مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” فرشتوں نے اپنی رضامندی سے اسلام قبول کیا اور انصار نے اپنی رضامندی سے اسلام قبول کیا اور عبدالقیس نے اپنی رضامندی سے اسلام قبول کیا ۔ “
یہ روایت امام طبرانی نے معجم اوسط میں اپنے استاد علی بن سعید بن بشیر کے حوالے سے نقل کی ہے اس میں کمزوری پائی جاتی ہے اس روایت کے بقیہ رجال ثقہ ہیں ۔

سیدنا سعید بن عبادہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک انصار کا یہ قبیلہ محنۃ ( یعنی آزمائش ) ہے ، ان سے محبت رکھنا ایمان ہے اور ان سے بغض رکھنا منافقت ہے ۔ “
یہ روایت امام أحمد اور امام طبرانی نے اور امام بزار نے نقل کی ہے امام أحمد کے رجال میں ایک ایسا راوی ہے ، جس کا نام بیان نہیں کیا گیا اور باقی دو افراد نے اسے ساقط کیا ہے امام أحمد کے بقیہ رجال ثقہ ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مجھ سے محبت رکھتا ہے ، وہ انصار سے محبت رکھے گا ، جو شخص مجھ سے بغض رکھتا ہے وہ انصار سے بغض رکھے گا ، کوئی منافق ان سے محبت نہیں رکھے گا اور کوئی مومن ان سے بغض نہیں رکھے گا ، جو ان سے محبت رکھے گا اللہ تعالیٰ اس سے محبت رکھے گا اور جو ان سے بغض رکھے گا ، اللہ تعالیٰ اس سے بغض رکھے گا ، لوگ اوپری لباس ہیں اور انصار اندرونی لباس ہیں ، اگر لوگ ایک گھاٹی میں چلیں ، اور انصار دوسری گھاٹی میں چلیں ، تو ” میں “ انصار کی گھاٹی میں چلوں گا ۔ “ ( علامہ ہیثمی فرماتے ہیں : میں یہ کہتا ہوں : ان صحابی کے حوالے سے ” صحیح “ میں ایک حدیث مذکور ہے جو اس روایت کے علاوہ ہے ۔
یہ روایت امام بزار نے دو اسناد کے ساتھ نقل کی ہے ان دونوں میں ایک راوی عطیہ ہے اس کی نقل کردہ حدیث کو اس کے ضعیف ہونے کے باوجود نوٹ کیا جائے گا ، اس روایت کے بقیہ رجال صحیح کے رجال ہیں ۔

سیدنا ابوسعید خدری رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” ایسا کوئی شخص انصار سے بغض نہیں رکھے گا جو اللہ تعالیٰ اور آخرت کے دن پر ایمان رکھتا ہو ۔ “
یہ روایت امام أحمد نے مختلف اسانید کے ساتھ نقل کی ہے ، جن میں سے زیادہ تر کے رجال صحیح کے رجال ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” انصار سے محبت رکھنا ایمان ہے اور ان سے بغض رکھنا منافقت ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : جب نبی اکرم صلی اللہ علیہ وسلم نے قریش کو مختلف عطیات عطا کیے ، اور عربوں کے دیگر قبائل کو بھی دیے ، اور انصار کو ان میں سے کچھ بھی نہیں دیا ، تو انصار کو اس حوالے سے کچھ الجھن ہوئی ، یہاں تک کہ انہوں نے اس بارے میں بات چیت کی ، ان میں سے کسی نے یہ کہا: نبی اکرم صلی اللہ علیہ وسلم کی ملاقات اپنی قوم سے ہو گئی ہے ، سیدنا سعد بن عبادہ رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے ، انہوں نے عرض کی : یا رسول اللہ انصار کے اس قبیلے کو آپ کے اس طرز عمل کے حوالے سے کچھ الجھن ہے جو آپ نے اس مال فئے کے بارے میں کیا ہے ، جو مال آپ کو حاصل ہوا ہے ، جسے آپ نے اپنی قوم میں تقسیم کر دیا ہے اور آپ نے عربوں کے مختلف قبائل کے لوگوں کو بڑے ، بڑے عطیات سے نوازا ہے ، لیکن انصار کے لوگوں کو کچھ بھی نہیں دیا ، نبی اکرم صلی اللہ علیہ وسلم نے دریافت کیا : اے سعد ! تمہارا اس بارے میں کیا خیال ہے ؟ انہوں نے عرض کی : یا رسول اللہ ! میں بھی اپنی قوم کا ایک فرد ہوں اور میں ان میں سے ایک ہوں ، نبی اکرم صلی اللہ علیہ وسلم نے فرمایا : تم اپنی قوم کو میرے لئے کسی جگہ پر جمع کرو ، راوی کہتے ہیں : سیدنا سعد رضی اللہ عنہ وہاں سے نکلے ، انہوں نے لوگوں کو ایک جگہ پر جمع کیا ، راوی بیان کرتے ہیں : مہاجرین سے تعلق رکھنے والے ایک صاحب آئے انہوں نے ان لوگوں کو چھوڑ دیا ، پھر وہ لوگ اندر آئے ، پھر بعض اور لوگ آئے ، انہوں نے انہیں واپس کر دیا ، جب وہ لوگ اکٹھے ہو گئے تو سیدنا سعد رضی اللہ عنہ نبی اکرم صلی اللہ علیہ وسلم کے پاس آئے اور عرض کی : میں نے انصار کے قبیلے کے لوگوں کو آپ کے لئے اکٹھا کروا دیا ہے ، راوی بیان کرتے ہیں : نبی اکرم صلی اللہ علیہ وسلم ان لوگوں کے پاس آئے ، آپ صلی اللہ علیہ وسلم نے اللہ تعالیٰ کی حمد و ثناء بیان کی ، جو اُس کی شان کے لائق ہے ، پھر آپ صلی اللہ علیہ وسلم نے ارشاد فرمایا :
” اے انصار کے گروہ ! وہ بات کیا ہے ؟ جو تمہارے حوالے سے مجھ تک پہنچی ہے اور وہ الجھن کیا ہے جو تم اپنے من میں محسوس کر رہے ہو ؟ کیا ایسا نہیں ہے کہ تم لوگ گمراہ تھے ، تو اللہ تعالیٰ نے تمہیں ہدایت نصیب کی ، تم لوگ تنگ دست تھے تو اللہ تعالیٰ نے تمہیں خوشحال کر دیا ، تم ایک دوسرے کے دشمن تھے تو اس نے تمہارے درمیان الفت پیدا کر دی ، ان لوگوں نے عرض کی : جی ہاں ! اللہ اور اس کے رسول کا احسان سب سے زیادہ اور فضل سب سے زیادہ ہے ، نبی اکرم صلی اللہ علیہ وسلم نے فرمایا : اے انصار کے گروہ ! تم لوگ مجھے جواب کیوں نہیں دیتے ؟ ان لوگوں نے عرض کی : یا رسول اللہ ! ہم آپ کو کیا جواب دیں ؟ جبکہ احسان اور فضل ، اللہ اور اس کے رسول کے لئے مخصوص ہے ، نبی اکرم صلی اللہ علیہ وسلم نے فرمایا : اللہ کی قسم ! اگر تم چاہو تو یہ کہ سکتے ہو ، اور تم سچ بولو گے اور تمہاری بات کی تصدیق کی جائے گی کہ آپ صلی اللہ علیہ وسلم ہمارے پاس ایسی حالت میں آئے تھے کہ آپ کو جھٹلایا جا رہا تھا ، تو ہم نے آپ کی تصدیق کی ، آپ کو پرے کر دیا گیا تھا ، تو ہم نے آپ کی مدد کی ، آپ کو نکال دیا گیا تو ہم نے آپ کو پناہ دی ، آپ تنگی کا شکار تھے ، تو ہم نے آپ کے ساتھ اچھا سلوک کیا ، اے انصار کے گروہ ! کیا تم اپنے من میں دنیا کے ساز و سامان کے حوالے سے الجھن رکھتے ہو ؟ میں نے اس کے حوالے سے کچھ لوگوں کی تالیف قلب کی ہے تاکہ وہ مسلمان ہو جائیں ، اور میں نے تم لوگوں کو تمہارے اسلام کے سپرد کر دیا ہے ، اے انصار کے گروہ ! کیا تم اس بات سے راضی نہیں ہو ؟ کہ لوگ بھیڑ بکریاں اور اونٹ لے جائیں گے اور تم لوگ اللہ کے رسول صلی اللہ علیہ وسلم کو اپنی رہائشی جگہ پر واپس لے جاؤ ، اس ذات کی قسم ! جس کے دست قدرت میں محمد صلی اللہ علیہ وسلم کی جان ہے ، اگر ہجرت نہ ہوتی تو میں انصار سے تعلق رکھنے والا ایک فرد ہوتا ، اور اگر لوگ ایک گھاٹی میں چلیں گے تو میں انصار کی گھاٹی میں چلوں گا ، اے اللہ ! انصار پر رحم فرما ، انصار کے بچوں پر ، انصار کے بچوں کے بچوں پر رحم فرما ۔ “
راوی کہتے ہیں : تو حاضرین نے رونا شروع کر دیا ، یہاں تک کہ ان کی داڑھیاں تر ہو گئیں ، انہوں نے عرض کی : ہم اللہ کے رسول صلی اللہ علیہ وسلم کی تقسیم اور حصے سے راضی ہیں ، پھر نبی اکرم صلی اللہ علیہ وسلم واپس تشریف لے گئے اور وہ لوگ بھی ادھر اُدھر چلے گئے ۔

سیدنا ابوسعید خدری رضی اللہ عنہ ہی کے حوالے سے منقول ایک روایت میں یہ الفاظ ہیں : ” انصار سے تعلق رکھنے والے ایک شخص نے اپنے ساتھیوں سے کہا: اللہ کی قسم ! میں تم لوگوں کو کہا: کرتا تھا کہ جب معاملات ٹھیک ہو جائیں گے تو نبی اکرم صلی اللہ علیہ وسلم تمہارے ساتھ ترجیحی سلوک کریں گے ، راوی کہتے ہیں : تو ان لوگوں نے اس کو سختی سے منع کیا ، راوی بیان کرتے ہیں : جب نبی اکرم صلی اللہ علیہ وسلم کو اس بات کی اطلاع ملی تو آپ ان کے پاس تشریف لائے اور آپ نے انہیں مختلف باتیں ارشاد فرمائیں ، جو مجھے یاد نہیں رہیں ، تو لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : تو تم لوگ پہلے گھوڑوں پر سواری نہیں کیا کرتے تھے ؟ جب بھی نبی اکرم صلی اللہ علیہ وسلم اُن سے کوئی بات فرماتے تھے تو وہ یہی کہتے تھے : جی ہاں ! یا رسول اللہ ! جب آپ صلی اللہ علیہ وسلم نے یہ دیکھا کہ وہ آپ کو کوئی جواب نہیں دے رہے ہیں ۔ ۔ ۔ ۔ ۔ ۔ ۔ ( علامہ ہیثمی فرماتے ہیں : ) میں یہ کہتا ہوں : اس کے بعد راوی نے حسب سابق روایت ذکر کی ہے جس میں یہ الفاظ ہیں : انصار میرے رازدار ( یا انتہائی قریبی ) ہیں ، میرے اہل بیت ہیں اور میری پناہ گاہ ہیں ، جس کی ” میں “ پناہ میں آیا ، تو تم اُن کے برے لوگوں سے درگزر کرو اور ان کی اچھائی قبول کرو ۔ “ سیدنا ابوسعید خدری رضی اللہ عنہ کہتے ہیں : میں نے سیدنا معاویہ رضی اللہ عنہ سے کہا: نبی اکرم صلی اللہ علیہ وسلم نے ہمیں یہ حدیث بیان کی تھی کہ ہم عنقریب ترجیحی سلوک دیکھیں گے ، سیدنا معاویہ رضی اللہ عنہ نے دریافت کیا : پھر نبی اکرم صلی اللہ علیہ وسلم نے تم لوگوں کو کیا ہدایت کی ؟ میں نے کہا: نبی اکرم صلی اللہ علیہ وسلم نے ہمیں یہ ہدایت کی کہ ہم صبر سے کام لیں ، تو سیدنا معاویہ رضی اللہ عنہ نے کہا: تو پھر تم لوگ صبر سے کام لو ۔

ایک روایت میں یہ الفاظ ہیں : ” تم لوگ صبر سے کام لینا ، یہاں تک کہ حوض پر تمہاری ملاقات مجھ سے ہو جائے ۔ “ یہ تمام روایات امام أحمد نے نقل کی ہیں ، امام ابویعلیٰ نے اس میں سے پہلی روایت نقل کی ہے جس میں یہ الفاظ ہیں : ” انصار سے تعلق رکھنے والے ایک شخص نے اپنے ساتھیوں سے کہا: ۔ ۔ ۔ ۔ ۔ ۔ “ ۔ پہلی روایت جو امام أحمد نے نقل کی ہے اس کے رجال صحیح کے رجال ہیں ، صرف محمد بن اسحاق کا معاملہ مختلف ہے اور اس نے سماع کی صراحت کی ہے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں
یہ روایت اس سیاق کے بغیر مذکور ہے ۔

سیدنا ابوہریرہ رضی اللہ عنہ اور سیدنا ابوسعید خدری رضی اللہ عنہ کے حوالے سے اختصار کے ساتھ اس کی مانند روایت منقول ہے جو پہلے گزری ہے ۔
یہ روایت امام أحمد نے نقل کی ہے اور ان دونوں کے رجال صحیح کے رجال ہیں ، البتہ ابن اسحاق کا معاملہ مختلف ہے اور اس نے سماع کی صراحت کی ہے ۔

سیدنا جابر رضی اللہ عنہ بیان کرتے ہیں : جب نبی اکرم صلی اللہ علیہ وسلم نے حنین کو فتح کر لیا اور آپ نے اپنے دستوں کو بھیجا ، تو وہ لوگ اونٹ اور بکریاں لے کر آئے ، نبی اکرم صلی اللہ علیہ وسلم نے وہ سب چیزیں قریش میں تقسیم کر دیں ، ہمیں انصار کو اس حوالے سے الجھن ہوئی اس بات کی اطلاع نبی اکرم صلی اللہ علیہ وسلم کو ملی ، نبی اکرم صلی اللہ علیہ وسلم نے ہمیں اکٹھا کیا اور آپ نے ہمیں خطبہ دیتے ہوئے ارشاد فرمایا : ” کیا تم لوگ اس بات سے راضی نہیں ہو ؟ کہ تمہیں اللہ کے رسول صلی اللہ علیہ وسلم دیدیے گئے ہیں ، اللہ کی قسم ! اگر لوگ ایک وادی میں چلیں ، اور تم لوگ ایک گھاٹی میں چلو ، تو میں تمہاری گھاٹی میں جاؤں گا “ لوگوں نے عرض کی : ہم راضی ہیں ، یا رسول اللہ ! اے سیدنا محمد ! اللہ تعالیٰ آپ پر درود نازل کرے ۔ “
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے اور وہ حسن الحدیث ہے ، اس روایت کے بقیہ رجال صحیح کے رجال ہیں ۔

سیدنا سائب بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم کو اللہ تعالیٰ نے ” ہوازن “ کے مال غنیمت میں سے غزوہ حنین میں مال فئے عطا کیا تھا ، وہ آپ نے تقسیم کر دیا ، آپ نے وہ ( مال و اسباب ) قریش سے تعلق رکھنے والے اہل مکہ اور دیگر لوگوں کے درمیان تقسیم کیا ، اس بات پر انصار غصے میں آ گئے ، جب نبی اکرم صلی اللہ علیہ وسلم کو اس بات کی اطلاع ملی تو آپ ان کی رہائشی جگہوں پر ان کے پاس تشریف لائے ، آپ نے ارشاد فرمایا : یہاں جو ایسا فرد موجو ہو ، جس کا تعلق انصار سے نہ ہو وہ نکل کر اپنی رہائشی جگہ پر چلا جائے ، پھر نبی اکرم صلی اللہ علیہ وسلم نے کلمہ شہادت پڑھا ، آپ صلی اللہ علیہ وسلم نے اللہ تعالیٰ کی حمد بیان کی پھر آپ نے ارشاد فرمایا :
” اے انصار کے گروہ ! اس مال غنیمت کے بارے میں تمہاری جو بات ہے ، وہ مجھ تک پہنچی ہے ، جس کے حوالے سے میں نے تمہارے ساتھ کچھ ترجیحی سلوک کیا ہے ، میں اس کے ذریعے ان لوگوں کو اسلام سے مانوس کرنا چاہتا تھا ہو سکتا ہے کہ وہ آج کے بعد ایسی کسی جنگ میں شریک نہ ہوں ، تو اللہ تعالیٰ ان کے دلوں میں اسلام داخل کر دے “ پھر نبی اکرم صلی اللہ علیہ وسلم نے ارشاد فرمایا :
” اے انصار کے گروہ ! کیا اللہ تعالیٰ نے ایمان کے ذریعے تم پر احسان نہیں کیا ؟ اور تمہیں خصوصی کرامت عطا نہیں کی اس نے تمہارا نام سب سے عمدہ رکھا ہے کہ اللہ کے مددگار ، اس کے رسول کے مددگار ، اگر ہجرت نہ ہوتی ، تو میں انصار سے تعلق رکھنے والا ایک فرد ہوتا ، اگر لوگ ایک وادی میں چلیں اور تم دوسری وادی میں چلو ، تو میں تمہاری وادی میں چلوں گا ، تو کیا تم اس چیز سے راضی نہیں ہو ؟ کہ لوگ اس مال غنیمت کو لے جائیں ، بھیڑ بکریاں اور اونٹ لے جائیں اور تم اللہ کے رسول صلی اللہ علیہ وسلم کو لے جاؤ “
جب انصار نے یہ بات سنی تو انہوں نے کہا: ہم راضی ہیں ، نبی اکرم صلی اللہ علیہ وسلم نے فرمایا : میں نے جو تمہیں کہا: ہے ، اس کے بارے میں تم مجھے جواب دو ، انصار نے عرض کی : یا رسول اللہ ! آپ نے ہمیں ظلمت میں پایا تھا ، تو اللہ تعالیٰ نے آپ کے ذریعے ہمیں اس میں سے نکال کر نور کی طرف لے گیا ، آپ نے ہمیں جہنم کے گڑھے کے کنارے پر پایا تھا ، تو اللہ تعالیٰ نے آپ کے ذریعے ہمیں اس سے بچا لیا ، آپ نے ہمیں گمراہ پایا تھا تو اللہ تعالیٰ نے ہمیں آپ کے ذریعے ہدایت نصیب کی ، ہم اللہ تعالیٰ کے پروردگار ہونے ، اسلام کے دین ہونے اور سیدنا محمد صلی اللہ علیہ وسلم کے نبی ہونے سے راضی ہیں ، یا رسول اللہ ! آپ جیسے چاہیں ، جو چاہیں کریں ، نبی اکرم صلی اللہ علیہ وسلم نے ارشاد فرمایا : اللہ کی قسم ! اگر تم مجھے اس کے علاوہ کوئی اور جواب دیتے تو میں یہ کہتا کہ تم نے ٹھیک کہا: ہے ، اگر تم یہ کہتے کہ کیا آپ ایسی حالت میں ہمارے پاس نہیں آئے تھے کہ آپ کو نکال دیا گیا تھا ، تو ہم نے آپ کو پناہ دی ، آپ کو جھٹلایا جا رہا تھا ، تو ہم نے آپ کی تصدیق کی ، آپ کو چھوڑ دیا گیا تو ہم نے آپ کی مدد کی ، اور لوگوں نے آپ کو جواب دیا تھا تو ہم نے آپ کو قبول کیا ، اگر تم لوگ یہ بات کہتے ، تو تم سچے ہوتے ، انصار نے کہا: بلکہ اللہ تعالیٰ اور اس کے رسول صلی اللہ علیہ وسلم کا فضل اور احسان ہے ، جو ہم پر ہے اور ہمارے علاوہ دوسرے لوگوں پر ہے ، پھر وہ لوگ رونے لگے ، یہاں تک کہ ان کا رونا بہت زیادہ ہو گیا ، نبی اکرم صلی اللہ علیہ وسلم بھی ان کے ساتھ رونے لگے پھر ان لوگوں کو اس حوالے سے زیادہ فخر محسوس ہوا اور یہ چیز ان کے نزدیک ہر قسم کے مال سے زیادہ فضیلت رکھتی تھی ، جو نبی اکرم صلی اللہ علیہ وسلم نے اُن سے فرمایا تھا ۔

یہ روایت امام طبرانی نے نقل کی ہے ، اس کی سند میں ایک راوی رشدین بن سعد ہے ، اس کی نقل کردہ حدیث ، دلوں کو نرم کرنے سے متعلق موضوعات اور اس جیسے دیگر موضوعات میں حسن شمار ہوتی ہے ، اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : غزوہ حنین میں نبی اکرم صلی اللہ علیہ وسلم کو مال غنیمت حاصل ہوا ، وہ آپ نے لوگوں کے درمیان تقسیم کیا تو انصار نے کہا: جنگ ہم کریں اور غنیمت دوسرے لوگوں کو مل جائے ، نبی اکرم صلی اللہ علیہ وسلم کو جب اس بات کی اطلاع ملی تو آپ نے انہیں پیغام بھیج کر بلوایا کہ تم لوگ اکٹھے ہو جاؤ ، پھر آپ ان لوگوں کے پاس تشریف لے گئے ، آپ نے فرمایا : اے انصار کے گروہ ! کیا تمہارے درمیان کوئی ایسا فرد ہے ؟ جو تمہارے علاوہ ہو ؟ ان لوگوں نے عرض کی : جی نہیں ! ہمارا ایک بھانجا ہے اور ہمارا ایک غلام ہے ، نبی اکرم صلی اللہ علیہ وسلم نے فرمایا : قوم کا بھانجا ، اُن کا ایک فرد ہوتا ہے ، اور قوم کا غلام ، اُن کا ایک فرد ہوتا ہے ، پھر نبی اکرم صلی اللہ علیہ وسلم نے ارشاد فرمایا : اے انصار کے گروہ ! کیا تم اس بات سے راضی نہیں ہو ؟ کہ لوگ بھیڑ بکریاں اور اونٹ لے جائیں اور تم لوگ سیدنا محمد صلی اللہ علیہ وسلم کو اپنے گھروں کی طرف لے جاؤ ، تو ان لوگوں نے عرض کی : ہم اس سے راضی ہیں ۔
یہ روایت امام طبرانی نے نقل کی ہے ، اس کی سند میں ایک راوی محمد بن جابر سحیمی ہے اور وہ ضعیف ہے ، ویسے اس کی توثیق کی گئی ہے ۔

عبداللہ بن جبیر بیان کرتے ہیں : نبی اکرم صلی اللہ علیہ وسلم نے انصار سے فرمایا : کیا تم لوگ اس بات سے راضی نہیں ہو ؟ کہ لوگ اوپر اوڑھنے والا لباس ہوں اور تم جسم کے ساتھ لگنے والا لباس ہو ، کیا تم اس بات سے راضی نہیں ہو کہ اگر لوگ ایک وادی میں چلیں اور تم دوسری میں چلو ، تو میں تمہاری وادی میں جاؤں گا اور لوگوں کو چھوڑ دوں گا ، اگر ایسا نہ ہوتا کہ اللہ تعالیٰ نے میرا نام مہاجرین میں شامل کیا ہے ، تو مجھے یہ بات پسند ہوتی کہ میں انصار سے تعلق رکھنے والا ایک فرد ہوتا ، تو ان لوگوں نے عرض کی : جی ہاں ! ہم اس بات سے راضی ہیں ۔
یہ روایت امام طبرانی نے نقل کی ہے ، عبداللہ بن جبیر کے بارے میں ایک قول یہ ہے کہ یہ تابعی ہیں اور یہ ثقہ ہیں ، اس روایت کے بقیہ رجال صحیح کے رجال ہیں ۔

سیدنا عباد بن بشیر انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے انصار کے گروہ ! تم لوگ جسم کے ساتھ لگنے والا لباس ہو ، دوسرے لوگ اوپری لباس ہیں اور مجھے تمہاری طرف سے کوئی اندیشہ نہیں ۔ “
یہ روایت امام طبرانی نے نقل کی ہے اس کی سند میں ایسا راوی ہے جس کے حوالے سے صرف ایک فرد نے روایت نقل کی ہے اس روایت کے بقیہ رجال ثقہ ہیں ۔

عبداللہ بن محمد بن عقیل بیان کرتے ہیں : سیدنا معاویہ رضی اللہ عنہ منورہ تشریف لائے ، وہاں سیدنا ابوقتادہ رضی اللہ عنہ سے ان کی ملاقات ہوئی تو انہوں نے فرمایا : نبی اکرم صلی اللہ علیہ وسلم نے ( انصار سے ) یہ ارشاد فرمایا تھا : ” تم لوگ میرے بعد ترجیحی سلوک کا سامنا کرو گے “ سیدنا معاویہ رضی اللہ عنہ نے دریافت کیا : تو نبی اکرم صلی اللہ علیہ وسلم نے آپ لوگوں کو کیا حکم دیا تھا ؟ سیدنا ابوقتادہ رضی اللہ عنہ نے بتایا : نبی اکرم صلی اللہ علیہ وسلم نے ہمیں یہ حکم دیا تھا کہ ہم صبر سے کام لیں ، تو سیدنا معاویہ رضی اللہ عنہ نے فرمایا : پھر آپ لوگ صبر سے کام لیں ۔
یہ روایت امام أحمد نے نقل کی ہے اور عبداللہ بن محمد بن عقیل نامی راوی حسن الحدیث ہے اس روایت کے بقیہ رجال صحیح کے رجال ہیں ۔

سیدنا ابوحمید ساعدی رضی اللہ عنہ بیان کرتے ہیں میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر نبی کا ایک قریبی گروہ ہوتا ہے اور میرا قریبی گروہ ، انصار کا یہ گروہ ہے ، اگر ہجرت نہ ہوتی ، تو میں انصار کا ایک فرد ہوتا ، اگر لوگ ایک وادی میں چلیں اور انصار ایک گھاٹی میں چلیں ، تو میں انصار کی گھاٹی میں چلوں گا ، انصار جسم کے ساتھ لگنے والا لباس ہیں اور لوگ اوپر اوڑھنے والا لباس ہیں ، جو شخص لوگوں کے کسی بھی معاملے کا نگران بنے ، اسے انصار کے اچھے فرد کے ساتھ اچھائی کرنی چاہیے اور ان کے برے فرد سے درگزر کرنا چاہیے ۔ “
یہ روایت امام بزار نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے آپ صلی اللہ علیہ وسلم نے ارشاد فرمایا : ” خبردار ! ہر نبی کے پسماندگان اور مقربین ہوتے ہیں اور میرے پسماندگان اور مقربین انصار ہیں ، تو تم ان کے بارے میں میری حفاظت کرنا ۔ “
یہ روایت امام طبرانی نے معجم اوسط میں نقل کی ہے اور اس کی سند عمدہ ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے کوئی بات سنی ، پھر آپ صلی اللہ علیہ وسلم نے خطبہ دیتے ہوئے انصار سے ارشاد فرمایا :
” کیا ایسا نہیں ہے ؟ کہ تم لوگ کمتر حیثیت کے مالک تھے تو اللہ تعالیٰ نے میری وجہ سے تمہیں عزت سے نوازا ، کیا ایسا نہیں ہے ؟ کہ تم لوگ گمراہ تھے تو اللہ تعالیٰ نے میرے ذریعے تمہیں ہدایت نصیب کی ، کیا ایسا نہیں ہے ؟ کہ تم لوگ خوف کا شکار تھے تو اللہ تعالی نے میری وجہ سے تمہیں امان عطا کی ، تم لوگ مجھے جواب نہیں دو گے ؟ لوگوں نے عرض کی : ہم آپ کو کیا جواب دیں ؟ نبی اکرم صلی اللہ علیہ وسلم نے فرمایا : تم لوگ مجھے یہ جواب دو کہ کیا آپ کی قوم نے آپ کو چھوڑ نہیں دیا تھا ؟ تو ہم نے آپ کو پناہ دی ، کیا آپ کی قوم نے آپ کو جھٹلا نہیں دیا تھا ؟ تو ہم نے آپ کی تصدیق کی ، نبی اکرم صلی اللہ علیہ وسلم نے متعدد باتیں شمار کروائیں ، تو وہ لوگ اپنے گھٹنوں کے بل کھڑے ہو گئے اور انہوں نے عرض کی : ہمارے اموال اور ہماری جانیں آپ کی ملکیت ہیں ، تو اس بارے میں یہ آیت نازل ہوئی :
” تم یہ فرما دو ! کہ میں اس بارے میں تم سے کوئی معاوضہ نہیں مانگتا ہوں ، البتہ رشتے داری کے حوالے سے محبت کا حکم مختلف ہے ۔ “

یہ روایت امام طبرانی نے معجم اوسط میں اپنے استاد علی بن سعید بن بشیر کے حوالے سے نقل کی ہے اس میں کمزوری پائی جاتی ہے اس روایت کے بقیہ رجال کی توثیق کی گئی ہے ۔

مطر ابوموسی ، جو سیدنا طلحہ بن عبیداللہ رضی اللہ عنہ کی آل کے غلام ہیں ، وہ بیان کرتے ہیں : ایک مرتبہ سیدنا ابوہریرہ رضی اللہ عنہ اور سیدنا عبداللہ بن عمر رضی اللہ عنہ اکٹھے ہوئے ، میں ان دونوں کے ساتھ بیٹھا ہوا تھا ، میں لڑکا تھا ، انہوں ( یعنی سیدنا ابوہریرہ رضی اللہ عنہ ) نے کہا: اے ابوعبدالرحمن ! لوگ یہ گمان کرتے ہیں کہ میں نبی اکرم صلی اللہ علیہ وسلم کی طرف جھوٹی بات منسوب کرتا ہوں ، کون سی زمین مجھ کو سہارا دے گی اور کون سا آسمان مجھ پر سایہ کرے گا ؟ ( اگر میں ایسا کروں ؟ ) تو سیدنا عبداللہ بن عمر رضی اللہ عنہما نے کہا: آپ اس سے زیادہ بہتر ہیں ، سیدنا ابوہریرہ رضی اللہ عنہ نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اگر لوگ ایک وادی میں چلیں اور انصار دوسری وادی میں چلیں ، تو میں انصار والی وادی میں اُن کے ساتھ چلوں گا ۔ “ تو سیدنا عبداللہ بن عمر رضی اللہ عنہما نے فرمایا : میں نے بھی نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے ۔ سیدنا ابوہریرہ رضی اللہ عنہ نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اگر ہجرت نہ ہوتی تو میں انصار سے تعلق رکھنے والا ایک فرد ہوتا ۔ “ تو سیدنا عبداللہ بن عمر رضی اللہ عنہما نے فرمایا : آپ نے سچ بیان کیا ہے ، میں نے بھی نبی اکرم صلی اللہ علیہ وسلم کو یہ ارشاد فرماتے ہوئے سنا ہے ، اس دن سیدنا ابوہریرہ رضی اللہ عنہ نے جو بھی حدیث بیان کی ، تو سیدنا عبداللہ بن عمر رضی اللہ عنہما نے اُن کی تصدیق کی ۔
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں ، جن سے میں واقف نہیں ہوں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم یہ بات جانتے تھے کہ گھاٹی ، وادی سے بہتر ہوتی ہے ۔
یہ روایت امام بزار نے نقل کی ہے اور اس کی سند حسن ہے ۔

سیدنا ابوقتادہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو منبر پر یہ ارشاد فرماتے ہوئے سنا ہے : ” خبردار ! دوسرے لوگ اوپر اوڑھنے والا لباس ( یعنی چادر ) ہیں ، اور انصار جسم کے ساتھ لگنے والا لباس ہیں ، اگر دوسرے لوگ ایک وادی میں چلیں اور انصار ایک گھاٹی میں چلیں ، تو میں انصار کی گھاٹی میں جاؤں گا ، اگر ہجرت نہ ہوتی تو میں انصار سے تعلق رکھنے والا ایک فرد ہوتا ، جو شخص لوگوں کے معاملے میں سے کسی بھی چیز ( یعنی حکومت ) کا نگران بنے تو اسے انصار کے اچھے افراد کے ساتھ اچھائی کرنی چاہیے اور برے لوگوں سے درگزر کرنا چاہیے ، جو شخص انصار کو خوف زدہ کرنے کی کوشش کرے گا ، وہ اس کو خوف زدہ کرنے والا شمار ہو گا جو ان دونوں کے درمیان ہے ۔ “ نبی اکرم صلی اللہ علیہ وسلم نے اپنے سینے یعنی اپنے دل کی طرف اشارہ کر کے یہ بات ارشاد فرمائی ۔
یہ روایت امام طبرانی نے معجم اوسط میں ، اپنے استاد مقدام بن داؤد کے حوالے سے نقل کی ہے اور وہ ضعیف ہے ، ابن دقیق العید کہتے ہیں : اس کی توثیق کی گئی ہے ، اس روایت کے بقیہ رجال ثقہ ہیں ۔

ابن شفیع ، جو ایک طبیب تھے ، وہ بیان کرتے ہیں : سیدنا اُسید بن حضیر رضی اللہ عنہ نے مجھے بلایا اور میں نے ان کی عرق النساء کاٹ دی ، انہوں نے مجھے دو حدیثیں بیان کیں ، انہوں نے فرمایا : میری قوم کے افراد میرے پاس آئے ، ایک گھرانے کا تعلق بنوظفر سے تھا اور ایک گھرانے کا تعلق بنو معاویہ سے تھا تو ان لوگوں نے کہا: آپ ہمارے لئے نبی اکرم صلی اللہ علیہ وسلم کے ساتھ بات چیت کریں کہ نبی اکرم صلی اللہ علیہ وسلم ہمیں بھی تقسیم میں کچھ دیں ، یا ہمیں کچھ اور عطا کریں ، یا اس کی مانند کوئی بات انہوں نے بیان کی ، میں نے نبی اکرم صلی اللہ علیہ وسلم سے اس بارے میں بات چیت کی ، تو نبی اکرم صلی اللہ علیہ وسلم نے ارشاد فرمایا : جی ہاں ! میں ان میں سے ہر گھرانے کو نصف حصہ دوں گا اور اگر اللہ تعالیٰ ہمیں مزید دے گا تو میں انہیں مزید دوں گا ۔
راوی کہتے ہیں : میں نے عرض کی : یا رسول اللہ ! اللہ تعالیٰ آپ کو جزائے خیر عطا کرے ، نبی اکرم صلی اللہ علیہ وسلم نے فرمایا : بلکہ اللہ تعالیٰ تم لوگوں ( یعنی انصار ) کو جزائے خیر عطا کرئے ، کیونکہ تم لوگوں کے بارے میں میرا علم یہ ہے کہ تم لوگ مانگنے سے بچنے والے اور صبر کرنے والے لوگ ہو ۔
راوی بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے :
” بے شک تم لوگ میرے بعد ترجیحی سلوک کا سامنا کرو گے ۔ “
راوی کہتے ہیں : جب سیدنا عمر بن خطاب رضی اللہ عنہ کا زمانہ آیا اور انہوں نے کچھ حلے لوگوں کے درمیان تقسیم کئے تو ان میں سے ایک حلہ انہوں نے مجھے بھی بھیجا ، میں نے اسے چھوٹا سمجھا ، وہ میں نے اپنی بیٹی کو دے دیا ، ایک وقت میں ، میں نماز ادا کر رہا تھا اسی دوران قریش سے تعلق رکھنے والا ایک نوجوان میرے پاس سے گزرا ، اس نے ان حلوں میں سے ایک حلہ پہنا ہوا تھا اور وہ اتنا بڑا تھا کہ وہ اس کو گھسیٹ رہا تھا ، مجھے نبی اکرم صلی اللہ علیہ وسلم کا فرمان یاد آ گیا :
” تم لوگ میرے بعد ترجیحی سلوک کا سامنا کرو گے ۔ “
میں نے کہا: اللہ تعالیٰ اور اس کے رسول صلی اللہ علیہ وسلم نے سچ فرمایا ہے ، وہ شخص سیدنا عمر رضی اللہ عنہ کے پاس گیا اور انہیں اس بارے میں بتایا ، وہ تشریف لائے ، میں اس وقت نماز پڑھ رہا تھا ، انہوں نے فرمایا : اے ابواسید ! آپ نماز پڑھتے رہیں ، جب میں نے نماز مکمل کی تو انہوں نے دریافت کیا : آپ نے کیا کہا: تھا ؟ میں نے انہیں اس بارے میں بتایا تو انہوں نے فرمایا : وہ ایک ایسا حلہ ہے ، جو میں نے فلاں کی طرف بھیجا تھا اور وہ ایسا شخص ہے جسے غزوہ بدر میں ، غزوہ احد میں اور بیعت عقبہ میں شرکت کا شرف حاصل ہے ، پھر یہ نوجوان اس شخص کے پاس گیا اور اس نوجوان نے اس شخص سے وہ حلہ خرید کر اسے پہن لیا ، مجھے یہ اندازہ نہیں ہے کہ ایسا ( یعنی ترجیحی سلوک ) میرے زمانے میں ہو گا ، راوی کہتے ہیں : تو میں نے کہا: اللہ کی قسم ! اے امیر المؤمنین ! مجھے بھی یہ گمان نہیں تھا کہ یہ صورت حال آپ کے زمانے میں ہو گی ۔
( علامہ ہیثمی فرماتے ہیں : ) میں یہ کہتا ہوں : ” صحیح “ اور دیگر کتابوں میں ، اس میں سے صرف یہ حصہ منقول ہے :
” بے شک تم لوگ میرے بعد ترجیحی سلوک کا سامنا کرو گے ۔ “
یہ روایت امام أحمد نے نقل کی ہے اور اس کے رجال ثقہ ہیں البتہ ابن اسحاق نامی راوی مدلس ہے اور وہ ثقہ ہے ۔

سیدنا جابر بن عبدالله رضی اللہ عنہ بیان کرتے ہیں : میرے والد نے ” خزیرہ “ تیار کرنے کا حکم دیا ، وہ تیار کیا گیا ، پھر میرے والد نے مجھے ہدایت کی تو میں وہ لے کر نبی اکرم صلی اللہ علیہ وسلم کے پاس آیا ، راوی کہتے ہیں : جب میں نبی اکرم صلی اللہ علیہ وسلم کے پاس آیا تو آپ اپنے گھر میں تھے ، آپ نے مجھ سے دریافت کیا : اے جابر ! تمہارے پاس کیا ہے ؟ کیا یہ گوشت ہے ؟ میں نے عرض کی : جی نہیں ! پھر میں اپنے والد کے پاس آیا ، انہوں نے دریافت کیا : کیا تم نے نبی اکرم صلی اللہ علیہ وسلم کو دیکھا ؟ میں نے عرض کی : جی ہاں ! انہوں نے دریافت کیا : کیا تم نے نبی اکرم صلی اللہ علیہ وسلم کو کوئی بات ارشاد فرماتے ہوئے سنا ہے ؟ میں نے عرض کی : جی ہاں ! نبی اکرم صلی اللہ علیہ وسلم نے مجھ سے فرمایا : اے جابر ! تمہارے پاس کیا ہے ؟ کیا یہ گوشت ہے ؟ تو میرے والد نے کہا: شاید نبی اکرم صلی اللہ علیہ وسلم کو گوشت کھانے کی خواہش ہو رہی تھی ، تو انہوں نے ہماری ایک بکری کے بارے میں حکم دیا اسے ذبح کیا گیا پھر ان کے حکم کے تحت اسے پکایا گیا ، پھر انہوں نے مجھے حکم دیا میں اس کا گوشت لے کر نبی اکرم صلی اللہ علیہ وسلم کے پاس گیا تو نبی اکرم صلی اللہ علیہ وسلم نے مجھ سے فرمایا : اے جابر ! تمہارے ساتھ کیا ہے ؟ میں نے آپ صلی اللہ علیہ وسلم کو اس بارے میں بتایا ، تو نبی اکرم صلی اللہ علیہ وسلم نے فرمایا : اللہ تعالیٰ انصار کو ہماری طرف سے جزائے خیر عطا کرے ، خاص طور پر عبداللہ بن عمرو بن حرام اور سعد بن عبادہ کو ( جزائے خیر عطا کرے ) ۔
یہ روایت امام ابویعلیٰ نے دو اسناد کے ساتھ نقل کی ہے ان دونوں میں سے ایک کے رجال صحیح کے رجال ہیں ، صرف ابراہیم بن حبیب بن شہید کا معاملہ مختلف ہے اور وہ ثقہ ہے ۔

ابومحمد بن بشیر بن ابان بن بشیر بن نعمان بن بشیر بن سعد انصاری ، اپنے والد کے حوالے سے ، اپنے دادا کا یہ بیان نقل کرتے ہیں : مروان بن حکم نے سیدنا نعمان بن بشیر رضی اللہ عنہ کو اپنے بیٹے عبدالملک کے لئے شادی کا پیغام دیا ، جو سیدنا نعمان رضی اللہ عنہ کی صاحبزادی ام ابان کے لئے تھا ۔ مردان نے جو انہیں خط لکھا اس میں یہ تحریر تھا :
” اللہ تعالیٰ کے نام سے برکت حاصل کرتے ہوئے ، جو بڑا مہربان نہایت رحم کرنے والا ہے ، یہ مروان بن حکم کی طرف سے نعمان بن بشیر کے نام ہے ، تم پر سلام ہو ! میں تمہارے سامنے اس اللہ کی حمد بیان کرتا ہوں ، جس کے علاوہ اور کوئی معبود نہیں ہے امابعد ! بے شک اللہ تعالیٰ کی ذات جلال والی ہے ، اکرام والی ہے ، عظمت والی ہے ، غلبے والی ہے ، اے انصار کے گروہ ! اللہ تعالیٰ نے تمہیں یہ خصوصیت عطا کی ہے کہ تم نے اس کے دین کی مدد کی ، اس کے نبی کا ساتھ دیا ، تو اللہ تعالیٰ نے تمہیں ان میں سے عمومی گھر میں رکھا اور قدیم شاخ میں رکھا ، تو اس چیز نے مجھے اس بات کی طرف راغب کیا کہ میں تمہارے ساتھ رشتے داری قائم کروں ، اور تمہیں اپنے باپ کی اولاد کے ہم پلہ افراد پر ترجیح دوں ، تو میں یہ سمجھتا ہوں کہ تم میرے بیٹے عبدالملک بن مروان کے ساتھ اپنی بیٹی اُم ابان بنت نعمان کی شادی کروا دو ، اس کا مہر وہ ہو گا جو تمہاری زبان بیان کرے گی ، اور جو تمہارے ہونٹ ادا کریں گے ، اور جو تمہاری خواہش ہو گی ، میں نے اس سے پہلے ہی بیت المال ( کے نگران کو ) اس بارے میں حکم دے دیا ہے ۔ “
جب سیدنا نعمان رضی اللہ عنہ نے وہ خط پڑھا تو انہوں نے اُسے جوابی خط میں لکھا :
” اللہ تعالیٰ کے نام سے برکت حاصل کرتے ہوئے ، جو بڑا مہربان نہایت رحم کرنے والا ہے ، یہ نعمان بن بشیر کی طرف سے مروان بن حکم کے نام ہے ، میں نے اپنا نام پہلے اس لئے لکھا ہے کیونکہ یہ نبی اکرم صلی اللہ علیہ وسلم کی سنت ہے اور میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے :
” جب کوئی شخص کسی دوسرے کو خط لکھے تو پہلے اپنا ذکر کرے ۔ “
امابعد ! تمہارا مکتوب مجھ تک پہنچا ، جو تم نے ذکر کیا ہے ، اس کی مجھے سمجھ آ گئی کہ جو تم نے ہمارے ساتھ محبت کا ذکر کیا ہے ، تو یا تو تم اس دعوے میں سچے ہو گے ، تو یہ غنیمت ہے جو تمہیں حاصل ہو گئی ، اور ایک حصہ ہے جو تم نے لے لیا ، کیونکہ ہم ایسے لوگ ہیں کہ اللہ تعالیٰ نے ہم سے محبت کو ایمان قرار دیا ہے اور ہمارے ساتھ بغض کو نفاق قرار دیا ہے ، اور تم نے جو ہمارے شرف اور پرانے مرتبے کا ذکر کیا ہے تو اللہ تعالیٰ نے ہماری تعریف کی ہے اور اللہ تعالیٰ نے اپنی نازل کی ہوئی کتاب میں اس حوالے سے ہمارا ذکر کیا ہے ، جو اللہ تعالیٰ نے اپنے نبی پر نازل کی ، تو اس کے بعد ہمیں لوگوں میں سے کسی کی تعریف کی ضرورت نہیں رہ جاتی ، جہاں تک تم نے یہ بات ذکر کی ہے کہ تم نے اپنے بیٹے عبدالملک بن مروان کے لئے اپنے باپ کی اولاد میں سے اپنے ہم پلہ لوگوں پر مجھے ترجیح دی ہے ، تو تمہاری طرف سے میرا حصہ ان پر لوٹ جائے گا اور انہیں پوری ادائیگی کی جائے گی ، ان کے ساتھ کوئی زیادتی نہیں ہو گی ، ان کے ساتھ اس حوالے سے کوئی تنازع نہیں ہو گا ، جہاں تک تم نے یہ بات ذکر کی ہے کہ اس لڑکی کا مہر وہ ہو گا جو میری زبان بیان کرے گی اور جو میرے ہونٹ حرکت میں آئیں گے اور جو میری خواہش ہو گی اور اس بارے میں تم نے بیت المال کے حکام کو حکم بھی دے دیا ہے ، تو الحمدللہ صورت حال یہ ہے کہ اگر تم میرے حصے کے بارے میں انصاف سے کام لو ، تو بیت المال میں میرا حصہ تمہارے حصے سے زیادہ بنتا ہے ، اور اس بارے میں میرا حصہ تمہارے حصے سے زیادہ ہے ، تو میں یہ کہتا ہوں :
” اگر میرا نفس میری بات مان لے تو اس کے بہت سے خدمتگار ہو جائیں گے ، اور وہ اتنے ہوں گے جنہیں کثیر شمار کیا جائے ، لیکن میرا نفس میرے نزدیک معزز ہے اور اس کو کمینے اور گندے لوگوں کے ساتھ رشتہ مصاہرت قائم کرنا ناگوار گزرتا ہے ، عنفاء کے بیٹوں اور محرق کے دو بیٹوں کے ساتھ ہمارا رشتہ مصاہرت ہے ، جس سے بلندی بھی حاصل ہوئی اور مہر بھی ، عمران اور عمرو بن عامر کی آل میں ایسی رسیاں ہیں جن کے کنارے بھی میلے نہیں ہوتے ہیں ۔ “
یہ روایت امام طبرانی نے نقل کی ہے ، اس کی سند میں ایک راوی ابان بن بشیر بن نعمان ہے اور میں اس سے واقف نہیں ہوں اس روایت کے بقیہ رجال ثقہ ہیں ، البتہ ابن حبان نے ابومحمد بن بشیر بن ابان کے بارے میں یہ کہا: ہے : بشیر بن نعمان بن بشیر بن ابان ہے ، تو انہوں نے اس کے نسب میں نعمان کا اضافہ کیا ہے ، باقی اللہ بہتر جانتا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے میری تائید قیلہ کے ان دو بیٹوں کے ذریعے کی ہے ، جو عربوں میں زبان کے اعتبار سے ، سب سے زیادہ مضبوط ہیں اور سب سے زیادہ مضبوط کلائیوں والے ہیں اور وہ اوس اور خزرج قبیلے کے لوگ ہیں ۔ “
یہ روایت امام طبرانی نے نقل کی ہے ، اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔

سیدنا ابوواقد لیثی رضی اللہ عنہ بیان کرتے ہیں : میں نبی اکرم صلی اللہ علیہ وسلم کے پاس بیٹھا ہوا تھا ، میرا گھٹنا آپ کے گھٹنے کو مس ہو رہا تھا اسی دوران ایک شخص آپ کے پاس آیا ، اس نے آپ کے کان کے پاس منہ کیا اور کوئی بات بیان کی ، تو نبی اکرم صلی اللہ علیہ وسلم کا چہرہ تبدیل ہو گیا اور آپ کی رگوں میں خون پھیل گیا ( یعنی رگیں نمایاں ہو گئیں ) آپ صلی اللہ علیہ وسلم نے ارشاد فرمایا : ” یہ عامر بن طفیل کا قاصد ہے اور اس نے مجھے اور میرے ساتھیوں کو دھمکی دی ہے ، حالانکہ اس کے مقابلے میں اللہ تعالیٰ اولاد اسماعیل میں سے ( بعض افراد یعنی مہاجرین ) اور قیلہ کے دو بیٹوں ( کی اولاد ) کے ذریعے میری مدد کر دے گا “ نبی اکرم صلی اللہ علیہ وسلم کی مراد انصار تھے ۔
یہ روایت امام طبرانی نے معجم کبیر اور معجم اوسط میں نقل کی ہے ، تاہم انہوں نے اس میں یہ الفاظ نقل کئے ہیں : ” اللہ تعالیٰ اس کے مقابلے میں اپنے نبی کی کفایت ، اسماعیل کی اولاد میں سے ( بعض افراد یعنی مہاجرین ) اور قیلہ کے دو بیٹوں ( کی اولاد یعنی انصار ) کے ذریعے کر دے گا ۔ “ ان دونوں کی سند میں ایک راوی عبداللہ بن یزید بکری ہے اور وہ ضعیف ہے ۔

سیدنا ابوقتادہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو منبر پر انصار سے یہ فرماتے ہوئے سنا : ” خبردار ! دوسرے لوگ اوپر اوڑھنے والی چادر ہیں اور انصار جسم کے ساتھ لگنے والا لباس ہیں ، اور اگر لوگ ایک وادی میں چلیں اور انصار ایک گھاٹی میں چلیں ، تو میں انصار کی گھاٹی میں چلوں گا اور اگر ہجرت نہ ہوتی تو میں انصار سے تعلق رکھنے والا ایک فرد ہوتا ، جو شخص انصار کے معاملے کا نگران بنے تو وہ ان کے اچھے فرد کے ساتھ اچھائی کرے اور ان کے برے فرد سے درگزر کرے جو شخص انہیں خوف زدہ کرے گا ، وہ اس کو خوف زدہ کرے گا ، جو ان دونوں کے درمیان ہے ۔ “ نبی اکرم صلی اللہ علیہ وسلم نے اپنی طرف اشارہ کر کے یہ بات ارشاد فرمائی ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، صرف یحیی بن نضر انصاری کا معاملہ مختلف ہے اور وہ ثقہ ہے ۔

عبدالرحمن بن کعب بن مالک ، ان کے والد ان تین افراد میں سے ایک ہیں ، جن کی توبہ قبول ہوئی تھی ، وہ صاحب نبی اکرم صلی اللہ علیہ وسلم کے صحابہ میں سے ایک فرد کے حوالے سے یہ بات نقل کرتے ہیں : نبی اکرم صلی اللہ علیہ وسلم خطبہ دینے کے لئے کھڑے ہوئے ، آپ نے اللہ تعالیٰ کی حمد و ثناء بیان کی اور آپ نے غزوہ اُحد کے شہداء کے لئے دعائے مغفرت کی اور پھر یہ ارشاد فرمایا : ” اے مہاجرین کے گروہ ! تم لوگ زیادہ ہوتے جاؤ گے ، اور انصار زیادہ نہیں ہوں گے ، انصار میرے خاص ساتھی ہیں ، میں جن کی پناہ میں آیا ، تو تم ان کے معزز فرد کی عزت افزائی کرنا اور ان کے برے فرد سے درگزر کرنا کیونکہ انہوں نے اس چیز کو ادا کر دیا ہے جو اُن کے ذمہ بنتا تھا اور اب وہ چیز باقی رہ گئی ہے ، جو ان کا حق بنتا ہے ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

عبداللہ بن کعب بن مالک انصاری ( یہ سیدنا کعب بن مالک انصاری رضی اللہ عنہ ) ان تین افراد میں سے ایک ہیں ، جن کی توبہ قبول ہوئی تھی ، عبداللہ بیان کرتے ہیں : نبی اکرم صلی اللہ علیہ وسلم کے ایک صحابی نے انہیں یہ بات بتائی ہے : ایک دن نبی اکرم صلی اللہ علیہ وسلم تشریف لائے ، آپ صلی اللہ علیہ وسلم نے سر پر پٹی باندھی ہوئی تھی ، آپ صلی اللہ علیہ وسلم نے اپنے خطبے کے درمیان ارشاد فرمایا : ” امابعد ! اے مہاجرین کے گروہ ! تم لوگ زیادہ ہوتے جاؤ گے اور انصار زیادہ نہیں ہوں گے ، وہ اسی حالت پر رہیں گے جس پر اب ہیں اور انصار میرے قریبی ہیں ، جن کی پناہ میں نے لی ہے ، تو تم ان کے معزز فرد کی عزت افزائی کرنا ان کے برے فرد سے درگزر کرنا ۔ “
یہ روایت امام أحمد نے نقل کی ہے اور اس کے رجال صحیح کے رجال ہیں ۔

قدامہ بن ابراہیم بیان کرتے ہیں : میں نے حجاج کو دیکھا کہ وہ سیدنا عبداللہ بن زبیر رضی اللہ عنہ کی وجہ سے عباس بن سہل کی پٹائی کر رہا تھا ، اسی دوران سیدنا سہل بن سعد رضی اللہ عنہ حجاج کے پاس آئے اور وہ ایک عمر رسیدہ شخص تھے ، ان کے دونوں طرف بال تھے ، ان کے جسم پر دو لباس تھے ، ایک تہبند تھا اور ایک چادر تھی ، وہ پاس آ کر کھڑے ہوئے اور بولے : اے حجاج ! کیا تم ہمارے بارے میں ، اللہ کے رسول صلی اللہ علیہ وسلم کی وصیت کا خیال نہیں رکھو گے ؟ حجاج نے دریافت کیا : آپ لوگوں کے بارے میں اللہ کے رسول صلی اللہ علیہ وسلم نے کیا وصیت کی ہے ؟ تو انہوں نے بتایا : اللہ کے رسول صلی اللہ علیہ وسلم نے یہ وصیت کی ہے کہ انصار کے اچھے فرد کے ساتھ اچھائی کی جائے اور ان کے برے فرد سے درگزر کیا جائے گا ، راوی کہتے ہیں : تو حجاج نے عباس کو چھوڑ دیا ۔
یہ روایت امام ابویعلیٰ نے امام طبرانی نے معجم اوسط اور معجم کبیر مختلف اسانید کے ساتھ نقل کی ہے ، جن میں سے ایک سند میں ایک راوی عبداللہ بن مصعب ہے اور دوسری میں ایک راوی عبدالمہیمن بن عباس ہے اور یہ دونوں ضعیف ہیں ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” انصار کے اچھائی کرنے والے کو قبول کرو ، ان کے برے فرد سے درگزر کرو ۔ “
یہ روایت امام بزار نے نقل کی ہے ، اس کی سند میں ایک راوی صدقہ بن عبداللہ سمین ہے جسے دحیم اور ابوحاتم نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال ثقہ ہیں ۔

زید بن سعد اپنے والد کے حوالے سے یہ بات نقل کرتے ہیں : جب نبی اکرم صلی اللہ علیہ وسلم کو یہ اطلاع دی گئی کہ آپ عنقریب دنیا سے رخصت ہو جائیں گے تو آپ گھر سے باہر تشریف لائے آپ نے کپڑا سر پر لپیٹا ہوا تھا ، یہاں تک کہ آپ منبر پر تشریف فرما ہوئے ، لوگوں کو آپ کے بارے میں پتہ چلا اور بازار والوں کو پتہ چلا ، تو وہ سب مسجد میں آ گئے ، نبی اکرم صلی اللہ علیہ وسلم نے اللہ تعالیٰ کی حمد و ثناء بیان کرنے کے بعد ارشاد فرمایا : ” اے لوگو ! انصار کے اس قبیلے کے بارے میں میری حفاظت کرنا ، کیونکہ یہ میرے خاص قریبی ساتھی ہیں ، تم ان میں کے اچھے فرد کی اچھائی کو قبول کرنا اور ان کے برے فرد سے درگزر کرنا ۔ “
یہ روایت امام طبرانی نے نقل کی ہے اور اس میں ایک راوی زید بن سعد بن زید اشہلی ہے اور میں اس سے واقف نہیں ہوں اس روایت کے بقیہ رجال ثقہ ہیں ۔

مہاجر بن دینار بیان کرتے ہیں : سیدنا ابوسعید انصاری رضی اللہ عنہ ایک دن مروان کے پاس سے گزرے ، یہ اس وقت کی بات ہے جب جنگ ہوئی تھی اور وہ پچھاڑا گیا تھا ، انہوں نے کہا: اے ابن زرقاء ! اگر مجھے یہ پتہ ہوتا کہ تم زندہ ہو ، تو میں نے تم پر حملہ کر دینا تھا ، عبدالملک نے ان کے خلاف یہ بات یاد رکھی ، پھر جب عبدالملک خلیفہ بن گیا تو انہیں لایا گیا تو سیدنا ابوسعید انصاری رضی اللہ عنہ نے کہا: تم میرے بارے میں اللہ کے رسول صلی اللہ علیہ وسلم کی وصیت کا خیال رکھنا ، عبدالملک بن مروان نے دریافت کیا : وہ کیا ہے ؟ تو انہوں نے بتایا : ( نبی اکرم صلی اللہ علیہ وسلم نے فرمایا تھا : ) ” ان کے ( یعنی انصار کے ) اچھے افراد کی حفاظت کرنا اور برے لوگوں سے درگزر کرنا ۔ “ راوی کہتے ہیں : سیدنا ابوسعید رضی اللہ عنہ سیدہ اسماء رضی اللہ عنہا بنت یزید بن سکن بن عمرو بن حرام کے شوہر تھے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : سیدنا ابوبکر رضی اللہ عنہ نے سیدنا عمرو بن العاص رضی اللہ عنہ کو خط لکھا : ” امابعد ! نبی اکرم صلی اللہ علیہ وسلم نے اپنے وصال کے قریب انصار کے بارے میں جو وصیت کی تھی ، اس کا تمہیں علم ہے کہ تم لوگ ان کے اچھے فرد کی اچھائی قبول کرنا اور ان کے برے فرد سے درگزر کرنا ۔ “
یہ روایت امام بزار نے نقل کی ہے اور اس کی سند حسن ہے ، اسے امام طبرانی نے بھی روایت کیا ہے اور اس کے رجال کی توثیق کی گئی ہے ، اور ان رجال کے بارے میں اختلاف پایا جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم کے پاس کوئی آیا اور آپ کو بتایا کہ انصار کے مرد اور خواتین مسجد میں موجود ہیں اور وہ رو رہے ہیں ، نبی اکرم صلی اللہ علیہ وسلم نے دریافت کیا : وہ کیوں رو رہے ہیں ؟ آپ کو بتایا گیا کہ ان لوگوں کو یہ اندیشہ ہے کہ کہیں آپ کا انتقال نہ ہو جائے ، راوی کہتے ہیں : آپ صلی اللہ علیہ وسلم تشریف لائے آپ منبر پر تشریف فرما ہوئے ، آپ نے کپڑا سر پر باندھا ہوا تھا ، جس کے کنارے آپ کے کندھے پر آ رہے تھے ، آپ نے سر پر پٹی باندھی ہوئی تھی جو پرانے کپڑے کی تھی ، آپ نے اللہ تعالیٰ کی حمد و ثناء بیان کی ، پھر آپ صلی اللہ علیہ وسلم نے ارشاد فرمایا : ” امابعد ! اے لوگو ! بے شک دوسرے لوگ زیادہ ہو جائیں گے اور انصار کم ہوتے رہیں گے ، یہاں تک کہ وہ یوں ہو جائیں گے جیسے کھانے میں نمک ہوتا ہے ، تو جو شخص لوگوں کے معاملے میں کسی چیز کا نگران بنے ، تو وہ انصار کے اچھے فرد کی اچھائی کو قبول کرے اور برے فرد کی برائی سے درگزر کرے ۔ “ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تاہم اس کا ابتدائی حصہ یہاں تک نہیں ہے : ” آپ تشریف لائے اور تشریف فرما ہوئے ۔ ۔ ۔ ۔ ۔ ۔ “ ۔
یہ روایت امام بزار نے ابن کرامہ کے حوالے سے ابن موسیٰ سے نقل کی ہے اور اس وقت میں ان دونوں کے ناموں سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدہ عائشہ صدیقه رضی اللہ عنہا بیان کرتی ہیں : نبی اکرم صلی اللہ علیہ وسلم تشریف لائے ، آپ صلی اللہ علیہ وسلم نے لوگوں کو نماز پڑھائی ، پھر آپ نے لوگوں کے بارے میں بھلائی کی تلقین کی ، پھر آپ صلی اللہ علیہ وسلم نے ارشاد فرمایا : ” امابعد ! اے مہاجرین کے گروہ ! تم لوگ زیادہ ہوتے جاؤ گے اور انصار زیادہ نہیں ہوں گے ، یہ اسی طرح رہیں گے جس طرح یہ اس وقت ہیں اور انصار میرے مقربین ہیں ، جن کی پناہ میں نے لی ہے ، تو تم ان کے معزز افراد کی عزت افزائی کرنا اور ان کے برے فرد سے درگزر کرنا ۔ “
یہ روایت امام بزار نے نقل کی ہے اور اس کے رجال صحیح کے رجال ہیں ۔

عباس بن سہل بن سعد بیان کرتے ہیں : سیدنا سہل رضی اللہ عنہ ، حجاج کے پاس آئے ، وہ اس وقت ہاتھ کے ذریعے ٹیک لگائے ہوئے تھا ، سیدنا سہل رضی اللہ عنہ نے اس سے کہا: نبی اکرم صلی اللہ علیہ وسلم نے انصار کے بارے میں یہ فرمایا ہے : کہ ان کے اچھے فرد کے ساتھ اچھائی کرو اور ان کے برے فرد سے درگزر کرو ، حجاج نے دریافت کیا : کون آپ کے حق میں گواہی دے گا ؟ تو انہوں نے کہا: یہ دو افراد جو تمہارے پہلو میں بیٹھے ہوئے ہیں ، عبداللہ بن جعفر اور ابراہیم بن محمد بن حاطب ، تو ان دونوں نے جواب دیا : جی ہاں ! ( یعنی ایسا ہی ہے ) ۔
یہ روایت امام طبرانی نے نقل کی ہے ، اس کی سند میں ایک راوی عبدالمہیمن بن عباس بن سہل ہے اور وہ ضعیف ہے ۔

سیدنا اُسید بن حضیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” انصار میرے انتہائی قریبی اور رازدار ہیں ، دوسرے لوگ زیادہ ہوتے جائیں گے اور یہ لوگ کم ہوتے جائیں گے ، تو تم اُن کے اچھے فرد کی اچھائی قبول کرنا اور ان کے برے فرد سے درگزر کرنا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عبدالرحمن بن کعب بن مالک اپنے والد کے حوالے سے نقل کرتے ہیں : اُن کے والد ان تین افراد میں سے ایک ہیں جن کی توبہ قبول ہوئی تھی ، وہ بیان کرتے ہیں : نبی اکرم صلی اللہ علیہ وسلم خطبہ دینے کے لئے کھڑے ہوئے ، آپ صلی اللہ علیہ وسلم نے اللہ تعالیٰ کی حمد و ثناء بیان کی اور ان شہداء کے لئے دعائے مغفرت کی جو غزوہ اُحد میں شہید ہو گئے تھے ، پھر آپ صلی اللہ علیہ وسلم نے ارشاد فرمایا : ” اے مہاجرین کے گروہ ! تم لوگ زیادہ ہوتے جاؤ گے ، اور انصار زیادہ نہیں ہوں گے ، انصار میرے رازدار ہیں ، جن کی میں نے پناہ لی ، تو تم ان کے معزز فرد کی عزت افزائی کرنا اور اُن کے برے فرد سے درگزر کرنا ۔ “
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

عبداللہ بن کعب بن مالک اپنے والد کا یہ بیان نقل کرتے ہیں : وہ آخری خطبہ جو نبی اکرم صلی اللہ علیہ وسلم نے ہم سے ارشاد فرمایا : ۔ ۔ ۔ ۔ ۔ اس کے بعد راوی نے حسب سابق روایت اختصار کے ساتھ نقل کی ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔