مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل مشرق میں سب سے بہتر عبدالقیس ( یعنی اس قبیلے کے لوگ ) ہیں ۔ “
یہ روایت امام بزار اور امام طبرانی نے نقل کی ہے ، اس کی سند میں ایک راوی وہب بن یحیی بن زمام ہے اور میں اُس سے واقف نہیں ہوں ۔ اس روایت کے بقیہ رجال ” ثقہ “ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اہل مشرق میں سب سے بہتر عبدالقیس ( یعنی اس قبیلے کے لوگ ) ہیں ۔ “
یہ روایت امام طبرانی نے معجم اوسط میں نقل کی ہے اور اس کے رجال ” ثقہ “ ہیں ۔

سیدنا نوح بن مخلد رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم اس وقت مکہ میں تھے ، نبی اکرم صلی اللہ علیہ وسلم نے دریافت کیا : تمہارا تعلق کس سے ہے ؟ انہوں نے جواب دیا : میں ضبیعہ بن ربیعہ سے تعلق رکھتا ہوں ، نبی اکرم صلی اللہ علیہ وسلم نے فرمایا : ربیعہ میں سب سے بہتر عبدالقیس قبیلہ ہے ، اور پھر وہ قبیلہ ہے جس سے تم تعلق رکھتے ہو ، راوی کہتے ہیں : پھر نبی اکرم صلی اللہ علیہ وسلم نے اس کے ہمراہ کچھ ساز و سامان بھی یمن بھیجا ۔
یہ روایت امام طبرانی نے معجم کبیر اور معجم اوسط میں نقل کی ہے ، تاہم انہوں نے یہ الفاظ نقل کئے ہیں : ” نبی اکرم صلی اللہ علیہ وسلم نے ان کے ہمراہ ایک لشکر میں سامان بھیجا ۔ ۔ ۔ ۔ ۔ ۔ “ ۔ اس روایت کی سند میں ایسے راوی ہیں ، جن سے میں واقف نہیں ہوں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں اُس شخص کا مقابل فریق ہوؤں گا جو عبدالقیس ( یعنی اس قبیلے کے افراد ) کے ساتھ زیادتی کرے گا“ ۔
یہ روایت امام بزار اور امام طبرانی نے نقل کی ہے اور اس کی سند میں ایسے راوی ہیں جن سے میں واقف نہیں ہوں ۔