مجمع الزوائد ومنبع الفوائد

سیدنا فیروز رضی اللہ عنہ بیان کرتے ہیں : اُن لوگوں نے اسلام قبول کر لیا ، اسلام قبول کرنے والوں میں سیدنا فیروز رضی اللہ عنہ بھی شامل تھے ، پھر ان لوگوں نے اپنا وفد نبی اکرم صلی اللہ علیہ وسلم کی خدمت میں ، اپنی بیعت اور اسلام کے لئے بھیجا ، تو نبی اکرم صلی اللہ علیہ وسلم نے ان لوگوں سے اس چیز کو قبول کیا ، انہوں نے عرض کی : یا رسول اللہ جیسا کہ آپ جانتے ہیں کہ ہم اس جگہ سے آئیں ہیں ، جس کے بارے میں آپ علم رکھتے ہیں ، ہم نے اسلام قبول کیا ہے تو ہمارا ولی کون ہو گا ؟ نبی اکرم صلی اللہ علیہ وسلم نے فرمایا : اللہ اور اس کا رسول ، اُن لوگوں نے عرض کی : یہ ہمارے لئے کافی ہے اور ہم اس سے راضی ہیں ۔
یہ روایت امام أحمد ، امام ابویعلیٰ اور امام طبرانی نے نقل کی ہے ، امام أحمد کے رجال صحیح کے رجال ہیں ، صرف عبداللہ بن فیروز کا معاملہ مختلف ہے اور وہ ثقہ ہے ۔