مجمع الزوائد ومنبع الفوائد

سیدنا عباس بن عبدالمطلب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنہیں ذبح کیا گیا ، وہ سیدنا اسحاق علیہ السلام تھے ۔ “
یہ روایت امام بزار نے نقل کی ہے ، اس کی سند میں ایک راوی مبارک بن فضالہ ہے ، جسے جمہور نے ضعیف قرار دیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے مجھے یہ اختیار دیا کہ وہ میری نصف امت کی مغفرت کر دے ، یا مجھے شفاعت نصیب کر دے ، تو میں نے شفاعت کو اختیار کر لیا ، اور مجھے یہ امید ہے کہ یہ میری امت کے لئے عمومی ہو گی ، اگر یہ چیز پہلے سے نہ ہو چکی ہوتی ، جس کی طرف ایک نیک بندے نے دعا کی تھی ، تو میں نے اپنی دعا جلدی کر لینی تھی ، جب اللہ تعالیٰ نے سیدنا اسحاق علیہ السلام کو ذبح ہونے کی تکلیف سے نجات عطا کی ، تو اُن سے کہا: گیا : اے اسحاق ! تم مانگو ! تمہیں دیا جائے گا ، تو انہوں نے کہا: اللہ کی قسم ! میں شیطان کے حملے سے پہلے ، اس بارے میں جلدی کر لیتا ہوں : ” اے اللہ ! جو شخص ایسی حالت میں مرے کہ وہ کسی کو تیرا شریک نہ ٹھہراتا ہو ، تو اُس نے اچھائی کی ہو گی ، تو اُس کی مغفرت کر دینا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالرحمن بن زید بن اسلم ہے ، اور وہ ضعیف ہے ، اور امام طبرانی کے استاد سے میں واقف نہیں ہوں ۔