مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : ہم لوگ یہ بات چیت کیا کرتے تھے کہ اہل مدینہ میں سب سے زیادہ فضیلت والے فرد سیدنا علی بن ابوطالب رضی اللہ عنہ ہیں ۔
یہ روایت امام بزار نے نقل کی ہے ۔ اس کی سند میں ایک راوی یحیی بن سکن ہے ، جسے ابن حبان نے ثقہ قرار دیا ہے ، اور صالح جزرہ نے اسے ضعیف کہا: ہے اس روایت کے بقیہ رجال ثقہ ہیں ۔

ان کے حوالے سے یہ بات منقول ہے وہ فرماتے ہیں : میں نے نبی اکرم صلی اللہ علیہ وسلم کے سامنے ستر سورتیں تلاوت کی ہیں ، اور میں نے لوگوں میں سب سے بہتر سیدنا علی بن ابوطالب رضی اللہ عنہ کے سامنے پورا قرآن ختم کیا ہے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت صحیح میں مذکور ہے ، تاہم اس میں سیدنا علی رضی اللہ عنہ کے سامنے پورا قرآن ختم کرنے والا حصہ نہیں ہے ۔
یہ روایت امام طبرانی نے معجم اوسط میں نقل کی ہے ، اور اس کی سند میں ایسا راوی ہے جس سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے دریافت کیا : عربوں کا سردار کون ہے ؟ لوگوں نے عرض کی : یا رسول اللہ ! آپ ہیں ، نبی اکرم صلی اللہ علیہ وسلم نے فرمایا : میں اولاد آدم کا سردار ہوں اور علی ، عربوں کا سردار ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی خاقان بن عبداللہ بن اہتم ہے ، جسے امام ابوداؤد نے ضعیف قرار دیا ہے ۔