مجمع الزوائد ومنبع الفوائد

سیدنا براء بن عازب رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا حسان بن ثابت رضی اللہ عنہ سے فرمایا : ” تم مشرکین کی ہجو کرو ! بے شک اللہ تعالیٰ روح القدس کے ذریعے تمہاری تائید کرے گا ۔ “
یہ روایت امام طبرانی نے معجم صغیر میں نقل کی ہے ، اس کی سند میں ایک راوی ایوب بن سوید رملی ہے اور وہ ضعیف ہے ، ابن حبان نے اسے ثقہ قرار دیا ہے ، وہ یہ کہتے ہیں : یہ خراب حافظے کا مالک ہے ۔

سعید بن جبیر بیان کرتے ہیں : ایک شخص سیدنا عبداللہ بن عباس رضی اللہ عنہما کے پاس آیا اور بولا: حسان لعین آیا ہے ، تو سیدنا عبداللہ بن عباس رضی اللہ عنہما نے فرمایا : وہ لعین نہیں ہیں ، انہوں نے نبی اکرم صلی اللہ علیہ وسلم کے ہمراہ ، اپنی زبان اور جان کے ہمراہ جہاد کیا ہے ۔
یہ روایت امام ابویعلیٰ نے نقل کی ہے اس کی سند میں ایک راوی خدیج بن معاویہ بن حدیج ہے اور وہ ضعیف ہے ، ویسے اس کی توثیق کی گئی ہے ۔