مجمع الزوائد ومنبع الفوائد

سیدنا طارق بن شہاب رضی اللہ عنہ بیان کرتے ہیں : ایک مرتبہ ” بجیلہ “ قبیلے کا وفد نبی اکرم صلی اللہ علیہ وسلم کی خدمت میں حاضر ہوا ، تو نبی اکرم صلی اللہ علیہ وسلم نے فرمایا : بجیلہ قبیلے کے لوگوں کا نام نوٹ کرو اور احمس قبیلے کے لوگوں سے آغاز کرو ! راوی بیان کرتے ہیں : اس قبیلے کا ایک فرد پیچھے رہ گیا ، راوی کہتے ہیں : میں اس بات کا جائزہ لے رہا تھا کہ اب نبی اکرم صلی اللہ علیہ وسلم ان کے لئے کیا کہتے ہیں ؟ راوی بیان کرتے ہیں : تو نبی اکرم صلی اللہ علیہ وسلم نے ان لوگوں کے لئے پانچ مرتبہ دعا کی : ” اے اللہ ! ان پر رحمت نازل فرما ! “ ۔ یا شاید یہی الفاظ تھے : ” اے اللہ ! ان میں برکت رکھ دے ۔ “ یہ شک مخارق نامی راوی کو ہے ۔

ایک روایت میں یہ الفاظ ہیں : ” احمس قبیلے کے اور قیس قبیلے کے لوگوں کا وفد نبی اکرم صلی اللہ علیہ وسلم کی خدمت میں حاضر ہوا تو نبی اکرم صلی اللہ علیہ وسلم نے ارشاد فرمایا : قیس قبیلے سے پہلے احمس قبیلے کے لوگوں کو آنے دو ! پھر آپ صلی اللہ علیہ وسلم نے احمس قبیلے کے لوگوں کے لئے دعا کرتے ہوئے یہ کہا: ” اے اللہ ! تو احمس قبیلے کے لوگوں ، اُن کے گھڑ سواروں اور ان کے پیادہ افراد میں برکت رکھ دے ! “ ۔ ( راوی بیان کرتے ہیں : ) یہ کلمات آپ صلی اللہ علیہ وسلم نے سات مرتبہ ارشاد فرمائے ۔
یہ تمام روایات امام أحمد نے نقل کی ہیں ، امام طبرانی نے ان کا کچھ حصہ نقل کیا ہے ، تاہم انہوں نے یہ الفاظ نقل کئے ہیں : ” میں قبیلے سے پہلے احمس قبیلے کے لوگوں کو آنے دو ! “ ۔ ان دونوں کے رجال ” صحیح “ کے رجال ہیں ۔

سیدنا خالد بن عرفطہ بیان کرتے ہیں : میں نے نبی اکرم صلی اللہ علیہ وسلم کو دونوں ہاتھ بلند کر کے یہ دعا کرتے ہوئے دیکھا ہے : ” اے اللہ ! تو احمس قبیلے کے گھڑ سواروں اور ان کے پیادہ افراد پر برکت نازل فرما ! “ ۔
یہ روایت امام طبرانی نے نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔