مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم میرے ہاں تشریف لائے ، آپ صلی اللہ علیہ وسلم نے گوشت ملاحظہ فرمایا ، تو دریافت کیا : یہ کس نے بھیجا ہے ؟ میں نے عرض کی : سیدنا عثمان رضی اللہ عنہ نے ، سیدہ عائشہ رضی اللہ عنہا فرماتی ہیں : تو میں نے نبی اکرم صلی اللہ علیہ وسلم کو دیکھا کہ آپ صلی اللہ علیہ وسلم نے دونوں ہاتھ بلند کر کے سیدنا عثمان رضی اللہ عنہ کے لئے دعا کی ۔
یہ روایت امام بزار نے نقل کی ہے ، اور اس کی سند حسن ہے ۔

سیدنا عبدالرحمن بن عوف رضی اللہ عنہ کے بارے میں یہ بات منقول ہے کہ وہ اس موقع پر موجود تھے جب سیدنا عثمان غنی رضی اللہ عنہ نے جیش عسرت کے لئے ساز و سامان نبی اکرم صلی اللہ علیہ وسلم کی خدمت میں پیش کیا تھا ، وہ سات سو اوقیہ سونا لے کر آئے تھے ۔
یہ روایت امام ابویعلیٰ نے ، امام طبرانی نے معجم اوسط میں نقل کی ہے ۔ اس کی سند میں ایک راوی ابراہیم بن عمر بن ابان ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں سیدنا عثمان غنی رضی اللہ عنہ دینار لے کے آئے اور وہ دینار نبی اکرم صلی اللہ علیہ وسلم کی گود میں ڈال دیے ، تو نبی اکرم صلی اللہ علیہ وسلم انہیں الٹنے پلٹنے لگے ، اور یہ ارشاد فرمانے لگے : ” عثمان پر کوئی حرج نہیں ہو گا اگر وہ آج کے دن کے بعد کوئی کام نہ کرے ۔ “
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن صالح رامہز مزی ہے ، اور وہ ضعیف ہے ۔

سیدنا ابومسعود رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ ایک غزوہ میں شریک ہوئے ، لوگوں کو بھوک لاحق ہوئی ، یہاں تک کہ میں نے مسلمانوں کے چہروں پر پریشانی کے آثار دیکھے اور منافقین کے چہروں پر خوشی کے آثار دیکھے ، جب نبی اکرم صلی اللہ علیہ وسلم نے یہ صورت حال ملاحظہ کی ، تو آپ نے ارشاد فرمایا : اللہ کی قسم ! سورج غروب ہونے سے پہلے اللہ تعالیٰ تمہارے پاس رزق بھیج دے گا ۔ سیدنا عثمان رضی اللہ عنہ یہ بات جانتے تھے کہ اللہ اور اس کا رسول سچ فرماتے ہیں ، تو سیدنا عثمان رضی اللہ عنہ نے چودہ اونٹنیاں خریدیں اور وہ ان پر موجود اناج سمیت خریدیں ، پھر ان میں سے نو نبی اکرم صلی اللہ علیہ وسلم کی طرف بھجوا دیں ، جب نبی اکرم صلی اللہ علیہ وسلم نے انہیں ملاحظہ کیا ، تو دریافت کیا : یہ کہاں سے آئی ہیں ؟ تو اس شخص نے بتایا : سیدنا عثمان رضی اللہ عنہ نے آپ کو تحفہ بھیجا ہے ۔ نبی اکرم صلی اللہ علیہ وسلم کے چہرے پر خوشی کے آثار نمایاں ہوئے اور منافقین کے چہروں پر پریشانی ظاہر ہوئی ، تو میں نے نبی اکرم صلی اللہ علیہ وسلم کو دیکھا کہ آپ نے اپنے دونوں ہاتھ بلند کیے ، یہاں تک کہ آپ کی بغلوں کی سفیدی نظر آنے لگی ، آپ سیدنا عثمان رضی اللہ عنہ کے لئے دعا کر رہے تھے ، میں نے نبی اکرم صلی اللہ علیہ وسلم کو اس سے پہلے اور اس کے بعد یہ دعا کرتے ہوئے نہیں دیکھا ، آپ یہ کہہ رہے تھے : ” اے اللہ ! تو عثمان کو عطا فرما ۔ اے اللہ ! تو عثمان کے ساتھ یہ کر دے ۔ “
یہ روایت امام طبرانی نے نقل کی ہے ۔ اس کی سند میں ایک راوی سعید بن محمد وراق ہے ، اور وہ ضعیف ہے ۔ یہ انہوں نے معجم اوسط میں نقل کی ہے ، اور اس میں ایک خواب ہے ، جو امام حسن بن علی رضی اللہ عنہما نے دیکھا تھا ، اس کا ذکر آگے چل کے آئے گا ، اگر اللہ نے چاہا ۔