مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے میری کنیت ” ابوحمزہ “ رکھی تھی ۔ ( علامہ ہیثمی فرماتے ہیں : ) میں یہ کہتا ہوں : امام ترمذی نے اُن کے حوالے سے
یہ روایت نقل کی ہے کہ نبی اکرم صلی اللہ علیہ وسلم نے میری یہ کنیت ( ” حمزہ “ نامی ) ایک سبزی کی وجہ سے رکھی تھی ، جسے میں ڈھونڈ ڈھونڈ کر کھاتا تھا ۔
یہ روایت امام طبرانی نے نقل کی ہے اس کی سند میں ایک راوی جابر جعفی ہے اور وہ ضعیف ہے ۔

سیدنا انس رضی اللہ عنہ بیان کرتے ہیں : میری لمبی زلفیں تھیں ، نبی اکرم صلی اللہ علیہ وسلم انہیں کھینچ لیتے تھے اور انہیں پکڑ لیتے تھے ۔
یہ روایت امام طبرانی نے نقل کی ہے اور اس کی سند عمدہ ہے ۔

سیدنا انس رضی اللہ عنہ بیان کرتے ہیں : مجھے یہ امید ہے کہ جب میں اللہ کے رسول صلی اللہ علیہ وسلم کی بارگاہ میں حاضر ہوؤں گا : تو میں عرض کروں گا : آپ کا ادنیٰ خادم ۔
یہ روایت امام ابویعلیٰ نے نقل کی ہے ، اس کی سند میں ایک راوی حکم بن عطیہ ہے ، جسے امام أحمد اور دیگر حضرات نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال صحیح کے رجال ہیں ۔

ثابت بیان کرتے ہیں : سیدنا انس رضی اللہ عنہ کے پاس میں آیا کرتا تھا ، اور انہیں میرے آنے کے بارے میں بتایا جاتا تھا ، تو وہ مجھے اندر آنے کے لئے کہتے تھے ، میں ان کے دونوں ہاتھ پکڑ کے ان کو بوسہ دیتا تھا اور یہ کہتا تھا : میرے والد آپ پر قربان ہوں ، یہ دونوں ہاتھ وہ ہیں جنہوں نے نبی اکرم صلی اللہ علیہ وسلم کو چھوا ہے ، پھر ان کی دونوں آنکھوں کو بوسہ دیتا تھا اور یہ کہتا تھا : میرے والد آپ پر قربان ہوں ، یہ دو آنکھیں وہ ہیں ، جنہوں نے نبی اکرم صلی اللہ علیہ وسلم کی زیارت کی ہے ۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ، صرف عبداللہ بن ابوبکر مقدمی کا معاملہ مختلف ہے اور وہ ثقہ ہے ۔

قتادہ بیان کرتے ہیں : سیدنا انس بن مالک رضی اللہ عنہ کا انتقال ہوا ، تو مورق عجلی نے کہا: آج نصف علم رخصت ہو گیا ، اُن سے کہا: گیا : اے ابومغیرہ ! وہ کیسے ؟ انہوں نے فرمایا : پہلے جب کوئی بدمذہب کسی حدیث کے بارے میں ، ہم سے اختلاف کرتا تھا ، تو ہم اس سے یہ کہتے تھے : کہ آؤ ! ہم اُن کے پاس چلتے ہیں ، جنہوں نے یہ حدیث نبی اکرم صلی اللہ علیہ وسلم سے سنی ہوئی ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

جریر بن حازم بیان کرتے ہیں : میں نے شعیب بن حجاب سے دریافت کیا : سیدنا انس بن مالک رضی اللہ عنہ کا انتقال کب ہوا تھا ؟ انہوں نے جواب دیا : 90 ہجری میں ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سری بن یحیی بیان کرتے ہیں : سیدنا انس بن مالک رضی اللہ عنہ کا انتقال 93 ہجری میں ہوا تھا ۔
یہ روایت امام طبرانی نے نقل کی ہے اور اس کی سند حسن ہے ۔