مجمع الزوائد ومنبع الفوائد

سیدنا معاذ بن جبل رضی اللہ عنہ بیان کرتے ہیں : جب نبی اکرم صلی اللہ علیہ وسلم نے انہیں یمن کی طرف بھیجا ، تو نبی اکرم صلی اللہ علیہ وسلم بھی ان کے ساتھ نکلے ، آپ انہیں تلقین کر رہے تھے ، سیدنا معاذ رضی اللہ عنہ سوار تھے اور نبی اکرم صلی اللہ علیہ وسلم ان کی سواری کے ساتھ پیدل چل رہے تھے ، جب آپ گفتگو کر کے فارغ ہوئے ، تو آپ نے فرمایا : اے معاذ ! ہو سکتا ہے اس سال کے بعد ہماری ملاقات نہ ہو ، ہو سکتا ہے کہ تمہارا گزر میری اس مسجد سے اور میری قبر کے پاس سے ہو ، تو سیدنا معاذ رضی اللہ عنہ نبی اکرم صلی اللہ علیہ وسلم کی جدائی کی پریشانی کی وجہ سے رو پڑے ، پھر نبی اکرم صلی اللہ علیہ وسلم نے رخ پھیرا ، آپ نے مدینہ منورہ کی طرف رخ کیا اور ارشاد فرمایا : ” میرے سب سے زیادہ قریب لوگ پرہیزگار ہوں گے ، خواہ وہ جو بھی ہوں ، اور جہاں بھی ہوں ۔ “
یہ روایت امام أحمد نے دو اسناد کے ساتھ نقل کی ہے ، انہوں نے ایک سند میں یہ کہا: ہے : عاصم بن حمید کے حوالے سے یہ بات منقول ہے ، سیدنا معاذ رضی اللہ عنہ نے یہ بات روایت کی ہے ، اور اس روایت میں انہوں نے یہ الفاظ نقل کیے ہیں : ” اے معاذ ! تم نہ روؤ ! کیونکہ رونا ، شیطان کی طرف سے ہوتا ہے ۔ “ ( یہاں ایک لفظ کے بارے میں راوی کو شک ہے ) ۔ دونوں اسناد کے رجال ” صحیح “ کے رجال ہیں ، صرف راشد بن سعد اور عاصم بن حمید کا معاملہ مختلف ہے ، اور یہ دونوں ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : ایک رات جب جنات کے وفد نے حاضر ہونا تھا ، میں نبی اکرم صلی اللہ علیہ وسلم کے ساتھ تھا جب آپ واپس تشریف لائے ، تو آپ گہرے سانس لے رہے تھے ، میں نے عرض کی : آپ کا کیا معاملہ ہے ؟ آپ نے فرمایا : اے ابن مسعود ! مجھے میری وفات کی اطلاع دی گئی ہے ۔
یہ روایت امام أحمد نے نقل کی ہے ، اس کی سند میں ایک راوی میناء بن ابومیناء ہے ، جسے ابن حبان نے ثقہ قرار دیا ہے ، اور جمہور نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : جب یہ سورت نازل ہوئی : ” جب اللہ کی مدد اور فتح آ گئی ۔ ۔ ۔ ۔ ۔ ۔ ۔ “ ۔ تو نبی اکرم صلی اللہ علیہ وسلم نے ارشاد فرمایا : مجھے میرے انتقال کی اطلاع دے دی گئی ہے ۔ راوی کہتے ہیں : یعنی اس بات کی اطلاع کہ اسی سال آپ کا انتقال ہو جائے گا ۔
یہ روایت امام أحمد نے نقل کی ہے اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا عبداللہ بن عباس رضی اللہ عنہما بیان کرتے ہیں : جب یہ سورت نازل ہوئی ( ارشاد باری تعالیٰ ہے : ) ” جب اللہ کی مدد اور فتح آ گئی ۔ ۔ ۔ ۔ ۔ ۔ ۔ “ انہوں نے اسے پورا پڑھا ۔ سیدنا عبداللہ بن عباس رضی اللہ عنہما فرماتے ہیں : تو نبی اکرم صلی اللہ علیہ وسلم کو آپ کے وصال کی اطلاع دی گئی تھی ، جب یہ سورت نازل ہوئی تو نبی اکرم صلی اللہ علیہ وسلم آخرت کے معاملے کے حوالے سے بہت زیادہ عبادت کرنے لگے ، نبی اکرم صلی اللہ علیہ وسلم نے اس کے بعد یہ ارشاد فرمایا : فتح آ گئی ہے ، اور اللہ کی مدد آ گئی ہے ، اور اہل یمن آ گئے ہیں ، ایک شخص نے عرض کی : یا رسول اللہ ! اہل یمن کیسے ہیں ؟ نبی اکرم صلی اللہ علیہ وسلم نے فرمایا : ” وہ ایسے لوگ ہیں کہ جن کے دل نرم ہیں اور مہربان ہیں ، اور ایمان اور سمجھ بوجھ یمانی ہے ۔ “
یہ روایت امام طبرانی نے معجم کبیر میں نقل کی ہے ، اور معجم اوسط میں مختلف اسانید کے ساتھ نقل کی ہے ، اور یہ الفاظ زائد نقل کیے ہیں : ” دانائی یمنی ہے ۔ “ ان کی اسانید میں سے ایک کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما فرماتے ہیں : جب یہ سورت نازل ہوئی ( ارشاد باری تعالیٰ ہے : ) ” جب اللہ کی مدد اور فتح آ گئی ۔ ۔ ۔ ۔ ۔ ۔ ۔ “ ۔ تو نبی اکرم صلی اللہ علیہ وسلم نے سیدہ فاطمہ رضی اللہ عنہا کو بلایا اور فرمایا : مجھے میرے وصال کی اطلاع دے دی گئی ہے ۔ سیدہ فاطمہ رضی اللہ عنہا رونے لگیں ، تو نبی اکرم صلی اللہ علیہ وسلم نے ان سے فرمایا : تم نہ روؤ ! کیونکہ میرے اہل خانہ میں سے سب سے پہلے تم مجھ سے آ کے ملو گی ، تو وہ ہنسنے لگیں ، نبی اکرم صلی اللہ علیہ وسلم کی ایک زوجہ محترمہ نے دیکھا ، تو کہا: میں نے آپ کو دیکھا کہ آپ پہلے روئیں اور پھر ہنسنے لگیں ؟ تو سیدہ فاطمہ رضی اللہ عنہا نے کہا: نبی اکرم صلی اللہ علیہ وسلم نے مجھے یہ بتایا ہے کہ مجھے میرے وصال کی اطلاع دی گئی ہے ، تو میں رونے لگی ، تو نبی اکرم صلی اللہ علیہ وسلم نے فرمایا : تم نہ روؤ ! کیونکہ میرے اہل خانہ میں سب سے پہلے تم مجھ سے ملو گی ، تو میں ہنس پڑی ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ” صحیح “ کے رجال ہیں ، صرف ہلال بن خباب کا معاملہ مختلف ہے ، اور وہ ثقہ ہے ، اور اس میں ضعف پایا جاتا ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم وصال سے پہلے بکثرت یہ پڑھا کرتے تھے : ” تو ہر عیب سے پاک ہے ، اے اللہ ! اور حمد تیرے لئے مخصوص ہے ، میں تجھ سے مغفرت طلب کرتا ہوں ، اور تیری بارگاہ میں توبہ کرتا ہوں ۔ “ میں نے عرض کی : یا رسول اللہ ! میں نے آپ کو دیکھا ہے ، آپ بکثرت یہ پڑھتے ہیں : ” تو ہر عیب سے پاک ہے ، اے اللہ ! اور حمد تیرے لئے مخصوص ہے ، اور میں تجھ سے مغفرت طلب کرتا ہوں اور تیری بارگاہ میں توبہ کرتا ہوں ۔ “ تو نبی اکرم صلی اللہ علیہ وسلم نے فرمایا : مجھے اس کا حکم دیا گیا ہے ، پھر آپ نے یہ سورت پڑھی ( ارشاد باری تعالیٰ ہے : ) ” جب اللہ کی مدد اور فتح آ گئی ۔ ۔ ۔ ۔ ۔ ۔ ۔ ۔ “ ۔
یہ روایت امام طبرانی نے معجم صغیر میں نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ روایت کرتے ہیں : فتح مکہ کے دن نبی اکرم صلی اللہ علیہ وسلم نے ارشاد فرمایا : ” یہ وہ چیز ہے جس کا میرے پروردگار نے مجھ سے وعدہ کیا تھا ، پھر آپ صلی اللہ علیہ وسلم نے یہ سورت پڑھی : ” جب اللہ کی مدد اور فتح آ گئی ۔ ۔ ۔ ۔ ۔ ۔ ۔ “ ۔ نبی اکرم صلی اللہ علیہ وسلم نے فرمایا : جب لوگ اللہ کے دین میں گروہوں کی شکل میں داخل ہو گئے اور اللہ کا دین باقی تمام ادیان پر غالب آ گیا ، تو اب لوگ بھی بہتر ہیں اور ہم بھی بہتر ہیں ۔ “
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدہ عائشہ صدیقہ رضی اللہ عنہا فرماتی ہیں : نبی اکرم صلی اللہ علیہ وسلم کا جس بیماری کے دوران وصال ہوا ، اس بیماری کے دوران نبی اکرم صلی اللہ علیہ وسلم نے سیدہ فاطمہ رضی اللہ عنہا سے فرمایا : اے میری بیٹی ! میرے پاس آ جاؤ ، وہ نبی اکرم صلی اللہ علیہ وسلم کے قریب ہو گئیں ، نبی اکرم صلی اللہ علیہ وسلم نے کچھ دیر سرگوشی میں ان کے ساتھ کوئی بات چیت کی ، جب وہ پیچھے ہٹیں تو وہ رو رہی تھیں ، سیدہ عائشہ رضی اللہ عنہا وہاں موجود تھیں ، پھر اس کے کچھ دیر بعد نبی اکرم صلی اللہ علیہ وسلم نے ان سے فرمایا : میری بیٹی میرے پاس آ جاؤ ! وہ نبی اکرم صلی اللہ علیہ وسلم پر جھک گئیں ، نبی اکرم صلی اللہ علیہ وسلم نے سرگوشی میں ان سے کوئی بات کی ، پھر وہ پیچھے ہٹیں ، تو وہ ہنس رہی تھیں ، سیدہ عائشہ رضی اللہ عنہا کہتی ہیں : میں نے کہا: اے میری بیٹی ! تم مجھے بتاؤ کہ تمہارے والد نے تمہارے ساتھ سرگوشی میں کیا بات چیت کی ہے ؟ تو سیدہ فاطمہ رضی اللہ عنہا نے کہا: انہوں نے میرے ساتھ ایک راز کی بات کی ہے ، تو کیا آپ یہ سمجھتی ہیں کہ میں ان کی زندگی میں ان کے راز کے بارے میں بتا دوں گی ؟ یہ بات سیدہ عائشہ رضی اللہ عنہا کو گراں گزری کہ نبی اکرم صلی اللہ علیہ وسلم نے ان کی بجائے کسی اور کے ساتھ راز کی بات کی ہے ، جب نبی اکرم صلی اللہ علیہ وسلم کا وصال ہو گیا ، تو سیدہ عائشہ رضی اللہ عنہا نے سیدہ فاطمہ رضی اللہ عنہا سے کہا: اے میری بیٹی ! کیا تم مجھے اس کے بارے میں نہیں بتاؤ گی ؟ تو انہوں نے کہا: جی ہاں اب ٹھیک ہے ، نبی اکرم صلی اللہ علیہ وسلم نے پہلی مرتبہ مجھے سرگوشی میں یہ بتایا کہ جبرائیل ہر سال ایک مرتبہ آپ کے ساتھ قرآن کا دور کرتے تھے ، اس سال انہوں نے دو مرتبہ میرے ساتھ دور کیا ہے ، تو نبی اکرم صلی اللہ علیہ وسلم نے مجھے یہ بتایا کہ جبرائیل نے انہیں یہ بتایا تھا کہ جو بھی نبی زندہ رہتا ہے ، وہ اپنے سے پہلے نبی کی نصف عمر تک رہتا ہے ، اور انہوں نے مجھے یہ بھی بتایا تھا کہ سیدنا عیسیٰ بن مریم علیہ السلام ایک سو بیس سال تک زندہ رہے تھے ، تو اپنے بارے میں میرا یہ خیال ہے کہ ساٹھ سال کی عمر میں میرا انتقال ہو جائے گا ( سیدہ فاطمہ رضی اللہ عنہا کہتی ہیں : ) تو اس بات پر مجھے رونا آ گیا ، نبی اکرم صلی اللہ علیہ وسلم نے فرمایا : اے میری بیٹی ! مسلمانوں کی خواتین میں کوئی خاتون ایسی نہیں ہے کہ جس کو تم سے زیادہ بڑی مصیبت کا سامنا کرنا ہو ، تو تم صبر کرنے کے حوالے سے کسی عورت سے کم نہ ہونا ۔ ( علامہ ہیثمی فرماتے ہیں : ) میں یہ کہتا ہوں ۔ اس کے بعد انہوں نے پوری حدیث ذکر کی ہے ۔
یہ روایت امام طبرانی نے ضعیف سند کے ساتھ نقل کی ہے ، امام بزار نے بھی اس کا کچھ حصہ نقل کیا ہے ، اور اس کے رجال میں ضعف پایا جاتا ہے ۔