مجمع الزوائد ومنبع الفوائد

سیدنا عمیر بن سعد رضی اللہ عنہ بیان کرتے ہیں : سیدنا عمر بن خطاب رضی اللہ عنہ نے سیدنا عمیر بن سعد رضی اللہ عنہ کو حمص کا گورنر مقرر کر کے بھیجا تھا ، وہ ایک سال وہاں مقیم رہے وہ اس دوران سیدنا عمر رضی اللہ عنہ کے پاس نہیں آئے ، سیدنا عمر رضی اللہ عنہ نے اپنے نائب سے کہا: کہ تم سیدنا عمیر بن سعد رضی اللہ عنہ کو خط لکھو ، اللہ کی قسم ! اس کے بارے میں میرا یہ خیال ہے کہ اس نے ہمارے ساتھ خیانت کی ہے ، اسے یہ لکھو کہ جب میرا یہ مکتوب تمہارے پاس آئے ، تو تم آ جاؤ اور جب تم میرا یہ مکتوب دیکھو تو اس وقت تمہارے پاس جو مسلمان آئے ہوئے ہوں ، ان کو بھی لے آنا ، سیدنا عمیر رضی اللہ عنہ نے اپنا تھیلا پکڑا ، اس میں زاد سفر رکھا اور پیالہ رکھا اور اس کو ساتھ لٹکایا اور اپنا نیزہ پکڑا اور وہ حمص سے پیدل چل کر روانہ ہوئے ، یہاں تک کہ وہ مدینہ منورہ پہنچے ، راوی کہتے ہیں : جب وہ مدینہ منورہ آئے تو ان کا رنگ متغیر ہو چکا تھا ، ان کا چہرہ غبار آلود تھا ، ان کے بال بڑھ چکے تھے ، وہ سیدنا عمر رضی اللہ عنہ کی خدمت میں حاضر ہوئے ، انہوں نے کہا: اے امیر المؤمنین ! آپ پر سلامتی نازل ہو اور اللہ کی رحمت نازل ہو ، سیدنا عمر رضی اللہ عنہ نے دریافت کیا : تمہارا کیا معاملہ ہے ؟ سیدنا عمیر رضی اللہ عنہ نے دریافت کیا : آپ کو میرا معاملہ کیا لگتا ہے ؟ کیا آپ مجھے دیکھ نہیں رہے کہ میرا جسم ٹھیک ہے ، خون پاک ہے ، میرے ساتھ دنیا موجود ہے ، جسے میں سینگ سے پکڑ کر کھینچ کر لایا ہوں ، سیدنا عمر رضی اللہ عنہ نے دریافت کیا : تمہارے پاس کیا ہے ؟ سیدنا عمر رضی اللہ عنہ یہ سمجھے تھے کہ شاید وہ مال لے کر آئے ہیں ، انہوں نے کہا: میرے پاس میرا یہ تھیلا ہے جس میں ، میں نے اپنا زاد سفر اور پیالہ رکھا ہے ، جس میں میں کھاتا ہوں اور اس کے ذریعے میں اپنے سر اور کپڑے کو بھی دھو لیتا ہوں ، اور ایک میرا برتن ہے ، جس میں وضو کے لئے پانی لے لیتا ہوں اور پینے کے لئے لے لیتا ہوں ، اور میرا ایک نیزہ بھی ہے ، جس کے ساتھ میں ٹیک بھی لگا لیتا ہوں اور اس کے ذریعے میں اپنے دشمن کے ساتھ جنگ بھی کر لیتا ہوں ، اگر وہ میرے مقابل آ جائے ، اللہ کی قسم ! دنیا میرے اسی ساز و سامان کی پیروکار ہے ، سیدنا عمر رضی اللہ عنہ نے دریافت کیا : کیا تم پیدل چل کر آئے ہو ؟ انہوں نے جواب دیا : جی ہاں ! سیدنا عمر رضی اللہ عنہ نے دریافت کیا : کیا کوئی ایسا شخص نہیں تھا ، جو تمہیں ایک سواری تحفے کے طور پر دے دیتا ، تاکہ تم اس پر سوار ہو جاتے ، انہوں نے کہا: ان لوگوں نے ایسا نہیں کیا ، اور میں نے ان سے یہ چیز مانگی بھی نہیں ، تو سیدنا عمر رضی اللہ عنہ نے کہا: وہ مسلمان برے ہیں جن کے پاس سے نکل کر تم آئے ہو ، تو سیدنا عمیر رضی اللہ عنہ نے کہا: اے عمر ! آپ اللہ سے ڈریں ، اللہ تعالیٰ نے آپ کو غیبت کرنے سے منع کیا ہے ، میں نے ان لوگوں کو صبح کی نماز ادا کرتے ہوئے دیکھا ہے ، سیدنا عمر رضی اللہ عنہ نے دریافت کیا : وہ کیا معاملہ ہے جس کی خاطر میں نے تمہیں بھیجا تھا ، تم نے کیا کیا ؟ سیدنا عمیر رضی اللہ عنہ نے دریافت کیا : اے امیر المؤمنین ! آپ کس چیز کے بارے میں پوچھنا چاہ رہے ہیں ؟ سیدنا عمر رضی اللہ عنہ نے کہا: سبحان اللہ ! سیدنا عمیر رضی اللہ عنہ نے کہا: اللہ کی قسم ! اگر مجھے اس بات کا اندیشہ نہ ہوتا کہ میں آپ کو غمگین کر دوں گا ، تو میں نے آپ کو یہ بات نہیں بتائی تھی ، جب آپ نے مجھے پیغام بھیجا اور آپ کا پیغام مجھ تک پہنچا ، تو میں شہر میں آیا میں نے شہر کے نیک لوگوں کو جمع کیا اور میں نے ان کے مال غنیمت کا ان کو نگران مقرر کیا اور جب ان لوگوں نے اس کو اکٹھا کر لیا اور میں نے اس کے خرچ کا تعین کر دیا ، تو میں آیا اگر اس میں سے آپ کا بھی کوئی حصہ ہوتا ، تو وہ میں آپ کے پاس لے آتا ، سیدنا عمر رضی اللہ عنہ نے دریافت کیا : تم ہمارے لئے کچھ نہیں لے کے آئے ؟ انہوں نے جواب دیا : جی نہیں ! سیدنا عمر رضی اللہ عنہ نے کہا: عمیر کے لئے نئے سرے سے حکم نامہ جاری کرو ، تو سیدنا عمیر رضی اللہ عنہ نے کہا: یہ ٹھیک نہیں ہے ، میں آپ کے لئے کام نہیں کروں گا ، اور نہ ہی آپ کے بعد کسی اور کے لئے کام کروں گا ، اللہ کی قسم ! میں سلامت میں ہی رہوں گا ، بلکہ میں نے اسلام ہی قبول نہیں کیا ہو گا کہ اگر میں نے کسی عیسائی کو بھی یہ کہا: ہو کہ اللہ تعالیٰ تمہیں رسوا کرے ، تو اے سیدنا عمر ! آپ مجھے اس کام کے لئے دوبارہ بھیجنا چاہ رہے ہیں ، میری زندگی کا سب سے زیادہ بدنصیب دن وہ ہو گا ، جب میں آپ سے پیچھے رہ جاؤں ، اے عمر ! پھر انہوں نے سیدنا عمر رضی اللہ عنہ سے اجازت مانگی ، سیدنا عمر رضی اللہ عنہ نے انہیں اجازت دی ، تو وہ اپنے گھر واپس چلے گئے ۔ راوی بیان کرتے ہیں : اُن کے گھر اور مدینہ منورہ کے درمیان کچھ میل کا فاصلہ تھا ، جب سیدنا عمیر رضی اللہ عنہ واپس چلے گئے تو سیدنا عمر رضی اللہ عنہ نے کہا: اس کے بارے میں میرا یہ خیال ہے کہ اس نے ہمارے ساتھ خیانت کی ہے ، پھر انہوں نے ایک شخص کو بھیجا ، جس کا نام حارث تھا ، انہوں نے کہا: کہ تم جاؤ اور اس کے ہاں یوں ٹھہرنا ، جیسے مہمان ہو ، اگر تمہیں کوئی اس طرح کا نشان نظر آئے ( جس سے خیانت ظاہر ہو رہی ہو ) تو آ جانا اور اگر تم مشکل صورت حال دیکھو ( یعنی ان کے گھر میں غربت ہو ) تو تم ایک سو دینار اسے دیدینا ۔ حارث نامی وہ شخص گیا ، سیدنا عمیر رضی اللہ عنہ اس وقت اپنی دیوار کے سائے میں بیٹھے ہوئے اپنی قمیص کو سی رہے تھے ، اس شخص نے انہیں سلام کیا سیدنا عمیر رضی اللہ عنہ نے اس سے کہا: اللہ تعالیٰ تم پر رحم کرے ، تم یہاں ٹھہر جاؤ ! وہ شخص وہاں ٹھہر گیا ، پھر سیدنا عمیر رضی اللہ عنہ نے اس سے دریافت کیا : تم کہاں سے آئے ہو ؟ اس نے جواب دیا : مدینہ منورہ سے ، سیدنا عمیر رضی اللہ عنہ نے دریافت کیا : تم نے امیر المؤمنین کو کیسی حالت میں چھوڑا ہے ؟ اس نے بتایا : ٹھیک ہیں ، سیدنا عمیر رضی اللہ عنہ نے دریافت کیا : تم نے مسلمانوں کو کیسی حالت میں چھوڑا ہے ؟ اس نے بتایا : وہ بھی ٹھیک ہیں ، سیدنا عمیر رضی اللہ عنہ نے دریافت کیا : کیا وہ لوگ حدود قائم نہیں کرتے ہیں ؟ تو اس شخص نے بتایا : جی ہاں ! ( یعنی قائم کرتے ہیں ) انہوں نے اپنے بیٹے کو سزا دی تھی ، جس نے ایک برائی کا ارتکاب کیا تھا اور اس سزا کی وجہ سے اس بچے کا انتقال ہو گیا تھا ، تو سیدنا عمیر رضی اللہ عنہ نے کہا: اے اللہ ! تو سیدنا عمر رضی اللہ عنہ کی مدد فرمانا ، کیونکہ میرے علم کے مطابق وہ تیرے ساتھ محبت رکھنے کی وجہ سے اتنے سخت ہیں ۔ راوی کہتے ہیں : وہ شخص اُن کے ہاں تین دن ٹھہرا رہا ، ان لوگوں کو کھانے کے لئے صرف جو کی روٹی ملتی تھی ، وہ لوگ جو کی اس روٹی کا کچھ حصہ توڑ کر کھا لیتے تھے اور باقی رکھ دیتے تھے ، یہاں تک کہ انہیں بھوک لاحق ہو گئی ، تو سیدنا عمیر رضی اللہ عنہ نے اس شخص سے کہا: اے فرد ! تم نے ہمیں بھوک کا شکار کر دیا ہے ، اگر تم مناسب سمجھو تو ہمارے پاس سے روانہ ہو جاؤ ، راوی کہتے ہیں : تو اس شخص نے دینار نکالے اور وہ ان کے حوالے کیے اور یہ کہا: یہ امیر المؤمنین نے آپ کو بھجوائے ہیں ، آپ ان کے ذریعے مدد حاصل کریں ، تو انہوں نے چیخ ماری اور کہا: مجھے ان کی ضرورت نہیں ہے تم انہیں واپس لے جاؤ ، ان کی اہلیہ نے ان سے کہا: اگر آپ کو ان کی ضرورت ہے ، تو لے لیں اور اگر نہیں ہے تو پھر اسے صحیح جگہ پر خرچ کر دیں ، سیدنا عمیر رضی اللہ عنہ نے کہا: اللہ کی قسم ! میرے پاس کوئی چیز نہیں ہے کہ جس میں اُس کو خرچ کروں ، تو اس عورت نے اپنی چادر کا نیچے والا حصہ چیرا اور وہ ٹکڑا انہیں دیا ، انہوں نے اس میں وہ دینار رکھ دیے پھر وہ باہر تشریف لے گئے انہوں نے وہ دینار شہداء اور غریبوں کے بچوں میں تقسیم کر دیے ، پھر وہ واپس آ گئے ، قاصد یہ سمجھ رہا تھا کہ شاید وہ اسے بھی اُن میں سے کچھ دیں گے ، انہوں نے قاصد سے کہا: تم امیر المؤمنین کو میری طرف سے سلام کہہ دینا ۔ جب حارث نامی شخص سیدنا عمر رضی اللہ عنہ کے پاس واپس آیا ، تو سیدنا عمر رضی اللہ عنہ نے دریافت کیا : تم نے کیا دیکھا ؟ تو اس نے کہا: اے امیر المؤمنین ! میں نے مشکل صورت حال دیکھی ، سیدنا عمر رضی اللہ عنہ نے دریافت کیا : اس نے دیناروں کا کیا کیا ؟ قاصد نے کہا: مجھے نہیں معلوم ، راوی کہتے ہیں : سیدنا عمر رضی اللہ عنہ نے انہیں خط لکھا کہ جب میرا مکتوب تمہارے پاس آئے تو تم اسے ہاتھ میں رکھنے سے پہلے میری طرف روانہ ہو جانا ، پھر وہ سیدنا عمر رضی اللہ عنہ کے پاس آئے اور وہ سیدنا عمر رضی اللہ عنہ کی خدمت میں حاضر ہوئے ، سیدنا عمر رضی اللہ عنہ نے دریافت کیا : تم نے دیناروں کا کیا کیا ؟ انہوں نے کہا: میں نے ان کا جو بھی کیا ہو ، آپ اس کے بارے میں کیوں پوچھ رہے ہیں ؟ سیدنا عمر رضی اللہ عنہ نے کہا: میں اللہ کا واسطہ دے کر دریافت کرتا ہوں ، تم مجھے یہ بتاؤ کہ تم نے ان کا کیا کیا ؟ تو سیدنا عمیر رضی اللہ عنہ نے جواب دیا : میں نے اپنی ذات کے لئے وہ آگے بھجوا دیے ہیں ، تو سیدنا عمر رضی اللہ عنہ نے کہا: اللہ تعالیٰ تم پر رحم کرے ، پھر سیدنا عمر رضی اللہ عنہ نے حکم دیا کہ انہیں اناج کا ایک وسق اور دو کپڑے دیے جائیں ، تو سیدنا عمیر رضی اللہ عنہ نے کہا: جہاں تک اناج کا تعلق ہے تو مجھے اس کی ضرورت نہیں ہے ، کیونکہ میں اپنے گھر میں جو کے دو صاع چھوڑ کے آیا ہوں ، وہ آگے میرے کام آتے رہیں گے ، یہاں تک کہ اللہ تعالیٰ مزید عطا کر دے گا ، تو انہوں نے اناج نہیں لیا ، پھر انہوں نے فرمایا : جہاں تک دو کپڑوں کا تعلق ہے ، تو فلاں خاتون کو کپڑوں کی ضرورت ہے ، انہوں نے وہ دو کپڑے لئے اور اس کو لے کر اپنے گھر آ گئے ، پھر وہ اپنے گھر میں ہی مقیم رہے ، یہاں تک کہ ان کا انتقال ہو گیا ، اللہ تعالیٰ ان پر رحم کرے ۔ جب سیدنا عمر رضی اللہ عنہ کو اس بات کی اطلاع ملی ، تو یہ خبر اُن پر بہت گراں گزری ، انہوں نے سیدنا عمیر رضی اللہ عنہ کے لئے رحمت کے کلمات پڑھے ، وہ پیدل چلتے ہوئے نکلے ، ان کے ساتھ دوسرے پیدل لوگ بھی تھے ، یہاں تک کہ وہ بقیع غرقد کے پاس آئے اور انہوں نے اپنے ساتھیوں سے فرمایا : تم میں سے ہر ایک شخص اپنی اپنی خواہش بیان کرے ، تو ایک شخص نے کہا: اے امیر المؤمنین ! میری یہ خواہش تھی کہ میرے پاس مال موجود ہوتا اور میں اس کے ذریعے اللہ کی ذات کی خاطر اتنے اتنے لوگوں کو آزاد کر دیتا ، ایک اور شخص نے کہا: میری یہ خواہش تھی کہ میرے پاس مال موجود ہوتا ، اُسے میں اللہ کی راہ میں خرچ کرتا ، ایک اور شخص نے کہا: میری یہ خواہش تھی کہ میرے پاس قوت موجود ہوتی اور میں اس قوت کے ذریعے آب زمزم نکال کر بیت اللہ کے حاجیوں کو دیتا ، سیدنا عمر رضی اللہ عنہ نے فرمایا : میری یہ خواہش ہے کہ میرے پاس عمیر جیسا کوئی فرد ہوتا ، اور میری یہ خواہش ہے کہ میرے پاس عمیر جیسے کئی افراد ہوتے ، جن کے ذریعے میں مسلمانوں کے کاموں میں مدد حاصل کر سکتا ۔
یہ روایت امام طبرانی نے نقل کی ہے اس کی سند میں ایک راوی عبدالملک بن ابراہیم بن عثرہ ہے اور وہ متروک ہے ۔