مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : انصار سے تعلق رکھنے والا ایک شخص نابینا ہو گیا اس نے نبی اکرم صلی اللہ علیہ وسلم کو پیغام بھیجا کہ آپ میرے گھر میں نماز کے لئے جگہ مخصوص کرنے کے لئے نشان دہی کر دیں تاکہ میں وہاں نماز ادا کیا کروں ، نبی اکرم صلی اللہ علیہ وسلم تشریف لائے اس شخص کی قوم کے کچھ افراد آپ کے گرد اکٹھے ہو گئے ، ایک شخص وہاں موجود نہیں تھا ۔ نبی اکرم صلی اللہ علیہ وسلم نے دریافت کیا : فلاں کا کیا حال ہے ؟ حاضرین میں سے کسی نے اس کا ذکر ( منفی انداز میں ) کیا ، تو نبی اکرم صلی اللہ علیہ وسلم نے فرمایا : کیا اس نے بدر میں شرکت نہیں کی ہے ؟ لوگوں نے بتایا جی ہاں ، لیکن وہ ایسا ایسا شخص ہے ۔ نبی اکرم صلی اللہ علیہ وسلم نے ارشاد فرمایا : ” ہو سکتا ہے اللہ تعالیٰ نے اہل بدر کی طرف جھانک کر یہ فرمایا ہو : تم لوگ جو چاہو عمل کرو ، میں نے تمہاری مغفرت کر دی ہے ۔ “ ( علامہ ہیثمی فرماتے ہیں : ) میں یہ کہتا ہوں یہ روایت امام ابوداؤد اور امام ابن ماجہ نے بہت زیادہ اختصار کے ساتھ نقل کی یہ روایت امام طبرانی نے معجم اوسط میں نقل کی ہے اور اس کی سند حسن ہے ۔

سیدنا عبداللہ بن ابواوفیٰ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے یہ امید ہے کہ کوئی ایسا شخص جہنم میں داخل نہیں ہو گا ، جس نے گھاٹی کو عبور کیا ہو ۔ “
یہ روایت امام طبرانی نے نقل کی ہے اور اس کے رجال ” صحیح “ کے رجال ہیں امام بزار نے اس کی مانند روایت نقل کی ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے حدیبیہ کے موقع پر یہ ارشاد فرمایا : تم لوگ رات کے وقت آگ نہ جلانا ، اس کے بعد نبی اکرم صلی اللہ علیہ وسلم نے ارشاد فرمایا : ” تم آگ جلاؤ اور کام کاج کرو کیونکہ تمہارے بعد والا کوئی فرد تمہارے مد اور تمہارے صاع تک نہیں پہنچ پائے گا ۔ “
یہ روایت امام ابویعلیٰ نے نقل کی ہے ، اور اس کے رجال کی توثیق کی گئی ہے اس کے بعض رجال کے بارے میں اختلاف پایا جاتا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر وہ شخص جنت میں داخل ہو گا ، جس نے درخت کے نیچے بیعت کی ہے البتہ سرخ اونٹ والے شخص کا معاملہ مختلف ہے ۔ “
یہ روایت امام بزار نے نقل کی ہے اور اس کے رجال ” صحیح “ کے رجال ہیں ، صرف خداش بن عیاش کا معاملہ مختلف ہے اور وہ ثقہ ہے ۔