مجمع الزوائد ومنبع الفوائد

سیدنا اسامہ بن زید رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک پیالہ دے کر مجھے سیدنا عثمان رضی اللہ عنہ کی طرف بھیجا ، جس پیالے میں گوشت موجود تھا ، جب میں ان کے ہاں آیا تو سیدہ رقیہ رضی اللہ عنہا بیٹھی ہوئی تھیں ۔ میں نے ان دونوں سے زیادہ خوبصورت جوڑا کوئی نہیں دیکھا ، کبھی میں سیدہ رقیہ رضی اللہ عنہا کی طرف دیکھتا تھا کبھی میں سیدنا عثمان رضی اللہ عنہ کی طرف دیکھتا تھا ، جب میں واپس آیا تو نبی اکرم صلی اللہ علیہ وسلم نے مجھ سے دریافت کیا : کیا تم ان کے ہاں گئے تھے ، میں نے جواب دیا : جی ہاں ! نبی اکرم صلی اللہ علیہ وسلم نے دریافت کیا : کیا تم نے ان دونوں سے زیادہ خوبصورت جوڑا کوئی دیکھا ہے ، میں نے عرض کی : جی نہیں یا رسول اللہ ! میں بھی سیدہ رقیہ رضی اللہ عنہا کی طرف دیکھتا تھا اور کبھی سیدنا عثمان رضی اللہ عنہ کی طرف دیکھتا تھا ۔
یہ روایت امام طبرانی نے نقل کی ہے وہ کہتے ہیں ۔ یہ حجاب کا حکم نازل ہونے سے پہلے کی بات ہے ، اس روایت کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال ” صحیح “ کے رجال ہیں ۔

سیدنا عبداللہ بن حزم مازنی رضی اللہ عنہ بیان کرتے ہیں : میں نے سیدنا عثمان غنی رضی اللہ عنہ کو دیکھا ، میں نے ان سے زیادہ خوبصورت چہرے والا کوئی مرد یا کوئی عورت نہیں دیکھا ۔
یہ روایت امام طبرانی نے نقل کی ہے ۔ اس کی سند میں ایک راوی ربیع بن بدر ہے ، اور وہ متروک ہے ۔

عبدالله بن شداد بن الہاد بیان کرتے ہیں : میں نے جمعہ کے دن سیدنا عثمان غنی رضی اللہ عنہ کو منبر پر دیکھا ، انہوں نے عدنی تہبند باندھا ہوا تھا ، جو موٹا تھا اور اس کی قیمت چار یا شاید پانچ درہم تھی اور ایک کوفی چادر لی ہوئی تھی ، جس پر نقش و نگار بنے ہوئے تھے وہ بھرپور جسم کے مالک تھے ۔ ان کی داڑھی لمبی تھی اور چہرہ خوبصورت تھا ۔
یہ روایت امام طبرانی نے نقل کی ہے ، اور اس کی سند حسن ہے ۔

موسیٰ بن طلحہ بیان کرتے ہیں سیدنا عثمان غنی رضی اللہ عنہ جمعہ کے دن عصا کے ساتھ ٹیک لگاتے تھے ، وہ سب سے زیادہ خوبصورت تھے ۔ ان کے جسم پر دو زرد لباس تھے ، ایک تہبند تھا اور ایک چادر تھی ، وہ منبر کے پاس آئے اور اس پر تشریف فرما ہوئے ۔
یہ روایت امام طبرانی نے اپنے استاد مقدام بن داؤد کے حوالے سے نقل کی ہے ، اور وہ ضعیف ہے ۔

عبداللہ بن عوف قاری بیان کرتے ہیں : میں نے سیدنا عثمان غنی رضی اللہ عنہ کو دیکھا ہے ان کی داڑھی سفید تھی ۔
یہ روایت امام طبرانی نے نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

ابن ابوذئب نے عبدالرحمن بن سعد کا یہ قول نقل کیا ہے ، میں نے سیدنا عثمان غنی رضی اللہ عنہ کو دیکھا ان کی داڑھی زرد تھی ۔
یہ روایت امام طبرانی نے مقدام بن داؤد کے حوالے سے نقل کی ہے ، اور وہ ضعیف ہے ۔

ام موسیٰ بیان کرتی ہیں : سیدنا عثمان غنی رضی اللہ عنہ سب سے زیادہ خوبصورت تھے ۔
یہ روایت عبداللہ نے نقل کی ہے ، اور اس کے رجال ” صحیح “ کے رجال ہیں ، صرف اُم موسیٰ کا معاملہ مختلف ہے ، اور وہ ثقہ ہیں ۔

حسن بن ابوالحسن بیان کرتے ہیں : میں مسجد میں داخل ہوا تو میرے سامنے سیدنا عثمان رضی اللہ عنہ آئے ، جو اپنی چادر کے ساتھ ٹیک لگائے ہوئے تھے ۔ ان کے پاس دو پانی بھرنے والے افراد آئے ، ان دونوں نے اپنا مقدمہ سیدنا عثمان رضی اللہ عنہ کے سامنے پیش کیا ، سیدنا عثمان رضی اللہ عنہ نے ان دونوں کے درمیان فیصلہ دیا ، پھر میں سیدنا عثمان رضی اللہ عنہ کے پاس آیا ، میں نے ان کا بغور جائزہ لیا تو وہ ایک خوبصورت چہرے کے مالک شخص تھے ۔ ان کے چہرے پر جدری کے کچھ داغ تھے اور ان کے بالوں نے ان کی کلائیوں کو بھرا ہوا تھا ۔
یہ روایت عبداللہ نے نقل کی ہے ۔ اس کی سند میں ایک راوی ابومقدام بن ہشام ہے ، اور وہ متروک ہے ۔