مجمع الزوائد ومنبع الفوائد

ابن شہاب بیان کرتے ہیں : سیدنا عمر بن عبدالعزیز نے ابوبکر بن سلیمان بن ابوحثمہ سے دریافت کیا : سب سے پہلے کس نے یہ تحریر لکھوائی تھی کہ یہ اللہ کے بندے امیر المؤمنین کی طرف سے ہے ، تو ابوبکر بن سلیمان نے جواب دیا : شفاء بنت عبداللہ جو ابتداء میں ہجرت کرنے والی خواتین میں سے ایک ہیں ، انہوں نے مجھے یہ بات بتائی ہے کہ لبید بن ربیعہ اور عدی بن حاتم ، یہ دونوں مدینہ منورہ آئے ، یہ دونوں مسجد میں آئے ، ان دونوں نے سیدنا عمرو بن العاص رضی اللہ عنہ کو وہاں پایا ، تو ان دونوں نے یہ کہا: اے سیدنا ابن العاص ! آپ امیر المؤمنین سے ہمارے لئے اندر آنے کی اجازت لے لیں ، تو سیدنا عمرو رضی اللہ عنہ نے کہا: اللہ کی قسم ! تم دونوں نے ان دونوں کا بالکل ٹھیک نام لیا ہے ، وہ امیر ہیں اور ہم مومنین ہیں ۔ اس کے بعد سیدنا عمرو رضی اللہ عنہ سیدنا عمر رضی اللہ عنہ کے پاس آئے اور بولے : اے امیر المؤمنین آپ پر سلام ہو ، سیدنا عمر رضی اللہ عنہ نے دریافت کیا : یہ کیا نام ہوا ؟ انہوں نے کہا: آپ امیر ہیں ، اور ہم مومنین ہیں ، تو اس دن سے تحریر میں یہ نام جاری ہوا ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔