڑے عبادت گزاروں ) میں ایک شمار ہوا ۔ “
یہ روایت امام طبرانی نے نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : ” دو بستیاں تھیں ، ان میں سے ایک نیک تھی اور دوسری ظالم تھی ، ایک شخص نیک بستی کی طرف جانے کے ارادے کے ساتھ ظالم بستی سے نکلا ، جہاں اللہ کو منظور تھا ، وہاں اُسے موت نے آ لیا ، اس کے بارے میں فرشتے اور شیطان کے درمیان جھگڑا ہو گیا ، شیطان نے کہا: اللہ کی قسم ! اس نے کبھی میری نافرمانی نہیں کی ، فرشتے نے کہا: لیکن یہ توبہ کے ارادے سے نکلا تھا ، تو ان دونوں کے درمیان یہ فیصلہ دیا گیا کہ اس بات کا جائزہ لیا جائے کہ وہ دونوں بستیوں میں سے کون سی بستی کے زیادہ قریب تھا ؟ تو فرشتوں نے یہ بات پائی کے وہ نیک بستی کے ایک بالشت زیادہ قریب تھا ، تو اس شخص کی مغفرت ہو گئی ۔ “ معمر بیان کرتے ہیں : میں نے کسی کو یہ بیان کرتے ہوئے سنا ہے : ” اللہ تعالیٰ نے اسے نیک بستی کے قریب کر دیا تھا ۔ “
یہ روایت امام طبرانی نے ” موقوف “ روایت کے طور پر نقل کی ہے ، اور اس کے رجال ” صحیح“ کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے وہ حدیث گزر چکی ہے ، جس میں یہ مذکور ہے : ” ایک شخص نے اپنی اولاد کو یہ تلقین کی تھی کہ جب وہ مر جائے تو وہ اولاد اسے جلا دے ۔ “ یہ کتاب التوبہ کے آغاز میں ، اس باب میں ذکر ہوئی ہے ، باب : جو شخص اپنے گناہوں سے خوفزدہ ہو ۔ اس روایت کا ایک اور عجیب طریق شفاعت سے متعلق ابواب میں آئے گا ، اگر اللہ نے چاہا ۔