مجمع الزوائد ومنبع الفوائد

سیدنا عقبہ بن عبد رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم سے سوال کیا اس نے کہا: یا رسول اللہ آپ کے معاملے کا آغاز کیسے ہوا ؟ آپ صلی اللہ علیہ وسلم نے فرمایا : ” میری دائی ماں کا تعلق بنو سعد بن بکر سے تھا ، ایک مرتبہ میں اور ان کا بیٹا جانوروں میں موجود تھے ، ہمارے پاس کھانے کے لئے کچھ نہیں تھا ، میں نے کہا: اے میرے بھائی ! تم جاؤ اور ہمارے لیے والدہ کے پاس سے کھانے کے لئے لے آؤ ، میرا بھائی چلا گیا اور میں جانوروں کے پاس ٹھہر گیا ، اسی دوران دو سفید رنگ کے پرندے آئے ، وہ دونوں باز لگ رہے تھے ، ان میں سے ایک نے دوسرے سے کہا: کیا یہ وہی ہیں ؟ دوسرے نے کہا: جی ہاں ! وہ دونوں لپک کر میرے پاس آئے ، انہوں نے مجھے پکڑا اور مجھے چت لٹا دیا ، انہوں نے میرا پیٹ چیر دیا ، پھر انہوں نے میرا دل نکالا پھر اسے چیر دیا پھر اس میں سے دو سیاہ رنگ کے گوشت کے لوتھڑے نکالے ، پھر ان میں سے ایک نے دوسرے سے کہا: میرے پاس ٹھنڈا پانی لے کر آؤ ، پھر ان دونوں نے اس پانی کے ذریعے میرے پیٹ کو دھویا ، پھر اس نے کہا: میرے پاس ٹھنڈا پانی لے کر آؤ ! انہوں نے اس کے ذریعے میرے دل کو دھویا ، پھر اس نے کہا: میرے پاس سکینت لے کے آؤ ! وہ انہوں نے میرے دل میں ڈال دی ، پھر ان میں سے ایک نے دوسرے سے کہا: ان کو سی دو ! اس نے اُسے سی دیا اور اس پر مہر نبوت لگا دی ۔ ایک روایت میں یہ الفاظ ہیں : تم اس پر مہر نبوت لگا دو ! ان میں سے ایک نے دوسرے سے کہا: انہیں ایک پلڑے میں رکھو اور ان کی امت کے ایک ہزار افراد کو دوسرے پلڑے میں رکھو ، نبی اکرم صلی اللہ علیہ وسلم فرماتے ہیں : جب میں نے اپنے اوپر ایک ہزار لوگوں کو دیکھا ، تو مجھے یہ ڈر ہوا کہ کہیں اُن میں سے کوئی میرے اوپر نہ گر جائے ، اس نے کہا: اگر ان کی پوری امت کے ساتھ ان کا وزن کیا جائے ، تو یہ ان سب سے وزنی ہوں گے ، پھر وہ دونوں چلے گئے اور مجھے چھوڑ گئے ، میں اس بات سے خوف زدہ ہو گیا ، پھر میں اپنیہ والدہ کے پاس آیا اور انہیں اس صورت حال کے بارے میں بتایا ، جس کا میں نے سامنا کیا تھا ، تو وہ بھی میرے حوالے سے پریشان ہو گئیں کہ مجھے کوئی چیز لاحق نہ ہو جائے ، تو انہوں نے کہا: میں تمہیں اللہ کی پناہ میں دیتی ہوں ، پھر انہوں نے اپنے اونٹ پر پالان رکھا اور مجھے اپنے ساتھ پالان پر سوار کروایا اور خود میرے پیچھے بیٹھ گئیں ، یہاں تک کہ ہم لوگ میری والدہ کے پاس پہنچ گئے ، تو سیدہ حلیمہ رضی اللہ عنہا نے کہا: میں نے اپنی امانت اور ذمہ کو ادا کر دیا ہے ، پھر انہوں نے میری والدہ کو اس صورت حال کے بارے میں بتایا ، جس کا مجھے سامنا کرنا پڑا تھا ، تو میری والدہ اس سے حوالے سے پریشان نہیں ہوئیں ، انہوں نے بتایا : کہ میں نے اپنے میں سے ایک نور نکلتے ہوئے دیکھا تھا ، جس کی وجہ سے شام کے محلات روشن ہو گئے تھے ۔ “
یہ روایت امام أحمد اور امام طبرانی نے نقل کی ہے انہوں نے اس کا متن نقل نہیں کیا ہے ، امام أحمد کی سند حسن ہے ۔

سیدنا ابوامامہ رضی اللہ عنہ بیان کرتے ہیں : میں نے عرض کی : یا رسول اللہ ! آپ کے معاملے کا آغاز کیسے ہوا ؟ نبی اکرم صلی اللہ علیہ وسلم نے ارشاد فرمایا : ” ( میں ) سیدنا ابراہیم علیہ السلام کی دعا ، سیدنا عیسیٰ علیہ السلام کی خوشخبری کا نتیجہ ہوں ، میری والدہ نے یہ چیز دیکھی کہ ان میں سے ایک نور نکلا اور اس نور کی وجہ سے شام کے محلات روشن ہو گئے ۔ “
یہ روایت امام أحمد نے نقل کی ہے ، اور اس کی سند حسن ہے اس روایت کے شواہد موجود ہیں ، جو اس کو تقویت دیتے ہیں ، یہ روایت امام طبرانی نے بھی نقل کی ہے ۔

سیدنا ابی بن کعب رضی اللہ عنہ بیان کرتے ہیں : سیدنا ابوہریرہ رضی اللہ عنہ نبی اکرم صلی اللہ علیہ وسلم سے ایسی چیزوں کے بارے میں دریافت کرنے کی جرأت رکھتے تھے جن کے بارے میں اُن کے علاوہ کوئی اور دریافت نہیں کرتا تھا ، انہوں نے عرض کی : یا رسول اللہ ! نبوت کے معاملے کے حوالے سے آپ نے سب سے پہلے جو چیز دیکھی تھی ، وہ کیا تھی ؟ تو نبی اکرم صلی اللہ علیہ وسلم سیدھے ہو کر بیٹھ گئے آپ نے ارشاد فرمایا : ” اے ابوہریرہ ! تم نے ایک اہم سوال کیا ہے ، ایک مرتبہ میں صحراء میں موجود تھا ، میری عمر دس سال کچھ ماہ ہو گی ، اس دوران میں نے اپنے اوپر سے بات چیت کرنے کی آواز سنی ، تو کوئی ایک فرد دوسرے سے کہہ رہا تھا : کہ کیا یہ وہی ہیں ؟ دوسرے نے جواب دیا : جی ہاں ! تو دونوں سامنے سے میری طرف آئے ، میں نے اس طرح کی مخلوق کبھی نہیں دیکھی تھی ، اور وہ ارواح تھیں ، اس طرح کی مخلوق میں نے کبھی نہیں دیکھی تھی ، ان کے لباس اس طرح کے تھے کہ میں نے ایسا لباس کبھی کسی کے جسم پر نہیں دیکھا تھا ، وہ دونوں چلتے ہوئے میرے پاس آئے یہاں تک کہ ان میں سے ہر ایک نے میرے بازو کو پکڑ لیا ، لیکن مجھے ان میں سے کسی کے چھونے کا محسوس نہیں ہو رہا تھا ، ان میں سے ایک نے دوسرے سے کہا: تم انہیں لٹا دو ! ان دونوں نے مجھے سانس میں کوئی رکاوٹ پیدا کیے بغیر اور کسی عضو کو توڑے بغیر لٹا دیا ، ان میں سے ایک نے دوسرے سے کہا: ان کے سینے کو چیر دو ! پھر ان میں سے ایک میرے سینے کی طرف جھکا ، اس نے اسے چیر دیا ، لیکن اس میں نہ کوئی خون نکلا ، نہ کوئی تکلیف محسوس ہوئی ، اس نے دوسرے سے کہا: تم کھوٹ اور حسد کو نکال دو ! تو اس نے ایک ایسی چیز نکالی جو جمے ہوئے خون کی مانند تھی ، اور پھر اسے ایک طرف رکھ دیا ، اس نے دوسرے سے کہا: اس میں رحمت اور مہربانی داخل کر دو ! تو وہ چاندی کی طرح کی کوئی چیز تھی ، جو لائی گئی ، پھر اس نے میرے دائیں پاؤں کے انگوٹھے کو ہلایا اور بولا: تم اُٹھ جاؤ اور تم سلامت رہو ! تو میں جب وہاں سے واپس آیا ، تو میری یہ حالت تھی کہ میں چھوٹے پر مہربان تھا اور بڑے پر رحمت کرنے والا تھا ۔
یہ روایت عبداللہ نے نقل کی ہے اور اس کے رجال ثقہ ہیں ، ابن حبان نے انہیں ثقہ قرار دیا ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : سیدنا جبرائیل علیہ السلام نے سونے کے طشت میں پیٹ میں سے کچھ ( یعنی قلب اطہر ) نکالا ، اسے دھویا اور پھر اُس میں حکمت اور نور بھر دیا ، اور حکمت اور علم بھر دیا ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا کچھ حصہ مذکور ہے ۔
یہ روایت امام طبرانی نے نقل کی ہے اس کی سند میں ایک راوی رشدین بن سعد ہے ، جمہور نے اسے ضعیف قرار دیا ہے ۔