مجمع الزوائد ومنبع الفوائد

سیدنا جابر بن عبداللہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے :
” دوسرے لوگ زیادہ ہو جائیں گے اور میرے اصحاب کم ہو جائیں گے ، تو تم انہیں برا نہ کہو ، اللہ تعالیٰ اُس شخص پر لعنت کرے ، جو انہیں برا کہتا ہے ۔ “

یہ روایت امام ابویعلیٰ نے نقل کی ہے اور اس کی سند میں ایک راوی محمد بن فضل بن عطیہ ہے اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا :
” جو شخص میرے اصحاب کو برا کہے ، اس پر اللہ تعالیٰ کی لعنت ہو ۔ “

یہ روایت امام بزار نے اور امام طبرانی نے معجم کبیر اور معجم اوسط میں نقل کی ہے ، ان کی روایت کے الفاظ یہ ہیں :
” اللہ تعالیٰ اُس شخص پر لعنت کرے ، جو میرے اصحاب کو برا کہتا ہے ۔ “
امام بزار کی سند میں ایک راوی سیف بن عمر ہے اور وہ متروک ہے اور امام طبرانی کی دو اسناد میں ایک راوی عبداللہ بن سیف خوارزمی ہے اور وہ متروک ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے مالک بن دخشن کا ذکر کیا گیا ، لوگوں نے اس پر تنقید کی ، اس کے بارے میں یہ کہا: گیا : وہ منافقین کا سردار ہے ، تو نبی اکرم صلی اللہ علیہ وسلم نے فرمایا : تم میرے اصحاب کو رہنے دو ، تم میرے اصحاب کو برا نہ کہو ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا :
” جو شخص میرے اصحاب کو برا کہے گا ، اللہ تعالیٰ ، فرشتوں اور انسانوں ، سب کی اس پر لعنت ہو گی ۔ “

یہ روایت امام طبرانی نے نقل کی ہے ، اس کی سند میں ایک راوی عبداللہ بن خراش ہے اور وہ ضعیف ہے ۔
( علامہ ہیثمی فرماتے ہیں : ) میں یہ کہتا ہوں : اس سے پہلے صحابہ کرام کی فضیلت سے متعلق باب میں ، اس نوعیت کی کچھ احادیث گزر چکی ہیں ۔

سیدنا سعید بن زید بن عمرو بن نفیل رضی اللہ عنہ فرماتے ہیں : تم لوگ مجھے یہ کہہ رہے ہوں کہ میں اپنے ساتھیوں کو برا کہوں ، بلکہ اللہ تعالیٰ ان پر رحمت نازل کرے اور ان کی مغفرت کرے ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : تمہیں اپنے اسلاف کے لئے دعائے مغفرت کرنے کا حکم دیا گیا ہے اور تم لوگ انہیں برا کہتے ہو ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” یہ امت اس وقت تک فنا نہیں ہو گی ، جب تک اس کے آخری زمانے کے لوگ ، پہلے والوں پر لعنت نہیں کریں گے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن ابراہیم بن مہاجر ہے اور وہ شخص ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تم لوگ میرے اصحاب کو برا نہ کہو ، اللہ تعالیٰ اس شخص پر لعنت کرے ، جو میرے اصحاب کو برا کہتا ہے ۔ “
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ، صرف علی بن سہل کا معاملہ مختلف ہے اور وہ ثقہ ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص میرے اصحاب میں سے کسی ایک کو برا کہے گا ، اُس پر اللہ تعالیٰ کی لعنت ہو گی ۔ “ ( علامہ ہیثمی فرماتے ہیں : ) میں یہ کہتا ہوں : اُن صحابی کے حوالے سے ایک روایت منقول ہے ، جو اس روایت کے علاوہ ہے ۔
یہ روایت امام طبرانی نے معجم اوسط میں نقل کی ہے اور اس کی سند میں ضعیف راوی ہیں ، جن کی توثیق کی گئی ہے ۔

سیدہ ام سلمہ رضی اللہ عنہا بیان کرتی ہیں : ایک مرتبہ میری باری کی مخصوص رات تھی ، نبی اکرم صلی اللہ علیہ وسلم میرے پاس موجود تھے ، سیدہ فاطمہ رضی اللہ عنہا نبی اکرم صلی اللہ علیہ وسلم کے پاس آئیں ، سیدنا علی رضی اللہ عنہ ان سے سبقت لے گئے ، نبی اکرم صلی اللہ علیہ وسلم نے ان سے فرمایا : اے علی ! تم اور تمہارے ساتھی جنت میں ہوں گے ، البتہ اس شخص کا معاملہ مختلف ہے ، جو یہ کہتا ہے ، وہ تم سے محبت رکھتا ہے ، کچھ لوگ ہیں ، جو اسلام کو پرے کر دیں گے اور اسے ایک طرف پھینک دیں گے ، وہ قرآن پڑھیں گے لیکن وہ اُن کے حلق سے آگے نہیں جائے گا ، ان کا ایک مخصوص نام ہو گا انہیں ” رافضہ “ کہا: جائے گا ، جب تم اُن کا زمانہ پاؤ ، تو ان کے ساتھ جہاد کرنا ، کیونکہ وہ لوگ مشرک ہوں گے ، میں نے عرض کی : یا رسول اللہ ! اُن کے درمیان موجود مخصوص نشانی کیا ہو گی ؟ نبی اکرم صلی اللہ علیہ وسلم نے فرمایا : ” وہ جمعہ اور جماعت میں شریک نہیں ہوں گے اور پہلے کے اسلاف پر طعن کریں گے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی فضل بن غانم ہے اور وہ ضعیف ہے ۔

سیدہ فاطمہ بنت محمد رضی اللہ عنہا بیان کرتی ہیں : نبی اکرم صلی اللہ علیہ وسلم نے سیدنا علی رضی اللہ عنہ اس کی طرف دیکھا اور فرمایا : یہ جنت میں جائے گا اور اس کے گروہ میں کچھ لوگ ایسے ہوں گے جو اسلام کو پھینک دیں گے اور وہ اسے پرے کر دیں گے ، اُن کا مخصوص نام ہو گا انہیں رافضہ کہا: جائے گا ، جو شخص ان سے ملے وہ اُن سے لڑے ، کیونکہ وہ لوگ مشرک ہوں گے ۔ “
یہ روایت امام ابویعلیٰ نے نقل کی ہے اور اس کے رجال ثقہ ہیں ، البتہ میرے خیال میں سیدہ زینب بنت علی رضی اللہ عنہا نے سیدہ فاطمہ رضی اللہ عنہا سے سماع نہیں کیا ہے ، باقی اللہ بہتر جانتا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” آخری زمانے میں کچھ لوگ آئیں گے جن کا نام رافضہ ہو گا ، وہ اسلام کو پرے کر دیں گے اور اسے پھینک دیں گے ، تم اُن کے ساتھ لڑائی کرنا ، کیونکہ وہ لوگ مشرک ہوں گے ۔ “
یہ روایت امام ابویعلیٰ امام بزار اور امام طبرانی نے نقل کی ہے اور اس کے رجال کی توثیق کی گئی ہے ، اس کے بعض راویوں میں اختلاف پایا جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : میں نبی اکرم صلی اللہ علیہ وسلم کے پاس موجود تھا ، سیدنا علی رضی اللہ عنہ بھی آپ کے پاس موجود تھے ، نبی اکرم صلی اللہ علیہ وسلم نے ارشاد فرمایا : ” اے علی ! عنقریب میری امت میں ایسے لوگ آئیں گے ، جو اہل بیت کے ساتھ محبت کا دعویٰ کریں گے ، اُن کا مخصوص نام ہو گا ، انہیں رافضہ کہا: جائے گا ، تم اُن کے ساتھ لڑائی کرنا ، کیونکہ وہ لوگ مشرک ہوں گے ۔ “
یہ روایت امام طبرانی نے نقل کی ہے اور اس کی سند حسن ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا :
” آخری زمانے میں ایسے لوگ ظاہر ہوں گے ، جن کا نام رافضہ ہو گا وہ اسلام کو پرے کر دیں گے ۔ “

یہ روایت عبداللہ اور بزار نے نقل کی ہے ، اس کی سند میں ایک راوی کبیر بن اسماعیل النواء ہے اور وہ ضعیف ہے ۔

سعید بن جبیر بیان کرتے ہیں : ایک شخص سیدنا عبداللہ بن عباس رضی اللہ عنہما کے پاس آیا اور بولا: مجھے کوئی تلقین کیجئے ، تو انہوں نے فرمایا : میں تمہیں اللہ تعالیٰ کا تقویٰ اختیار کرنے کی تلقین کرتا ہوں ، اور تم اللہ کے رسول کے اصحاب کا ذکر کرتے ہوئے احتیاط سے کام لینا ، کیونکہ تم یہ بات نہیں جانتے کہ اُن کے لئے کیا چیز سبقت لے جا چکی ہے ؟
یہ روایت امام طبرانی نے نقل کی ہے ، اس کی سند میں ایک راوی عمر بن عبداللہ ثقفی ہے اور وہ ضعیف ہے ۔

کریب بیان کرتے ہیں : سیدنا عبداللہ بن عباس رضی اللہ عنہما نے اُن سے فرمایا : اے لڑکے ! تم اللہ کے رسول کے اصحاب کو برا کہنے سے بچنا ، کیونکہ یہ ایک معیوب بات ہے ۔

عاصم بن ضمرہ بیان کرتے ہیں : میں نے سیدنا امام حسن بن علی رضی اللہ عنہ سے کہا: شیعہ یہ گمان کرتے ہیں کہ سیدنا علی رضی اللہ عنہ ( دنیا میں ) واپس آ جائیں گے ، تو انہوں نے فرمایا : یہ لوگ جھوٹے ہیں اور جھوٹ بولتے ہیں ، اگر ہمیں اس بات کا پتہ ہوتا ، تو آپ رضی اللہ عنہ کی ازواج نے دوسری شادی نہیں کرنی تھی ، اور نہ ہی ہم نے اُن کی وارثت تقسیم کرنی تھی ۔
یہ روایت عبداللہ نے نقل کی ہے اور اس کی سند عمدہ ہے ۔