مجمع الزوائد ومنبع الفوائد

سیدنا ابوامامہ ، نبی اکرم صلی اللہ علیہ وسلم کا یہ فرمان نقل کرتے ہیں : ” بھلائی کرنا ، صرف کسی حسب والے ، یا دیندار ، یا بردبار شخص کے ساتھ مناسب ہے ۔ “
یہ روایت امام طبرانی نے نقل کی ہے ، اس کی سند میں ایک راوی سلیمان بن سلمہ خبائری ہے اور وہ متروک ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تم اپنے گھر میں صرف کسی پرہیزگار کو آنے دو ، اور اپنی بھلائی ، کسی مومن کے ساتھ ہی کرنا ۔ “
یہ روایت امام طبرانی نے معجم اوسط میں نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدہ عائشہ صدیقہ رضی اللہ عنہا ” مرفوع “ روایت کے طور پر یہ بات نقل کرتی ہیں : ( نبی اکرم صلی اللہ علیہ وسلم نے ارشاد فرمایا ہے : ) ” بھلائی صرف کسی حسب والے یا دیندار کے ساتھ کرنا مناسب ہے ، جیسے کسی اچھی نسل ہی کے گھوڑے کی تربیت کرنا مناسب ہے ۔ “
یہ روایت امام بزار نے نقل کی ہے ، اس کی سند میں ایک راوی عبید بن قاسم ہے اور وہ کذاب ہے ۔