مجمع الزوائد ومنبع الفوائد

سیدنا زید بن ارقم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ( اللہ تعالیٰ فرماتا ہے : ) تم لوگ میرے ان بندوں کو جو عارف ہیں ، توحید کے قائل ہیں اور گناہگار ہیں ، انہیں جنت یا جہنم میں نہ ٹھہراؤ ! یہاں تک کہ میں اُن کے بارے میں اپنے علم کے مطابق انہیں ٹھہراؤں گا ، اور تم اس حوالے سے اس چیز کا خود کو پابند نہ بناؤ ، جس کا تمہیں مکلف نہیں کیا گیا ہے ، اور لوگوں کے پروردگار کو چھوڑ کر اُن لوگوں کو محاسبہ نہ کرو ۔ “
یہ روایت امام طبرانی نے نقل کی ہے ، اس کی سند میں ایک راوی نفیع بن حارث ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : جب واجب کرنے والی آیات نازل ہوئیں ، جیسے یہ آیت ہے : ” بے شک وہ لوگ جو یتیموں کا مال ظلم کے طور پر کھاتے ہیں ۔ “ یا یہ آیت ہے : ” وہ لوگ جو سود کھاتے ہیں ۔ “ یا یہ آیت ہے : ” اور جو شخص کسی مومن کو جان بوجھ کر قتل کر دے گا تو اس کا بدلہ جہنم ہو گا ۔ “ سیدنا عبداللہ بن عمر رضی اللہ عنہما بیان کرتے ہیں : ہم لوگ یہ گواہی دیا کرتے تھے کہ جو شخص ان میں سے کسی کام کا ارتکاب کر لے گا ، وہ جہنم میں جائے گا ، یہاں تک کہ جب اللہ تعالیٰ کا یہ فرمان نازل ہوا : ” بے شک اللہ تعالیٰ اس بات کی مغفرت نہیں کرے گا کہ کسی کو اس کا شریک قرار دیا جائے ، اس کے علاوہ وہ جس کی چاہے گا مغفرت کر دے گا ۔ “ سیدنا عبداللہ بن عمر رضی اللہ عنہما کہتے ہیں : تو اس کے بعد ہم گواہی دینے سے رک گئے اور ہم ان لوگوں کے حوالے سے اندیشے کا شکار ہو گئے اس چیز کی وجہ سے جو اللہ تعالیٰ نے ان کے لئے واجب قرار دی ہے ۔
یہ روایت امام طبرانی نے نقل کی ہے ، اس کی سند میں ایک راوی ابوعصمہ ہے اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : ہم مومن کو قتل کرنے والے شخص کے بارے میں یہ کہا: کرتے تھے کہ جب وہ مر جائے گا تو جہنم میں جائے گا اور جو شخص کسی کبیرہ گناہ کا مرتکب ہو اور پھر وہ اسی حال میں مر جائے ، اس کے بارے میں ہم یہ کہتے تھے کہ وہ جہنم میں جائے گا ، یہاں تک کہ یہ آیت نازل ہو گئی : ” بے شک اللہ تعالیٰ اس چیز کی مغفرت نہیں کرے گا کہ کسی کو اس کا شریک قرار دیا جائے ، اس کے علاوہ جس کی چاہے گا مغفرت کر دے گا ۔ راوی کہتے ہیں : تو ہم ان لوگوں کے لئے کوئی چیز واجب نہیں کرتے تھے اور ہم ان کے لیے امید رکھتے تھے اور ان کے بارے میں اندیشے کا بھی شکار تھے ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عمر بن مغیرہ ہے اور وہ مجہول ہے ، اس روایت کے بقیہ رجال ” صحیح “ کے رجال ہیں ، انہوں نے اس کو ایک اور سند کے ساتھ بھی نقل کیا ہے ، جس میں ایک راوی عمر بن بریدہ سیاری ہے اور میں اس سے واقف نہیں ہوں ، اس کے حوالے سے
یہ روایت مسلم بن خالد زنگی سے منقول ہے جس کی توثیق کی گئی ہے ، اس روایت کے بقیہ رجال ” صحیح“ کے رجال ہیں ۔

سیدنا عبداللہ رضی اللہ عنہ کے بارے میں یہ بات منقول ہے ، وہ فرماتے ہیں : ” ہم کبیرہ گناہ کے مرتکبین افراد کے لئے ( یعنی جہنم ) واجب قرار دیا کرتے تھے ، یہاں تک کہ یہ آیت نازل ہو گئی : ” بے شک اللہ تعالیٰ اس چیز کی مغفرت نہیں کرے گا کہ کسی کو اس کا شریک ٹھہرایا جائے ، اس کے علاوہ وہ جس کی چاہے گا مغفرت کر دے گا ۔ “ راوی کہتے ہیں : تو نبی اکرم صلی اللہ علیہ وسلم نے ہمیں اس بات سے منع کر دیا کہ ہم توحید کے قائل افراد میں سے کسی ایک کے لئے جہنم کو واجب قرار دیں ۔
یہ روایت امام طبرانی نے نقل کی ہے ، اس کی سند میں ایک راوی ابورجاء کلبی ہے اور میں اس سے واقف نہیں ہوں ، اس روایت کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک شخص نماز ادا کر رہا تھا ، ایک اور شخص اس کے پاس آیا ، اور اس نے اس کی گردن پر پاؤں رکھ دیا ، تو جو شخص پاؤں کے نیچے تھا اس نے کہا: اللہ کی قسم ! اللہ تعالی تمہاری کبھی مغفرت نہیں کرے گا ، اللہ تعالیٰ نے فرمایا : میرے بندے نے میرے بارے میں یہ قسم اٹھائی ہے کہ میں اپنے دوسرے بندے کی مغفرت نہیں کروں گا ؟ میں نے اس کی مغفرت کر دی ۔ “
یہ روایت امام طبرانی نے دو اسناد کے ساتھ نقل کی ہے ، ان دونوں میں سے ایک کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : ” لوگوں کی تعریف کرتے ہوئے ، یا اُن کی مذمت کرتے ہوئے جلدبازی سے کام نہ لو ! کیونکہ یہ ہو سکتا ہے کہ آج تمہیں اپنے بھائی کی طرف سے کوئی ایسی چیز نظر آ رہی ہو ، جو تمہیں اچھی لگ رہی ہو ، اور یہ ہو سکتا ہے کہ کل وہ تمہیں بری لگے ، اور یہ بھی ہو سکتا ہے کہ تمہیں آج اس کی طرف سے کوئی چیز بری لگ رہی ہو ، اور کل کو وہ اچھی لگنے لگے ، لوگ غلط فہمی کا شکار ہو جاتے ہیں اور قیامت کے دن اللہ تعالیٰ گناہوں کی مغفرت کر دے گا ، جب بندہ اللہ تعالیٰ کی بارگاہ میں حاضر ہو گا ، اللہ تعالیٰ اپنے بندے پر اس سے زیادہ مہربان ہو گا ، جتنا کسی شخص کی ماں مہربان ہوتی ہے ، جو زمین پر اپنے بچے کے لیے بچھونا بچھاتی ہے ، اور پھر اس پر ہاتھ پھیر کر دیکھتی ہے کہ اگر اس میں کوئی کانٹا ہو ، تو وہ بچے سے پہلے اُس کے ہاتھ پہ لگ جائے ، اور اگر کوئی ڈنک مارنے والا جانور ہو ، تو وہ بچے سے پہلے اُسے ڈنک مار لے ۔ “
یہ روایت امام طبرانی نے نقل کی ہے اور اس کی سند منقطع ہے ۔ ( علامہ ہیثمی فرماتے ہیں : ) میں یہ کہتا ہوں : اس بارے میں کچھ احادیث آگے چل کر کبیرہ گناہ کے مرتکب افراد کے لیے دعائے مغفرت کرنے سے متعلق باب میں آئیں گی ۔