مجمع الزوائد ومنبع الفوائد

سیدنا ابوموسیٰ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس اُمت کا ( جو بھی فرد ) یا جو یہودی ، یا جو عیسائی شخص ، میرے بارے میں سنتا ہے ، اور مجھ پر ایمان نہیں لاتا ، وہ اہل جہنم میں سے ہو گا ۔ “ راوی کہتے ہیں : میں نے سوچا ، نبی اکرم صلی اللہ علیہ وسلم جو بات ارشاد فرماتے ہیں ، وہ اللہ کی کتاب میں بھی ہوتی ہے ، میں نے قرآن پڑھا ، تو اس میں یہ آیت پائی : ” گروہوں میں سے جو شخص ان کا انکار کرے گا ، تو اُس کے ساتھ جہنم کا وعدہ ہے ۔ “

ایک روایت کے یہ الفاظ ہیں : ” اور وہ مجھ پر ایمان نہ لائے ، وہ جنت میں داخل نہیں ہو گا ۔ “
یہ روایت امام طبرانی نے نقل کی ہے ، روایت کے یہ الفاظ ان کے نقل کردہ ہیں ، دونوں روایات میں امام أحمد نے اس کی مانند روایت نقل کی ہے ، اور امام أحمد کے رجال ” صحیح “ ہیں ، امام بزار نے بھی اسے اختصار کے ساتھ نقل کیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں محمد ( صلی اللہ علیہ وسلم ) کی جان ہے ، اس امت کا جو بھی فرد ، میرے بارے میں سنے ، یا جو یہودی یا عیسائی سنے ، اور وہ ایسی حالت میں مر جائے کہ وہ اس چیز پر ایمان نہ لایا ہو ، جس کے ہمراہ مجھے مبعوث کیا گیا ہے ، تو وہ شخص اہل جہنم میں سے ہو گا ۔ “ ( علامہ ہیثمی فرماتے ہیں : ) میں یہ کہتا ہوں صحیح میں یہ روایت مذکور ہے ، اور اس کے الفاظ یہ ہیں : ” اس اُمت سے تعلق رکھنے والا ، جو بھی یہودی ، یا عیسائی شخص میرے بارے میں سنے ۔ ۔ ۔ ۔ ۔ ۔ ۔ “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔