مجمع الزوائد ومنبع الفوائد

سیدنا جریر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو رحم نہیں کرتا ، اس پر رحم نہیں کیا جاتا ، جو معاف نہیں کرتا ، اس کی مغفرت نہیں ہوتی ، جو توبہ نہیں کرتا اس کی توبہ قبول نہیں ہوتی ۔ “
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ایک حصہ مذکور ہے ۔
یہ روایت امام طبرانی نے نقل کی ہے اور امام أحمد نے اختصار کے ساتھ نقل کی ہے ، جس میں یہ الفاظ ہیں : ” جو توبہ نہیں کرتا اس کی توبہ قبول نہیں ہوتی ۔ “ امام أحمد کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو رحم نہیں کرتا ، اُس پر رحم نہیں کیا جاتا ۔ “
یہ روایت امام طبرانی نے دو اسناد کے ساتھ نقل کی ہے ، اور ان دونوں میں سے ایک حسن ہے ،
یہ روایت امام بزار نے نقل کی ہے ۔
( علامہ ہیثمی فرماتے ہیں : ) میں یہ کہتا ہوں : اس موضوع سے متعلق کچھ صحیح احادیث نیکی اور صلہ رحمی سے متعلق کتاب میں ، رحمت سے متعلق باب میں گزر چکی ہیں ۔