مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری صفت یہ ہے کہ میں أحمد ہوں اور توکل کرنے والا ہوں ، نہ ہی بدمزاج ہوں اور نہ ہی سخت مزاج ہوں ، میں وہ ہوں ، جو بھلائی کا بدلہ بھلائی سے دیتا ہے ، اور برائی کا بدلہ نہیں دیتا ، جس کی پیدائش مکہ میں ہوئی اور جس کی ہجرت کا مقام مدینہ منورہ ہے ، اس کی امت کے لوگ حمد بیان کرنے والے ہوں گے ، جو نصف پنڈلیوں تک تہبند رکھیں گے ، اور اپنے اعضاء پر وضو کریں گے ، ان کے سینوں میں ، میں اُن کی روشنی ہوؤں گا ، وہ نماز کے لئے یوں صف بنائیں گے ، جس طرح وہ جنگ کے لئے صف بناتے ہیں ، ان کی وہ بات جس کے ذریعے وہ میرا قرب حاصل کریں گے ، وہ اُن کی جانیں ہیں ، وہ رات کے وقت عبادت گزار ہوں گے اور دن کے وقت شیر ( یعنی لڑاکے ) ہوں گے ۔ “
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

یزید فارسی بیان کرتے ہیں : سیدنا عبداللہ بن عباس رضی اللہ عنہما کے زمانے میں ، میں نے نبی اکرم صلی اللہ علیہ وسلم کو خواب میں دیکھا راوی کہتے ہیں : وہ قرآن مجید لکھا کرتے تھے ، وہ کہتے ہیں : میں نے سیدنا عبداللہ بن عباس رضی اللہ عنہما سے کہا: میں نے نبی اکرم صلی اللہ علیہ وسلم کو خواب میں دیکھا تو سیدنا عبداللہ بن عباس رضی اللہ عنہما نے کہا: نبی اکرم صلی اللہ علیہ وسلم نے یہ ارشاد فرمایا ہے : ” بے شک شیطان اس بات کی استطاعت نہیں رکھتا کہ وہ میری شکل و صورت اختیار کر سکے ، تو جس نے مجھے خواب میں دیکھا ، اُس نے مجھے ہی دیکھا “ ۔ ( پھر سیدنا عبداللہ بن عباس رضی اللہ عنہما نے فرمایا : ) کیا تم یہ استطاعت رکھتے ہو کہ تم ان صاحب کا حلیہ ہمارے سامنے بیان کرو جنہیں تم نے خواب میں دیکھا ہے ؟ انہوں نے جواب دیا : جی ہاں ! میں نے ایک ایسے صاحب کو دیکھا ہے ، جو درمیانہ قد کے مالک تھے ، اور ان کا گوشت گندمی تھا ، لیکن سفیدی کی طرف مائل تھا اور وہ خوبصورت شکل و صورت کے مالک تھے ، ان کی آنکھوں میں یوں لگتا تھا ، جیسے سرمہ ڈالا گیا ہو ، ان کا چہرہ خوبصورت تھا اور اُن کی داڑھی نے یہاں سے لے کر یہاں تک کے حصے کو بھرا ہوا تھا ، یوں جیسے پورا سینہ بھرا ہوا ہو ، عوف کہتے ہیں : مجھے نہیں معلوم کہ اس کے علاوہ انہوں نے اور کیا حلیہ بیان کیا تھا ؟ راوی کہتے ہیں : تو سیدنا عبداللہ بن عباس رضی اللہ عنہما نے فرمایا : اگر تم نے نبی اکرم صلی اللہ علیہ وسلم کو بیداری کے عالم میں دیکھا ہوتا تو تم اس سے زیادہ آپ صلی اللہ علیہ وسلم کا حلیہ بیان نہیں کر سکتے تھے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

یوسف بن مازن بیان کرتے ہیں : ایک شخص نے سیدنا علی رضی اللہ عنہ سے سوال کیا : اے امیر المؤمنین ! آپ ہمارے سامنے اللہ کے رسول صلی اللہ علیہ وسلم کا حلیہ بیان کیجئے ، تو سیدنا علی رضی اللہ عنہ نے فرمایا : ” نبی اکرم صلی اللہ علیہ وسلم بہت زیادہ لمبے تڑنگے نہیں تھے ، آپ درمیانہ قد سے ذرا بڑے تھے ، جب لوگوں کے ساتھ آتے تھے ، تو ان سے نمایاں محسوس ہوتے تھے ، سفید رنگ کے مالک تھے ، چمکدار رنگ کے مالک تھے ، آپ کا سر بڑا تھا ، آپ کی رنگت روشن اور چمکدار تھی ، پلکیں لمبی تھیں ، آپ کی ہتھیلیاں اور پاؤں پُر گوشت تھے ، جب آپ چلتے تھے تو پاؤں جما کر رکھتے تھے اور تیزی سے چلتے تھے ، یوں جیسے بلندی سے نیچے کی طرف آ رہے ہوں اور آپ کے چہرے پر پسینہ یوں محسوس ہوتا تھا ، جیسے موتی ہوں ، میں نے آپ سے پہلے اور آپ کے بعد آپ جیسا کوئی شخص نہیں دیکھا ، میرے ماں باپ آپ صلی اللہ علیہ وسلم پر قربان ہوں ۔ “ ( علامہ ہیثمی فرماتے ہیں : ) میں یہ کہتا ہوں : ان کی نقل کردہ حدیث امام ترمذی نے نقل کی ہے ، جو ایک طویل حدیث ہے ، لیکن اس روایت میں کچھ اضافہ ہے ۔
یہ روایت عبداللہ نے دو اسناد کے ساتھ نقل کی ہے ، ان میں سے ایک سند میں ایک راوی ایسا ہے ، جس کا نام بیان نہیں کیا گیا ، اور دوسری سند یوسف بن مازن کی سیدنا علی رضی اللہ عنہ سے نقل کردہ ہے ، جبکہ میرا یہ خیال ہے کہ یوسف بن مازن نے سیدنا علی رضی اللہ عنہ کا زمانہ نہیں پایا ہے ۔

یہ روایت امام بزار نے اختصار کے ساتھ نقل کی ہے ، اور یہ الفاظ زائد نقل کیے ہیں : ” آپ صلی اللہ علیہ وسلم کے بال خوبصورت تھے اور بالکل سیدھے تھے ۔ “

ان کی نقل کردہ ایک روایت میں یہ الفاظ ہیں : ” آپ صلی اللہ علیہ وسلم کی آنکھیں بڑی بڑی تھیں ۔ “

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم گندمی رنگت کے مالک تھے ۔
یہ روایت امام أحمد ، امام ابویعلیٰ ، امام بزار نے نقل کی ہے ، امام ابویعلیٰ کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : میں نے یہ شعر مثال کے طور پر پڑھا ، اس وقت سیدنا ابوبکر رضی اللہ عنہ خاموشی سے سن رہے تھے : ” وہ گورے رنگ کے مالک فرد ، جن کے چہرے کے وسیلے سے بارش کی دعا کی جاتی ہے ، وہ یتیموں کے رکھوالے ہیں اور بیواؤں کی دیکھ بھال کرنے والے ہیں ۔ “ تو سیدنا ابوبکر رضی اللہ عنہ نے فرمایا : ایسے تو اللہ کے رسول ہیں ۔
یہ روایت امام أحمد نے نقل کی ہے ، اور امام بزار نے نقل کی ہے ، اور اس کے رجال ثقہ ہیں ۔

بلعدویہ سے تعلق رکھنے والے ایک صاحب بیان کرتے ہیں : میرے دادا نے مجھے یہ بات بتائی ہے : ” میں مدینہ منورہ گیا ، میں نے وہاں ایک جگہ پڑاؤ کیا ، وہاں دو آدمی موجود تھے ، جن کے درمیان ایک بکری کا بچہ تھا اور خریدار شخص ، فروخت کرنے والے سے کہہ رہا تھا : تم میرے ساتھ اچھے طریقے سے سودا کرنا ، راوی کہتے ہیں : میں نے سوچا یہ وہی ہاشمی شخص ہے ، جس نے لوگوں کو گمراہ کیا ہوا ہے ، کیا یہ وہی ہے ؟ جب میں نے بغور جائزہ لیا ، تو وہ ایک ایسے شخص تھے ، جن کا جسم خوبصورت تھا ، پیشانی بڑی تھی ، ناک پتلی تھی ، بھنویں پتلی تھیں ، ان کے سینے سے لے کر ناف تک سیاہ بالوں کی ایک لکیر سی تھی ، ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔ “
یہ روایت امام ابویعلیٰ نے نقل کی ہے ، اور بلعدویہ سے تعلق رکھنے والے شخص سے میں واقف نہیں ہوں ، اس روایت کے بقیہ رجال کی توثیق کی گئی ہے ۔

سیدنا حسن بن علی رضی اللہ عنہما بیان کرتے ہیں : میں نے اپنے ماموں ہند بن ابوہالہ تمیمی سے ، جو حلیہ بیان کرنے میں ماہر تھے ، نبی اکرم صلی اللہ علیہ وسلم کے حلیہ مبارک کے بارے میں دریافت کیا ، میری یہ خواہش تھی کہ وہ اس میں سے کوئی ایسی بات میرے سامنے بیان کریں ، جسے میں یاد رکھوں ، تو انہوں نے بتایا : نبی اکرم صلی اللہ علیہ وسلم بارعب اور باوقار تھے ، آپ کا چہرہ مبارک چودھویں رات کے چاند کی طرح چمکتا تھا ، آپ درمیانے قد والے شخص سے کچھ لمبے اور بہت لمبے شخص سے کچھ چھوٹے تھے ، آپ کا سر مبارک بڑا تھا ، بال ہلکے خمدار تھے ، اگر بالوں میں خود بخود مانگ نکل آتی تو آپ مانگ نکال لیتے ، ورنہ جب آپ بال بڑھاتے تو وہ کانوں کی لو سے آگے نہیں بڑھتے تھے ، آپ کا رنگ چمکدار تھا ، پیشانی کشادہ تھی ، بھنویں خمدار ، لمبی اور گھنی تھیں ، جو آپس میں ملی ہوئی نہیں تھیں ، ان کے درمیان ایک رگ تھی ، جسے غصہ ابھار دیتا تھا ، ناک مبارک بلند اور پتلی تھی ، اس پر ایک نور چھایا رہتا تھا ، جو شخص غور سے نہ دیکھتا ، وہ اسے اونچی ناک سمجھتا ، داڑھی گھنی تھی ، رخسار ہموار تھے ، دہن مبارک کشادہ تھا ، دانت باریک اور چمکدار تھے ، سامنے کے دانتوں کے درمیان فاصلہ تھا ، سینے سے ناف تک بالوں کی ایک باریک لکیر تھی ، گردن مبارک یوں تھی ، جیسے کسی مورتی کی گردن ہو ، جو چاندی کی طرح صاف ہو ، آپ کا جسم متناسب ، بھرا ہوا اور گٹھا ہوا تھا ، پیٹ اور سینہ برابر تھے ، سینہ چوڑا تھا ، دونوں کندھوں کے درمیان فاصلہ زیادہ تھا ، جوڑوں کی ہڈیاں بڑی تھیں ، جسم کا جو حصہ کپڑے سے باہر ہوتا ، وہ روشن ہوتا ، سینے کے بالائی حصے سے ناف تک بالوں کی ایک لکیر تھی ، جو خط کی طرح چلی گئی تھی ، اس کے علاوہ دونوں چھاتیاں اور پیٹ بالوں سے خالی تھے ، کلائیوں ، کندھوں اور سینے کے بالائی حصے پر بال تھے ، کلائیوں کی ہڈیاں لمبی تھیں ، ہتھیلیاں کشادہ تھیں ، ہاتھ پاؤں کی ہڈیاں سیدھی تھیں ، ہتھیلیاں اور پاؤں پر گوشت تھے ، انگلیاں لمبی تھیں ، تلوے درمیان سے گہرے تھے ، پاؤں ہموار تھے ، جن پر سے پانی ڈھلک جاتا تھا ، جب آپ چلتے تو قوت کے ساتھ قدم اٹھاتے ، آگے کی طرف ذرا جھک کر قدم رکھتے ، وقار کے ساتھ چلتے ، لمبے قدم اٹھاتے ، جب چلتے تو یوں لگتا جیسے کسی ڈھلوان سے اتر رہے ہوں ، جب کسی طرف متوجہ ہوتے تو پورے جسم کے ساتھ متوجہ ہوتے ، نگاہ نیچی رکھتے ، آپ کا زمین کی طرف دیکھنا آسمان کی طرف دیکھنے سے زیادہ ہوتا ، زیادہ تر گوشہ چشم سے دیکھتے ، اپنے اصحاب کو آگے رکھ کر خود پیچھے چلتے ، اور جس سے ملتے ، اسے پہلے سلام کرتے ۔
میں نے کہا: آپ میرے سامنے نبی اکرم صلی اللہ علیہ وسلم کی گفتگو کا حال بیان کریں ، انہوں نے بتایا : نبی اکرم صلی اللہ علیہ وسلم مسلسل غمگین رہتے تھے ، ہمیشہ غور و فکر میں رہتے تھے ، آپ کو آرام نہیں ملتا تھا ، بلا ضرورت کلام نہیں کرتے تھے ، دیر تک خاموش رہتے تھے ، کلام کا آغاز اور اختتام پورے منہ سے کرتے تھے ، جامع کلمات کے ساتھ گفتگو کرتے تھے ، آپ کی گفتگو دو ٹوک ہوتی تھی ، نہ اس میں زیادتی ہوتی ، نہ کمی ، آپ نرم مزاج تھے ، نہ سخت تھے اور نہ ہی کسی کی تحقیر کرتے تھے ، نعمت کو بڑا سمجھتے تھے ، اگرچہ وہ معمولی ہو ، اس میں سے کسی چیز کی مذمت نہیں کرتے تھے ، نہ کسی کھانے کی برائی کرتے اور نہ ہی اس کی تعریف کرتے ، دنیا اور دنیا سے متعلق کوئی چیز آپ کو غصہ نہیں دلاتی تھی ، لیکن جب حق کی مخالفت کی جاتی ، تو کوئی آپ کو پہچان نہیں سکتا تھا ، اور آپ کے غصے کے سامنے کوئی چیز نہیں ٹھہر سکتی تھی ، یہاں تک کہ آپ حق کا بدلہ لے لیتے ، اپنی ذات کے لئے غصے میں نہیں آتے تھے ، اور نہ ہی اپنی ذات کے لئے بدلہ لیتے تھے ، جب اشارہ کرتے تو پوری ہتھیلی سے اشارہ کرتے ، جب تعجب کرتے تو ہتھیلی کو پلٹ دیتے ، جب بات کرتے تو ہاتھ کو بھی ساتھ ملاتے ، اور دائیں ہتھیلی کے اندرونی حصے کو بائیں انگوٹھے کے اندرونی حصے پر مارتے ، جب غصے میں آتے تو منہ پھیر لیتے اور رخ موڑ لیتے ، جب ہنستے تو نگاہ نیچی کر لیتے ، آپ کا زیادہ تر ہنسنا مسکرانا ہوتا تھا ، اور جب مسکراتے تو دانت اولوں کی طرح چمکتے ۔
( سیدنا حسن رضی اللہ عنہ بیان کرتے ہیں : ) میں نے یہ بات کچھ عرصہ تک سیدنا حسین رضی اللہ عنہ سے چھپائے رکھی ، پھر میں نے انہیں بتائی ، تو میں نے دیکھا کہ وہ مجھ سے پہلے ہی یہ معلوم کر چکے تھے ، انہوں نے ان سے وہی کچھ پوچھا تھا ، جو میں نے پوچھا تھا ، اور میں نے دیکھا کہ انہوں نے اپنے والد ( سیدنا علی رضی اللہ عنہ ) سے نبی اکرم صلی اللہ علیہ وسلم کے گھر میں داخل ہونے ، آپ کی مجلس ، آپ کے باہر تشریف لے جانے اور آپ کے طور طریقے کے بارے میں دریافت کیا تھا ، اور اس میں سے کوئی چیز نہیں چھوڑی تھی ۔ سیدنا حسین رضی اللہ عنہ بیان کرتے ہیں : میں نے اپنے والد سے نبی اکرم صلی اللہ علیہ وسلم کے گھر تشریف لے جانے کے بارے میں دریافت کیا ، تو انہوں نے بتایا : آپ کا گھر جانا اپنی ذات کے لئے ہوتا تھا ، آپ کو اس کی اجازت تھی ، جب آپ اپنے گھر تشریف لے جاتے تو اپنے وقت کو تین حصوں میں تقسیم کر دیتے : ایک حصہ اللہ تعالیٰ کے لئے ، ایک حصہ اپنے گھر والوں کے لئے ، اور ایک حصہ اپنی ذات کے لئے ، پھر اپنے حصے کو اپنے اور لوگوں کے درمیان تقسیم کر دیتے ، اور خاص لوگوں کے ذریعے اس کا فائدہ عام لوگوں تک پہنچاتے ، اور ان سے کوئی چیز بچا کر نہیں رکھتے تھے ، امت کے حصے میں آپ کا طریقہ یہ تھا کہ اہل فضیلت کو اپنی اجازت سے ترجیح دیتے ، اور دین میں ان کی فضیلت کے مطابق ان میں ( وقت ) تقسیم کرتے ، ان میں سے کوئی ایک ضرورت والا ہوتا ، کوئی دو ضرورتوں والا ، اور کوئی کئی ضرورتوں والا ، آپ ان کے ساتھ ان امور میں مشغول رہتے ، جن میں ان کی اصلاح ہو اور جو ان کے مناسب ہوں ، اور انہیں وہ بات بتاتے جو ان کے لئے مناسب ہوتی ، اور آپ فرماتے : ” جو یہاں موجود ہے ، وہ غیر موجود تک یہ بات پہنچا دے ، جو شخص اپنی ضرورت پیش نہیں کر سکتا ، اس کی ضرورت پوری کرنے میں کوشش کرو ، اور جو شخص اپنی ضرورت مجھ تک نہیں پہنچا سکتا ، اس کی ضرورت مجھ تک پہنچاؤ ، کیونکہ جو شخص کسی حکمران تک ایسے شخص کی ضرورت پہنچاتا ہے ، جو خود اسے نہیں پہنچا سکتا ، اللہ تعالیٰ قیامت کے دن اس کے دونوں قدموں کو ثابت رکھے گا ۔ “ آپ کے سامنے صرف اسی طرح کی باتوں کا ذکر ہوتا تھا ، اور آپ کسی سے اس کے علاوہ کوئی بات قبول نہیں کرتے تھے ، لوگ طالب بن کر آتے تھے ، اور کچھ حاصل کیے بغیر واپس نہیں جاتے تھے ، اور عاجزی کے ساتھ نکلتے تھے ۔
وہ بیان کرتے ہیں : میں نے ان سے آپ کے باہر تشریف لانے کے بارے میں دریافت کیا کہ آپ اس میں کیا طریقہ اختیار کرتے تھے ؟ تو انہوں نے بتایا : نبی اکرم صلی اللہ علیہ وسلم اپنی زبان کو روک کر رکھتے تھے ، صرف وہی بات کرتے جو لوگوں کے لئے مفید ہو ، آپ لوگوں کو جوڑتے تھے ، انہیں منتشر نہیں کرتے تھے ( یا یہ الفاظ ہیں : ) انہیں متنفر نہیں کرتے تھے ، ہر قوم کے معزز شخص کی عزت کرتے اور اسے ان کا نگران مقرر کرتے ، لوگوں سے محتاط رہتے اور ان سے بچاؤ اختیار کرتے ، لیکن کسی سے اپنا باطن اور اپنا اخلاق نہیں چھپاتے تھے ، اپنے اصحاب کی خبر گیری کرتے ، لوگوں سے لوگوں کے حالات کے بارے میں دریافت کرتے ، اچھی چیز کو اچھا قرار دیتے اور اسے تقویت دیتے ، بری چیز کو برا قرار دیتے اور اسے کمزور کرتے ، آپ کا معاملہ معتدل ہوتا تھا ، اس میں اختلاف نہیں ہوتا تھا ، آپ غفلت نہیں کرتے تھے ، اس اندیشے کے پیش نظر کہ کہیں لوگ غافل نہ ہو جائیں یا ( حق سے ) ہٹ نہ جائیں ، آپ کے پاس ہر حالت کے لئے تیاری ہوتی تھی ، آپ حق سے کوتاہی نہیں کرتے تھے ، اور نہ ہی اس سے تجاوز کرتے تھے ، لوگوں میں سے جو آپ کے قریب رہتے تھے ، وہ ان میں سب سے بہتر لوگ تھے ، آپ کے نزدیک ان میں سب سے زیادہ فضیلت والا وہ تھا ، جو سب سے زیادہ خیرخواہی کرنے والا ہو ، اور آپ کے نزدیک ان میں سب سے بڑے مرتبے والا وہ تھا ، جو سب سے زیادہ غمخواری اور مدد کرنے والا ہو ۔
میں نے ان سے آپ کی مجلس کے بارے میں دریافت کیا ، تو انہوں نے بتایا : نبی اکرم صلی اللہ علیہ وسلم اللہ کے ذکر کے ساتھ ہی بیٹھتے اور اٹھتے تھے ، آپ اپنے لئے کوئی جگہ مخصوص نہیں کرتے تھے ، اور جگہ مخصوص کرنے سے منع کرتے تھے ، جب آپ کسی محفل میں تشریف لے جاتے تو جہاں مجلس ختم ہو رہی ہوتی ، وہیں بیٹھ جاتے ، اور اسی بات کا حکم دیتے تھے ، اپنے پاس بیٹھنے والے ہر شخص کو اس کا حصہ دیتے تھے ، آپ کے پاس بیٹھنے والا کوئی شخص یہ نہیں سمجھتا تھا کہ کوئی دوسرا آپ کے نزدیک اس سے زیادہ معزز ہے ، جو شخص آپ کے پاس بیٹھتا یا کسی ضرورت کے سلسلے میں آپ کے ساتھ کھڑا ہوتا ، آپ اس کے ساتھ صبر سے کام لیتے ، یہاں تک کہ وہ خود ہی واپس چلا جاتا ، جو شخص آپ سے کوئی چیز مانگتا ، آپ اسے وہ چیز دے کر یا نرم بات کہہ کر ہی واپس بھیجتے ، آپ کی کشادہ دلی اور اخلاق تمام لوگوں کے لئے وسیع تھے ، آپ ان کے لئے باپ کی طرح ہو گئے تھے ، اور حق کے معاملے میں وہ سب آپ کے نزدیک برابر تھے ، آپ کی مجلس بردباری ، حیا ، صبر اور امانت کی مجلس ہوتی تھی ، اس میں آوازیں بلند نہیں کی جاتی تھیں ، اس میں خواتین کا برائی کے ساتھ ذکر نہیں ہوتا تھا ، اور اس کی لغزشوں کو پھیلایا نہیں جاتا تھا ، اس میں لوگ برابری کا برتاؤ کرتے ، ایک دوسرے کو تقویٰ کی تلقین کرتے ، عاجزی اختیار کرتے ، بڑوں کی عزت کرتے ، چھوٹوں پر رحم کرتے ، ضرورت مند کو ترجیح دیتے ، اور اجنبی کا خیال رکھتے تھے ۔
وہ بیان کرتے ہیں : میں نے دریافت کیا : اپنے پاس بیٹھنے والوں کے ساتھ آپ کا طرز عمل کیسا ہوتا تھا ؟ انہوں نے بتایا : نبی اکرم صلی اللہ علیہ وسلم ہمیشہ خوش رو رہتے تھے ، نرم اخلاق والے تھے ، نرم پہلو والے تھے ، نہ سخت مزاج تھے اور نہ ہی سخت دل ، نہ بازاروں میں شور مچانے والے تھے ، نہ فحش گو تھے ، نہ عیب جو تھے اور نہ ہی بہت زیادہ مذاق کرنے والے تھے ، جو بات آپ کو پسند نہ ہوتی ، اس سے چشم پوشی کر لیتے ، نہ آپ سے کوئی مایوس ہوتا اور نہ ہی آپ اس بارے میں کسی کو ناکام لوٹاتے ، آپ نے اپنی ذات کو تین چیزوں سے بچا کر رکھا تھا : جھگڑے سے ، تکبر سے ، اور لایعنی بات سے ، اور تین چیزوں کے حوالے سے لوگوں کو بچا رکھا تھا : آپ کسی کی مذمت نہیں کرتے تھے ، کسی کو عار نہیں دلاتے تھے ، اور کسی کے عیب کی تلاش میں نہیں رہتے تھے ، آپ صرف وہی بات کرتے تھے ، جس میں ثواب کی امید ہوتی ، جب آپ گفتگو کرتے تو آپ کے پاس بیٹھنے والے یوں سر جھکا لیتے ، جیسے ان کے سروں پر پرندے بیٹھے ہوں ، جب آپ خاموش ہوتے تو وہ بات کرتے ، آپ کے سامنے آپس میں جھگڑا نہیں کرتے تھے ، جو شخص بات کرتا ، سب اس کی بات خاموشی سے سنتے ، یہاں تک کہ وہ فارغ ہو جاتا ، آپ کے سامنے ان کی گفتگو ایسی ہوتی جیسے ان میں سے پہلے شخص کی گفتگو ہو ، جس بات پر وہ ہنستے آپ بھی ہنستے ، جس بات پر وہ تعجب کرتے آپ بھی تعجب کرتے ، اجنبی شخص کی گفتگو اور سوال میں سختی پر صبر کرتے ، یہاں تک کہ آپ کے اصحاب ایسے لوگوں کو آپ کے پاس لے آتے تھے ، اور آپ فرماتے تھے : ” جب تم کسی ضرورت مند کو دیکھو ، تو اس کی رہنمائی کرو ۔ “ آپ صرف اسی شخص سے تعریف قبول کرتے جو بدلے کے طور پر کر رہا ہو ، اور کسی کی بات کو درمیان میں نہیں کاٹتے تھے ، یہاں تک کہ وہ حد سے تجاوز کر جاتا ، تو آپ اسے منع کر کے یا اٹھ کر اس کی بات کاٹ دیتے ۔
وہ بیان کرتے ہیں : میں نے دریافت کیا : آپ کی خاموشی کیسی ہوتی تھی ؟ انہوں نے بتایا : نبی اکرم صلی اللہ علیہ وسلم کی خاموشی چار چیزوں پر مشتمل ہوتی تھی : بردباری ، احتیاط ، اندازہ اور غور و فکر ، جہاں تک اندازے کا تعلق ہے ، تو وہ لوگوں کے درمیان دیکھنے اور سننے میں برابری کرنا تھا ، اور جہاں تک آپ کے یاد کرنے ( یا یہ الفاظ ہیں : ) آپ کے غور و فکر کا تعلق ہے ، تو وہ باقی رہنے والی اور فنا ہو جانے والی چیزوں کے بارے میں ہوتا تھا ، آپ کے اندر بردباری کو صبر کے ساتھ جمع کر دیا گیا تھا ، کوئی چیز آپ کو پریشان نہیں کرتی تھی اور نہ ہی بھڑکاتی تھی ، اور آپ کے اندر احتیاط کو چار چیزوں میں جمع کر دیا گیا تھا : اچھی بات کو اختیار کرنا ، تاکہ لوگ آپ کی پیروی کریں ، بری بات کو ترک کرنا ، تاکہ لوگ اس سے باز رہیں ، اپنی امت کی اصلاح کے کاموں میں بھرپور غور و فکر کرنا ، اور ان کاموں کو سرانجام دینا جن میں لوگوں کے لئے دنیا اور آخرت کی بھلائی جمع ہو ۔
ابوعبید کہتے ہیں : ابوہالہ ، نبی اکرم صلی اللہ علیہ وسلم سے پہلے سیدہ خدیجہ رضی اللہ عنہا کے شوہر تھے ، ان کا نام نباش تھا ، اور وہ بنو اسید بن عمرو بن تمیم سے تعلق رکھتے تھے ۔
علی بن عبدالعزیز کہتے ہیں : زبیر بن بکار نے مجھے بتایا : عمر بن ابوبکر موصلی نے مجھے بتایا : ابوہالہ کا نام مالک بن زرارہ تھا ، جو بنو نباش بن زرارہ سے تعلق رکھتے تھے ۔
علی بن عبدالعزیز کہتے ہیں : میں نے ابوعبید کو یہ کہتے ہوئے سنا : ” فخم “ کا مطلب ہے : خوبصورتی اور ہیبت کے ساتھ شرافت اور جسم کا بھرا ہوا ہونا ، ” مربوع “ سے مراد وہ شخص ہے ، جو لمبے اور چھوٹے قد کے درمیان ہو ، ” مشذب “ سے مراد حد سے زیادہ لمبا شخص ہے ، اور ہر چیز کے لئے یہی مفہوم ہے ، جریر نے کہا ہے : ” اسے ایک لمبی رگوں والا ، بہت لمبا شخص لے گیا ، گویا وہ کسی بلند مینار پر بیٹھا ہو ۔ “ ” رجل الشعر “ سے مراد یہ ہے کہ بال بالکل سیدھے نہیں تھے ، جن میں کوئی خم نہ ہو ، اور ” قطط “ بہت زیادہ گھنگریالے بالوں کو کہتے ہیں ، مراد یہ ہے کہ آپ کے بالوں میں ان دونوں کے درمیان کا خم تھا ، ” عقیصہ “ سے مراد بٹے ہوئے بال ہیں ، جو گندھے ہوئے بالوں کی طرح ہوتے ہیں ، اسی سے سیدنا عمر رضی اللہ عنہ کا یہ قول ہے : جو شخص بال بٹ لے یا گوندھ لے ، اس پر سر منڈوانا لازم ہے ، ” ازج الحاجبین سوابغ “ : بھنوؤں میں ” زجج “ یہ ہے کہ ان میں خم ہو ، اور ان کے کنارے لمبے ہوں ، اور یہی ” سبوغ “ ہے ، جمیل بن معمر نے کہا ہے :
” جب حسین عورتیں کسی دن باہر نکلتی ہیں ، اور اپنی بھنوؤں اور آنکھوں کو سنوار لیتی ہیں ۔ “ ” فی غیر قرن “ : ” قرن “ کا مطلب ہے دونوں بھنوؤں کا آپس میں مل جانا ، آپ کی بھنویں ایسی نہیں تھیں ، بلکہ ان کے درمیان فاصلہ تھا ، جس شخص کی بھنویں ایسی ہوں ، اسے ” ابلج “ کہا جاتا ہے ، اصمعی نے یہ بات ذکر کی ہے کہ عرب اسے پسند کرتے ہیں ، ” بینہما عرق یدرہ الغضب “ کا مطلب یہ ہے کہ جب آپ غصے میں آتے تو بھنوؤں کے درمیان والی رگ ابھر آتی تھی ، اور اس کے ابھرنے سے مراد اس کا موٹا ہونا ، نمایاں ہونا اور بھر جانا ہے ، ” اقنی العرنین “ سے مراد ناک ہے ، اور ” قنا “ یہ ہے کہ ناک پتلی ہو ، اور اس کا بانسہ بلند ہو ، اسی سے کہا جاتا ہے : ” رجل اقن “ اور ” امراۃ قنواء “ ، اور ” اشم “ یہ ہے کہ ناک پتلی ہو ، اور اس میں ” قنا “ نہ ہو ، ” کث اللحیہ “ : ” کثوثہ “ یہ ہے کہ داڑھی نہ پتلی ہو اور نہ لمبی ، بلکہ اس میں گھنا پن ہو ، لیکن بہت بڑی اور لمبی نہ ہو ، ” ضلیع الفم “ : میرا خیال ہے ، اس سے مراد ہونٹوں کا باریک ہونا ہے ، ” اشنب “ : اس شخص کو کہتے ہیں ، جس کے دانتوں میں باریکی اور تیزی ہو ، اسی سے کہا جاتا ہے : ” رجل اشنب “ اور ” امراۃ شنباء “ ، اور اسی سے ذوالرمہ کا یہ شعر ہے :
” وہ سانولے ہونٹوں والی ہے ، اس کے ہونٹوں میں ہلکی سیاہی ہے ، اور اس کے مسوڑھوں اور کچلیوں میں چمک ہے ۔ “
” مفلج “ وہ شخص ہے ، جس کے دانتوں کے درمیان فاصلہ ہو ، ” مسربہ “ سے مراد وہ بال ہیں ، جو سینے کے بالائی حصے سے ناف تک ہوں ، یعنی خط کی طرح چلنے والے بال ، اعشیٰ نے کہا ہے :
” اب جبکہ میرے سینے کے بال سفید ہو گئے ہیں ، اور میں اپنی کچلی سے اپنے گھسے ہوئے دانت پر کاٹتا ہوں ۔ “
” جید دمنہ “ : ” جید “ گردن کو کہتے ہیں ، اور ” دمنہ “ تصویر کو کہتے ہیں ، ” ضخم الکرادیس “ : بعض حضرات کہتے ہیں : اس سے مراد ہڈیاں ہیں ، یعنی آپ کی ہڈیاں بڑی تھیں ، اور بعض حضرات ” کرادیس “ سے مراد ہڈیوں کے سرے لیتے ہیں ، اور اس کے علاوہ کسی اور مقام پر ” کرادیس “ لشکر کے دستوں کو کہتے ہیں ، ” زندان “ سے مراد کلائیوں کی وہ دو ہڈیاں ہیں ، جو ہتھیلیوں سے ملی ہوتی ہیں ، یعنی آپ کی کلائیاں لمبی تھیں ، ” سبط القصب “ : ” قصب “ ہر اس ہڈی کو کہتے ہیں ، جس میں گودا ہو ، جیسے پنڈلیاں ، بازو اور کلائیاں ، اور ان کے ” سبوط “ سے مراد ان کا لمبا ہونا ہے ، یعنی آپ کی ہڈیاں لمبی تھیں ، ذوالرمہ نے کہا ہے :
” وہ ” بری “ میں بھرے ہوئے خوبصورت بازو اور پنڈلیاں ڈالتی ہیں “ ، یہاں ” بری “ سے مراد کنگن اور پازیبیں ہیں ، ” شثن الکفین والقدمین “ : یعنی آپ کی ہتھیلیوں اور پاؤں میں کچھ موٹاپن تھا ، پاؤں کا ” اخمص “ پاؤں کے نچلے حصے میں ، اس کے اگلے حصے اور ایڑی کے درمیان ہوتا ہے ، اور یہ پاؤں کا وہ حصہ ہے ، جو چلتے وقت زمین سے نہیں لگتا ، اعشیٰ نے ایک عورت کے آہستہ چلنے کا وصف بیان کرتے ہوئے کہا ہے :
” گویا اس کے تلوے نے کانٹوں کی جوتی پہنی ہوئی ہے ۔ “ ” خمصان “ : یعنی آپ کے پاؤں کا یہ حصہ زمین سے اٹھا ہوا اور بلند تھا ، یہ لفظ پیٹ کے ” خموصہ “ سے لیا گیا ہے ، یعنی اس کا پتلا ہونا ، اسی سے کہا جاتا ہے : ” رجل خمصان “ اور ” امراۃ خمصانہ “ ، ” مسیح القدمین “ : یعنی آپ کے دونوں پاؤں ہموار تھے ، ان کی پشت پر کوئی شکن نہیں تھی ، اسی لئے یہ کہا: گیا ہے : ” ان پر سے پانی ڈھلک جاتا تھا “ یعنی ان پر پانی نہیں ٹھہرتا تھا ، ” اذا خطا تکفا “ : اس سے مراد آگے کی طرف جھکنا ہے ، یہ لفظ کشتیوں کے جھکنے سے لیا گیا ہے ، ” ذریع المشیہ “ : یعنی لمبے قدم اٹھانے والے ، ” کانما ینحط فی صبب “ : میرا خیال ہے ، اس سے مراد یہ ہے کہ آپ اپنے سامنے کی طرف متوجہ رہتے تھے ، نگاہ نیچی رکھتے تھے ، اسے آسمان کی طرف نہیں اٹھاتے تھے ، اور ڈھلوان سے اترنے والا شخص اسی طرح ہوتا ہے ، پھر انہوں نے خود اس کی وضاحت کر دی اور کہا: نگاہ نیچی رکھتے تھے ، آپ کا زمین کی طرف دیکھنا آسمان کی طرف دیکھنے سے زیادہ ہوتا تھا ، ” اذا التفت التفت جمیعا “ : یعنی آپ جسم کے بغیر صرف گردن نہیں موڑتے تھے ، کیونکہ اس میں ایک طرح کا ہلکا پن اور بے پروائی پائی جاتی ہے ، ” دمث “ : نرم اور سہل کو کہتے ہیں ، اسی لئے ریت کو ” دمث “ کہا جاتا ہے ، اور اسی سے آپ کی یہ حدیث ہے کہ آپ نے پیشاب کرنے کا ارادہ کیا ، تو نرم زمین کی طرف تشریف لے گئے ، ” اذا غضب اعرض واشاح “ : ” اشاحہ “ کا مطلب سنجیدگی ہے ، اور کبھی اس کا مطلب احتیاط بھی ہوتا ہے ، ” یفتر عن حب مثل حب الغمام “ : اس سے مراد اولے ہیں ، آپ کے دانتوں کی سفیدی کو اولوں سے تشبیہ دی گئی ہے ، جریر نے کہا ہے :
” مسواک ایسے چمکدار دانتوں پر چلتی ہے ، گویا وہ اولے ہیں ، جو بادلوں کی پشت سے اترے ہوں ۔ “
” یدخلون روادا “ : ” رواد “ طلب کرنے والوں کو کہتے ہیں ، اس کا واحد ” رائد “ ہے ، اسی سے یہ کہاوت ہے : ” رائد “ اپنے گھر والوں سے جھوٹ نہیں بولتا ، ” لکل حال عندہ عتاد “ : یعنی تیاری ، آپ نے اس کے لئے تیاری کی ہوئی تھی ، ” لا یوطن الاماکن “ : یعنی آپ اپنے لئے کوئی ایسی جگہ مقرر نہیں کرتے تھے ، جو آپ کی جگہ کے طور پر مشہور ہو ، بلکہ جس جگہ آپ کی ضرورت ہوتی ، وہاں جہاں ممکن ہوتا بیٹھ جاتے ، پھر انہوں نے اس کی وضاحت کرتے ہوئے کہا: جہاں مجلس ختم ہو رہی ہوتی ، وہیں بیٹھ جاتے ، اور اسی سے آپ علیہ السلام کی یہ حدیث ہے کہ آپ نے اس بات سے منع کیا ہے کہ آدمی مسجد میں کوئی جگہ اس طرح مخصوص کر لے ، جس طرح اونٹ اپنی جگہ مخصوص کر لیتا ہے ، آپ کی مجلس کے بارے میں ان کے یہ الفاظ : ” لا تؤبن فیہ الحرم “ : یعنی اس میں خواتین کا وصف بیان نہیں کیا جاتا تھا ، اسی سے نبی اکرم صلی اللہ علیہ وسلم کی یہ حدیث ہے کہ آپ نے ایسے شعر سے منع کیا ہے ، جس میں خواتین کا برائی کے ساتھ ذکر کیا گیا ہو ۔
ابوعبید کہتے ہیں : ابواسماعیل مؤدب نے ہمیں مجالد کے حوالے سے ، شعبی کا یہ بیان سنایا : کچھ لوگ مسجد میں ایک دوسرے کو شعر سنا رہے تھے ، ابن زبیر آئے اور بولے : اللہ کے حرم میں اور اللہ کے گھر کے پاس تم شعر سنا رہے ہو ؟ ! تو نبی اکرم صلی اللہ علیہ وسلم کے اصحاب میں سے ایک صاحب نے کہا: اے ابن زبیر ! اس میں کوئی حرج نہیں ہے ، نبی اکرم صلی اللہ علیہ وسلم نے صرف ایسے شعر سے منع کیا ہے ، جس میں خواتین کا برائی کے ساتھ ذکر ہو ، یا جس کے ذریعے لوگوں کا مال ہتھیایا جائے ۔ ” لا تنثی فلتاتہ “ : ” فلتات “ سے مراد لغزشیں ہیں ، جن کا تذکرہ نہیں کیا جاتا تھا ، کہا جاتا ہے : ” نثوت انثو “ اور اس سے اسم ” نثا “ ہے ، اور ” فلتاتہ “ میں جو ضمیر ہے ، وہ مجلس کی طرف لوٹ رہی ہے ، کیا تم نے دیکھا نہیں کہ کلام کے آغاز میں انہوں نے ان سے آپ کی مجلس کے بارے میں دریافت کیا تھا ، انہوں نے یہ بھی کہا ہے : آپ کی مجلس میں ایسی لغزشیں نہیں ہوتی تھیں ، جنہیں کسی کو نقل کرنے کی ضرورت پیش آئے ، ” فلتاتہ “ سے مراد مجلس کی لغزشیں ہیں ، جنہیں لوگ ایک دوسرے سے نقل نہیں کرتے تھے ۔
یہ روایت امام طبرانی نے نقل کی ہے ، اور اس کی سند میں ایسا راوی ہے ، جس کا نام ذکر نہیں کیا گیا ۔

سیده ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم جب غصے میں آتے تھے ، تو آپ صلی اللہ علیہ وسلم کا چہرہ سرخ ہو جاتا تھا ۔
یہ روایت امام طبرانی نے نقل کی ہے ، اس کی سند میں ایک راوی اسماعیل بن عمرو بجلی ہے ، جسے ابن حبان اور دیگر حضرات نے ثقہ قرار دیا ہے ، جبکہ امام دارقطنی رحمہ اللہ اور دیگر حضرات نے اسے ضعیف کہا: ہے ، اس روایت کے بقیہ رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم جب غصے میں آتے تھے ، تو آپ صلی اللہ علیہ وسلم کی کنپٹیاں سرخ ہو جاتی تھیں ۔
یہ روایت امام طبرانی نے نقل کی ہے ، اس کی سند میں ایک راوی اسماعیل بن ابراہیم ابویحیی تیمی ہے ، اور وہ ضعیف ہے ۔

سیدنا حکیم بن حزام رضی اللہ عنہ بیان کرتے ہیں : میں یمن گیا ، وہاں میں نے ذی یزن کا حلہ خریدا ، اور وہ نبی اکرم صلی اللہ علیہ وسلم کی خدمت میں تحفے کے طور پر پیش کیا ، یہ اس مدت کی بات ہے ، جب آپ صلی اللہ علیہ وسلم کے اور قریش کے درمیان صلح کا معاملہ چل رہا تھا تو آپ نے فرمایا : میں کسی مشرک کا تحفہ قبول نہیں کرتا ہوں ، وہ آپ نے واپس کر دیا ، میں نے اسے فروخت کیا ، نبی اکرم صلی اللہ علیہ وسلم نے وہ حلہ خرید کے اسے پہنا ، پھر آپ نکل کر اپنے اصحاب کے پاس آئے ، تو وہ حلہ آپ صلی اللہ علیہ وسلم کے جسم پر تھا ، میں نے اُس حلے میں نبی اکرم صلی اللہ علیہ وسلم سے زیادہ خوبصورت اور کوئی چیز نہیں دیکھی ، اور میں نے اس وقت یہ اشعار کہے : ” ثالث لوگ فیصلہ کرنے میں کس بات کا انتظار کر رہے ہیں ؟ جبکہ جو چیز ظاہر ہوئی ہے ، وہ چمک اور سجاوٹ کے حوالے سے واضح ہے ، جب وہ بزرگی کے حوالے سے ان کا موازنہ کرتے ہیں ، تو ان ( یعنی نبی کے مخالفین ) کے خلاف ( نبی کے حق میں دلائل ) زیادہ ہونے کا فیصلہ دے دیتے ہیں ، جس طرح چھوٹے ڈول کے مقابلے میں بڑے ڈول سے پانی حاصل کرنے والا شخص ہوتا ہے ۔ “ نبی اکرم صلی اللہ علیہ وسلم نے یہ اشعار سنے ، تو آپ صلی اللہ علیہ وسلم مسکرا دیے ، پھر آپ صلی اللہ علیہ وسلم اندر تشریف لے گئے ۔
یہ روایت امام طبرانی نے نقل کی ہے ، اس کی سند میں ایک راوی یعقوب بن محمد زہری ہے ، جسے جمہور نے ضعیف قرار دیا ہے ویسے اُس کی توثیق کی گئی ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے
یہ روایت طویل روایت کے طور پر ، ہدیہ دینے سے متعلق باب میں گزر چکی ہے ۔

محمد بن سلیمان بن سلیط ، اپنے والد کے حوالے سے اپنے دادا کا یہ بیان نقل کرتے ہیں : ” جب نبی اکرم صلی اللہ علیہ وسلم ہجرت کے لئے نکلے ، تو آپ کے ساتھ سیدنا ابوبکر رضی اللہ عنہ تھے ، اور سیدنا عامر بن فہیرہ رضی اللہ عنہ تھے ، جو سیدنا ابوبکر رضی اللہ عنہ کے غلام ہیں ، اور ابن اریقط نامی شخص تھا ، جو راستے کے بارے میں ان حضرات کو بتا رہا تھا ، نبی اکرم صلی اللہ علیہ وسلم کا گزر سیدہ ام معبد خزاعیہ رضی اللہ عنہا کے پاس سے ہوا ، وہ خاتون نبی اکرم صلی اللہ علیہ وسلم کو پہچانتی نہیں تھیں ، نبی اکرم صلی اللہ علیہ وسلم نے اس سے فرمایا : اے ام معبد ! کیا تمہارے پاس دودھ ہے ؟ اس نے عرض کی : اللہ کی قسم ! بکریاں گئی ہوئی ہیں ( یا ان میں دودھ نہیں ہے ) نبی اکرم صلی اللہ علیہ وسلم نے فرمایا : اس بکری کا کیا معاملہ ہے ؟ جسے میں گھر کے کونے میں دیکھ رہا ہوں ، اس خاتون نے بتایا : یہ ایک ایسی بکری ہے جو کمزوری کی وجہ سے دوسری بکریوں سے پیچھے رہ گئی ہے ، نبی اکرم صلی اللہ علیہ وسلم نے فرمایا : کیا تم یہ اجازت دو گی کہ میں اس کا دودھ دوہ لوں ؟ اس خاتون نے کہا: اللہ کی قسم بھی کی بکرے نے اس کے ساتھ قربت نہیں کی ہے ، ویسے آپ اس کے ساتھ جو مرضی کر لیں ، نبی اکرم صلی اللہ علیہ وسلم نے اس بکری کے تھنوں پر ہاتھ پھیرا ، اور پھر آپ نے ایک برتن منگوایا ، جسے زیادہ لوگ استعمال کر سکتے ہوں ، آپ نے اس میں دودھ دوہ لیا اور اس کو بھر دیا ، پھر آپ نے اپنے اصحاب کو اسے پلایا ، پھر آپ نے دوبارہ اس میں دودھ دوہ لیا اور وہ دودھ اس خاتون کے پاس چھوڑ کر آپ روانہ ہو گئے ، جب اس عورت کا شوہر شام کے وقت آیا ، تو اس نے خاتون سے کہا: اے ام معبد ! یہ دودھ کہاں سے آیا ہے ؟ جبکہ گھر میں تو دودھ دوہنے کا کوئی انتظام ہی نہیں ہے ، اور بکریاں باہر گئی ہوئی تھیں ؟ اس خاتون نے جواب دیا : جی نہیں ! اللہ کی قسم ! معاملہ یہ ہے کہ ایک صاحب ہمارے پاس سے گزرے تھے ، جو وجیہہ و شکیل شخصیت کے مالک تھے ، ان کا چہرہ خوبصورت تھا ، ان کی پلکوں کے بال لمبے تھے ، ان کی آنکھیں سیاہ اور بڑی تھی ، ان کی آواز با رعب تھی ، وہ درمیانے قد و قامت کے مالک تھے ، وہ نہ تو لمبے تڑنگے محسوس ہوتے تھے اور نہ ہی چھوٹے قد کی وجہ سے آنکھ اُنہیں معیوب قرار دیتی تھی ، انہیں موٹاپا لاحق نہیں تھا ، اور نہ ہی وہ بالکل کمزور تھے ، ان کی گردن چاندی کی بنی ہوئی محسوس ہوتی تھی ، جب وہ دیکھتے تھے تو اُن پر نمایاں ہونا ظاہر ہوتا تھا ، اور جب خاموش ہوتے تھے ، تو ان پر وقار ہوتا تھا ، ان کی گفتگو موتیوں کی لڑی کی طرح تھی ، دیکھنے کے اعتبار سے وہ اپنے سب ساتھیوں سے زیادہ خوبصورت تھے ، اُن کا چہرہ سب سے زیادہ حسین تھا ، ان پر رشک کیا جا سکتا تھا ، اور وہ ایسے نہیں تھے کہ ان میں خرابی ہو ، ان کے ساتھ ان کے ساتھی بھی تھے ، جو انہیں گھیرے ہوئے تھے ، جب وہ ان ساتھیوں کو کوئی حکم دیتے تو وہ ساتھی لپک کر اس کی طرف جاتے ، اور جب وہ اُن ساتھیوں کو کسی چیز سے منع کرتے ، تو ان کے منع کرنے پر ، وہ ساتھی باز آ جاتے اس خاتون کے شوہر نے کہا: یہ تو قریش کے متعلقہ فرد ہیں ، اگر میں انہیں دیکھ لیتا ، تو ان کی پیروی کر لیتا ، اب میں پوری کوشش کروں گا کہ میں ایسا کر لوں ۔ راوی بیان کرتے ہیں : مکہ میں لوگوں کو اس بات کا علم نہیں تھا کہ نبی اکرم صلی اللہ علیہ وسلم کون سی سمت کی طرف تشریف لے گئے ہیں ، یہاں تک کہ لوگوں نے جبل ابوقبیس پر کسی ہاتف کو یہ کہتے ہوئے سنا : ” اللہ تعالیٰ جزائے خیر دے اور جزاء دینا ، اس کے ہاتھ میں ہے ، ان دو ساتھیوں کو ، جنہوں نے ام معبد کے خیمے میں پڑاؤ کیا تھا ، وہ دونوں نیکی کے ہمراہ وہاں ٹھہرے تھے اور پھر وہ دونوں وہاں سے روانہ ہو گئے ، تحقیق وہ شخص کامیاب ہو گیا ، جو سیدنا محمد صلی اللہ علیہ وسلم کا ساتھی بن گیا ، کسی اونٹنی کے پالان پر کوئی ایسا شخص سوار نہیں ہوا ، جو ان سے زیادہ نیکی کرنے والا ہو اور ( ان سے زیادہ ) عہد کو پورا کرنے والا ہو ، انہوں نے آغاز سے پہلے حال کی چادر کو پہنایا ، اس شخص کے سر پر وہ چادر ڈالی ، جسے اس کی ضرورت تھی بنو کعب کو اپنی خاتون کی جگہ کے حوالے سے مبارکباد ہے ، جس خاتون کی رہائش گاہ ایمان والوں کے لئے محفوظ جگہ بنی ۔ “
یہ روایت امام طبرانی نے نقل کی ہے ، اس کی سند میں ایک راوی عبدالعزیز بن یحیی مدینی ہے ، امام بخاری رحمہ اللہ اور دیگر حضرات نے اس کی نسبت جھوٹ کی طرف کی ہے ، امام حاکم رحمہ اللہ کہتے ہیں : یہ صدوق ہے ، تو اس حوالے سے حیرت ہوتی ہے ، اس روایت کی سند میں اور بھی مجہول راوی ہیں ۔ اس سے پہلے یہ حدیث ” مغازی “ سے متعلق باب میں ، مدینہ منورہ کی طرف ہجرت کرنے سے متعلق باب میں گزر چکی ہے جو دوسری سند کے ساتھ منقول ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب کلام کرتے تھے ، تو یوں محسوس ہوتا تھا ، جیسے آپ کے سامنے والے دو دانتوں کے درمیان سے نور نکل رہا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالعزیز بن ابوثابت ہے ، اور وہ ضعیف ہے ۔

سیدنا ابوقرصافہ رضی اللہ عنہ بیان کرتے ہیں : جب ہم نے نبی اکرم صلی اللہ علیہ وسلم کی بیعت کر لی ، میں نے ، میری والدہ نے اور میری خالہ نے بیعت کی تھی ، اور ہم آپ کے پاس سے واپس آئے ، تو میری والدہ اور میری خالہ نے مجھ سے کہا: اے میرے بیٹے ! ہم نے ان جیسا کوئی فرد نہیں دیکھا ، جو ان کے چہرے سے زیادہ خوبصورت ہو ، اور ان سے زیادہ صاف کپڑے پہنتا ہو ، ان سے زیادہ نرم کلام کرتا ہو ، ہم نے یہ دیکھا کہ جیسے ان کے منہ سے نور نکل رہا ہے ۔
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا جبیر بن مطعم رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ صلی اللہ علیہ وسلم چہرہ مبارک موڑ کر ہماری طرف متوجہ ہوئے ، تو وہ چاند کے ٹکڑے کی مانند تھا ۔
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

ابوعبیدہ بن محمد بن بن عمار بن یاسر بیان کرتے ہیں : میں نے سیدہ ربیع بنت معوذ بن عفراء رضی اللہ عنہا سے کہا: آپ میرے سامنے نبی اکرم صلی اللہ علیہ وسلم کا حلیہ بیان کریں ! تو انہوں نے فرمایا : ” اگر تم نبی اکرم صلی اللہ علیہ وسلم کو دیکھ لیتے ، تو یوں محسوس ہوتا جیسے سورج طلوع ہو رہا ہے ۔ “
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا ابوطفیل رضی اللہ عنہ بیان کرتے ہیں : فتح مکہ کے دن میں نے نبی اکرم صلی اللہ علیہ وسلم کو دیکھا ، میں آپ کے بالوں کی سیاہی کے ہمراہ آپ کے چہرے کی سفیدی نہیں بھولا ، لوگوں میں ایسے لوگ بھی موجود تھے ، جو آپ سے طویل القامت تھے اور جو آپ سے کوتاہ قامت تھے آپ چل رہے تھے ، اور لوگ آپ کے اردگرد چل رہے ، میں نے اپنی والدہ سے دریافت کیا : یہ صاحب کون ہیں ؟ تو انہوں نے بتایا : یہ اللہ کے رسول صلی اللہ علیہ وسلم ہیں ۔ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے صحیح میں ایک حدیث منقول ہے ، جو اس روایت کے علاوہ ہے ۔
یہ روایت امام طبرانی نے نقل کی ہے ، اس کی سند میں ایک راوی جابر جعفی ہے اور وہ ضعیف ہے ۔ یہ روایت امام بزار نے اختصار کے ساتھ نقل کی ہے ، اور اس کے رجال ” صحیح “ کے رجال ہیں ۔

سیدہ ام ہانی رضی اللہ عنہا بیان کرتی ہیں : ” میں نے جب بھی نبی اکرم صلی اللہ علیہ وسلم کے پیٹ کی طرف دیکھا ، تو مجھے یہی خیال آیا کہ جیسے قراطیس کو ایک دوسرے کے اوپر رکھا ہوا ہے ۔ “
یہ روایت امام طبرانی نے نقل کی ہے ، اس کی سند میں ایک راوی جابر جعفی ہے اور وہ ضعیف ہے ۔

سیدنا جابر بن سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم کی انگلیاں متظاہرہ تھیں ۔
یہ روایت عبداللہ نے نقل کی ہے ، اس کی سند میں ایک راوی سلمہ بن حفص ہے ، اور وہ ضعیف ہے ۔

سیده میمونہ بنت کردم رضی اللہ عنہا بیان کرتی ہیں : میں نے نبی اکرم صلی اللہ علیہ وسلم کو دیکھا ، آپ کی انگوٹھے کے ساتھ والی انگلی انگوٹھے سے ذرا بڑی تھی ، راوی کہتے ہیں : اس خاتون کی مراد یہ تھی کہ پاؤں کی انگلیاں ایسی تھیں ۔
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

سعید بن مسیب بیان کرتے ہیں : انہوں نے سیدنا ابوہریرہ رضی اللہ عنہ کو نبی اکرم صلی اللہ علیہ وسلم کا حلیہ بیان کرتے ہوئے سنا ، انہوں نے فرمایا : ” نبی اکرم صلی اللہ علیہ وسلم درمیانے قد و قامت کے مالک تھے ، تاہم آپ طوالت کی طرف زیادہ قریب تھے ، آپ کا رنگ انتہائی سفید تھا اور داڑھی سیاہ تھی ، آپ کے بال خوبصورت تھے ، آنکھوں کی پلکیں لمبی تھیں ، کندھوں کے درمیان فاصلہ زیادہ تھا ، آپ دونوں پاؤں جما کر چلتے تھے ، آپ کا تلوا بالکل سیدھا تھا ، آپ مکمل طور پر سامنے آتے تھے اور مکمل طور پر مڑ جاتے تھے ، میں نے آپ سے پہلے اور آپ کے بعد آپ صلی اللہ علیہ وسلم جیسا کوئی نہیں دیکھا ۔ “
یہ روایت امام بزار نے نقل کی ہے ، اور اس کے رجال کی توثیق کی گئی ہے ۔

سیدنا ابوسعید خدری رضی اللہ عنہ کے بارے میں یہ بات منقول ہے : اُن سے نبی اکرم صلی اللہ علیہ وسلم کی اس مہر نبوت کے بارے میں دریافت کیا گیا ، جو آپ کے دونوں کندھوں کے درمیان تھی ، تو انہوں نے اپنی شہادت کی انگلی کے ذریعے اشارہ کرتے ہوئے کہا: اس طرح کچھ گوشت تھا ، جو دو کندھوں کے درمیان ابھرا ہوا تھا ۔
یہ روایت امام أحمد نے نقل کی ہے ، اس کی سند میں ایک راوی عبداللہ بن میسرہ ہے ، جسے ابن حبان نے ثقہ قرار دیا ہے ، اور جمہور نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا ابوزید عمرو بن اخطب رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : اے ابوزید ! میرے قریب ہو جاؤ ، اور میری پشت پر ہاتھ پھیرو ، نبی اکرم صلی اللہ علیہ وسلم نے اپنی پشت سے کپڑا ہٹایا ، میں نے آپ کی پشت پر ہاتھ پھیرا ، تو میں نے مہر نبوت پر اپنی انگلیاں رکھیں ۔ راوی کہتے ہیں : ان سے دریافت کیا گیا : مہر نبوت سے مراد کیا ہے ؟ انہوں نے جواب دیا : کچھ بال تھے جو اکٹھے تھے ۔
یہ روایت امام أحمد ، امام ابویعلیٰ اور امام طبرانی نے نقل کی ہے ، انہوں نے اپنی ایک روایت میں یہ الفاظ زائد نقل کیے ہیں : ” میں نے نبی اکرم صلی اللہ علیہ وسلم کی پشت پر مہر نبوت دیکھی ، جو آپ کی پشت پر اس طرح تھی کہ جیسے وہاں مہر لگائی گئی ہو ۔ “ اس کی اسانید میں سے ایک کے رجال ” صحیح “ کے رجال ہیں ۔

سیدنا عباد بن عمرو رضی اللہ عنہ کے بارے میں یہ بات منقول ہے : وہ نبی اکرم صلی اللہ علیہ وسلم کی خدمت کیا کرتے تھے ، ایک مرتبہ ایک یہودی آپ صلی اللہ علیہ وسلم کے ساتھ بات چیت کر رہا تھا ، اس دوران آپ کے کندھے سے چادر گر گئی ، نبی اکرم صلی اللہ علیہ وسلم کو یہ بات پسند نہیں تھی کہ آپ کی مہر نبوت دکھائی دے ، میں نے آپ کی چادر درست کی ، نبی اکرم صلی اللہ علیہ وسلم نے دریافت کیا : ایسا کس نے کیا ہے ؟ میں نے عرض کی : میں نے ، نبی اکرم صلی اللہ علیہ وسلم نے فرمایا : میرے سامنے آؤ ! تو میں آپ کے سامنے آ کے بیٹھ گیا ، نبی اکرم صلی اللہ علیہ وسلم نے اپنا دست مبارک میرے سر پر رکھا اور اسے میرے چہرے اور سینے تک پھیرا ، پھر آپ نے ارشاد فرمایا : جب ہمارے پاس کوئی چیز آئے گی ، تو تم میرے پاس آنا ، جب میں آپ کے پاس آیا ، تو آپ نے مجھے ایک جذعہ ( چار سال کا ہو کر پانچویں سال میں داخل ہونے والا اونٹ ) دینے کا حکم دیا ، وہ مہر آپ صلی اللہ علیہ وسلم کے بائیں کندھے کی طرف تھی ، یوں لگتا تھا ، جیسے وہ کسی بکری کے بچہ کا گھٹنا ہو ( یعنی وہ چند بال تھے ) ۔
یہ روایت امام طبرانی نے نقل کی ہے ، اس کی سند میں ایسا راوی ہے ، جس سے میں واقف نہیں ہوں ۔

سیدنا جابر بن سمرہ رضی اللہ عنہ بیان کرتے ہیں : میں پیچھے کی طرف سے ، نبی اکرم صلی اللہ علیہ وسلم کی طرف آیا ، تاکہ مہر نبوت کی جگہ کا جائزہ لوں ، جب آپ صلی اللہ علیہ وسلم نے میری طرف دیکھا تو ، آپ نے چادر ہٹا دی اور میں نے اس کی زیارت کی ۔ ( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے مہر نبوت کے بارے میں ایک حدیث ” صحیح “ میں مذکور ہے ، جو اس روایت کے علاوہ ہے ۔
یہ روایت امام طبرانی نے نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے سر میں چار مینڈھیاں ہوتی تھیں ۔
یہ روایت امام طبرانی نے معجم صغیر میں نقل کی ہے ، اور اس کے رجال ثقہ ہیں ۔

اُن کے حوالے سے یہ بات منقول ہے : نبی اکرم صلی اللہ علیہ وسلم کے بال بڑے اور گھنگریالے تھے ۔
یہ روایت امام بزار نے نقل کی ہے ، اس کی سند میں ایک راوی محمد بن قاسم اسدی ہے ، اور وہ ضعیف ہے ۔

فضالہ بن عبید بیان کرتے ہیں : وہ سیدہ عائشہ رضی اللہ عنہا کی خدمت میں حاضر ہوئے ، تو سیدہ عائشہ رضی اللہ عنہا نے نبی اکرم صلی اللہ علیہ وسلم کے کچھ بال نکال کر انہیں دکھائے ، تو وہ سرخ رنگ کے تھے اور اُن پر مہندی لگی ہوئی تھی ۔
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

جہضم بن ضحاک بیان کرتے ہیں : میں ” رجیع “ کے مقام سے گزرا ، تو میں نے وہاں بزرگ کو دیکھا ، تو لوگوں نے بتایا : یہ سیدنا عداء بن خالد بن ہوذہ رضی اللہ عنہ ہیں ، انہوں نے بتایا : میں نے نبی اکرم صلی اللہ علیہ وسلم کی زیارت کی ہوئی ہے ، میں نے کہا: آپ ان کا حلیہ میرے سامنے بیان کریں ، تو انہوں نے جواب دیا : وہ خوبصورت داڑھی کے مالک تھے ۔ راوی کہتے ہیں : عرب داڑھی کے لفظ ” سبلہ“ استعمال کرتے ہیں ۔
یہ روایت امام طبرانی نے نقل کی ہے ، اور اس کی سند میں ایسے راوی ہیں ، جن سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب چلتے تھے ، تو چاق و چوبند ہو کر چلتے تھے ، آپ میں کسل مندی نہیں ہوتی تھی ۔
یہ روایت امام أحمد اور امام بزار نے نقل کی ہے ، اور یہ الفاظ زائد نقل کیے ہیں : ” آپ صلی اللہ علیہ وسلم ادھر ادھر توجہ نہیں دیتے تھے ، آپ صلی اللہ علیہ وسلم کے چلنے سے یہ بات پتہ چل جاتی تھی کہ آپ صلی اللہ علیہ وسلم میں کسل مندی یا کمزوری نہیں ہے ۔ “ امام أحمد کے رجال ” صحیح “ کے رجال ہیں ، البتہ تابعی کا نام بیان نہیں کیا گیا ہے ، امام بزار نے اس کا نام بیان کیا ہے ، اور وہ عکرمہ ہے ، اور وہ صحیح کے رجال میں سے ہے ۔

سیدنا ابوعنبہ رضی اللہ عنہ بیان کرتے ہیں : نبی اکرم صلی اللہ علیہ وسلم جب چلتے تھے تو یوں چلتے تھے کہ پتھر کو توڑ دیں گے ۔
یہ روایت امام بزار نے نقل کی ہے ، اس کی سند میں ایک راوی ابومہدی سعید بن سنان ہے ، جس کے ضعیف ہونے کے باوجود اس کی توثیق کی گئی ہے ۔

سیدنا شداد رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے آپ صلی اللہ علیہ وسلم کا ہاتھ پکڑا ، تو وہ ریشم سے زیادہ نرم اور برف سے زیادہ ٹھنڈا تھا ۔
یہ روایت امام طبرانی نے معجم کبیر اور معجم اوسط میں نقل کی ہے ، معجم کبیر کے رجال ” صحیح “ کے رجال ہیں ، صرف موسیٰ بن ایوب نصیبی کا معاملہ مختلف ہے ، اور وہ ثقہ ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم جب مسکراتے تھے ، تو آپ کے ” رباعیہ “ ( دانت ) نظر آ جایا کرتے تھے ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم سیدہ ام سلیم رضی اللہ عنہا کے ہاں آتے تھے اور ان کے بچھونے پر سو جاتے تھے ، آپ کی نیند گہری ہوتی تھی ۔ ۔ ۔ ۔ ۔ ۔ ۔ ۔ اس کے بعد راوی پوری حدیث نقل کی ہے ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔