مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ تبوک میں موجود تھے ، جب سورج نکلا تو اس کی روشنی تیز تھی ، اس سے پہلے ہم نے اس کو کبھی اس طرح چمکدار عالم میں طلوع ہوتے ہوئے نہیں دیکھا تھا ، سیدنا جبرائیل علیہ السلام نبی اکرم صلی اللہ علیہ وسلم کے پاس آئے ، تو نبی اکرم صلی اللہ علیہ وسلم نے ارشاد فرمایا : اے جبرائیل ! کیا وجہ ہے کہ آج میں دیکھ رہا ہوں کہ سورج کی روشنی بہت تیز ہے ؟ اس سے پہلے میں نے کبھی اسے اس طرح طلوع ہوتے ہوئے نہیں دیکھا ، تو سیدنا جبرائیل علیہ السلام نے بتایا کہ مدینہ منورہ میں آج سیدنا معاویہ بن معاویہ لیثی رضی اللہ عنہ کا انتقال ہو گیا ہے ، تو اللہ تعالیٰ نے ان کی طرف ایک ہزار فرشتے بھیجے ہیں ، تاکہ وہ ان کی نماز جنازہ ادا کریں ، نبی اکرم صلی اللہ علیہ وسلم نے دریافت کیا : اس کی وجہ کیا ہے ؟ تو سیدنا جبرائیل علیہ السلام نے بتایا : وہ رات اور دن میں ، چلتے ہوئے قیام کے دوران ، بیٹھنے کے دوران ، کثرت کے ساتھ سورہ اخلاص پڑھا کرتے تھے ، پھر انہوں نے دریافت کیا : یا رسول اللہ ! کیا آپ اس بات میں دلچسپی رکھتے ہیں کہ میں آپ کے لئے زمین کو سمیٹ دوں اور آپ ان کی نماز جنازہ ادا کر لیں ؟ نبی اکرم صلی اللہ علیہ وسلم نے جواب دیا : جی ہاں ! تو نبی اکرم صلی اللہ علیہ وسلم نے اُن کی نماز جنازہ ادا کی ۔
یہ روایت امام ابویعلیٰ نے نقل کی ہے ، اس کی سند میں ایک راوی علاء بن زیدل ابومحمد ثقفی ہے اور وہ متروک ہے ۔