مجمع الزوائد ومنبع الفوائد

سیده ام خالد رضی اللہ عنہا بنت اسود بن عبدیغوث کے بارے میں یہ بات منقول ہے کہ وہ نبی اکرم صلی اللہ علیہ وسلم کے پاس آئیں تو نبی اکرم صلی اللہ علیہ وسلم نے دریافت کیا : یہ کون ہے ؟ لوگوں نے بتایا : یہ اسود بن عبدیغوث کی بیٹی ہے ، تو نبی اکرم صلی اللہ علیہ وسلم نے فرمایا : ” ہر طرح کی حمد اللہ تعالیٰ کے لیے مخصوص ہے جو مردہ میں سے زندہ نکالتا ہے ۔ “ نبی اکرم صلی اللہ علیہ وسلم کی مراد یہ تھی کہ وہ کافر میں سے مومن کو نکال دیتا ہے ۔

ایک روایت میں یہ الفاظ ہیں : نبی اکرم صلی اللہ علیہ وسلم گھر تشریف لائے تو آپ نے دریافت کیا : یہ کون ہے ؟ تو لوگوں نے بتایا : یہ آپ کی ننھیالی عزیزہ ہیں ، تو نبی اکرم صلی اللہ علیہ وسلم نے فرمایا : اس سرزمین پر میری خالاؤں کا ہونا حیران کن بات ہے ، یہ کون ہیں ؟ تو لوگوں نے بتایا : یہ ام خالد بنت اسود بن عبدیغوث ہیں ، تو نبی اکرم صلی اللہ علیہ وسلم نے فرمایا : ” پاک ہے وہ ذات جو مردہ میں سے زندہ کو نکالتا ہے ۔ “ یہ تمام روایات امام طبرانی نے نقل کی ہیں ، اس میں دوسری سند حسن ہے ۔